കോട്ടയം: നിയുക്ത എംഎൽഎ രാഹുൽ മാങ്കൂട്ടത്തിൽ പുതുപ്പള്ളിയിലെ ഉമ്മൻ ചാണ്ടിയുടെ കല്ലറയിൽ എത്തി പുഷ്പാർച്ചന നടത്തി. പാലക്കാട്ടെ മിന്നും വിജയത്തിനു ശേഷമാണ് രാഹുൽ പുതുപ്പള്ളിയിൽ എത്തിയത്. പി.സി.വിഷ്ണുനാഥ് എംഎൽഎ, കെ.സി.ജോസഫ് ഉൾപ്പടെയുള്ളവർ അദ്ദേഹത്തിന്‍റെ കൂടെയുണ്ട്.
ഉമ്മൻ ചാണ്ടിയുടെ കല്ലറ വൈകാരിക അടുപ്പമുള്ളയിടമാണ്. പാലക്കാട്ടേത് ജനങ്ങളുടെ വിജയമാണെന്ന് പറഞ്ഞ രാഹുൽ വർഗീയ ശക്തികളുടെ വോട്ട് വാങ്ങിയിട്ടില്ലെന്നും എസ്ഡിപിഐയെ ശക്തമായി എന്നും എതിർത്തിട്ടുള്ളത് ലീഗാണെന്നും ചൂണ്ടിക്കാട്ടി. പാലക്കാട്ടെ ജനങ്ങളെ വർഗീയത പറഞ്ഞു പരിഹസിക്കരുത്.
സരിന് അന്നും ഇന്നും മറുപടി പറയുന്നില്ല. 2025 ൽ പാലക്കാട് നഗരസഭ തിരിച്ചുപിടിക്കുകയാണ് ലക്ഷ്യമെന്നും രാഹുൽ കൂട്ടിച്ചേർത്തു. പാലക്കാട്ടേക്ക് പ്രചാരണത്തിനു പോകുന്നതിനു മുന്പും രാഹുൽ ഉമ്മൻ ചാണ്ടിയുടെ കല്ലറയിൽ എത്തിയിരുന്നു.
ചാണ്ടി ഉമ്മൻ സ്ഥലത്ത് ഇല്ലാത്തതുകൊണ്ടാണ് ഇവിടെ എത്താതിരുന്നതെന്നും ഇത് വിവാദമാക്കേണ്ടതില്ലെന്നും കോൺഗ്രസ് നേതാക്കൾ പറഞ്ഞു. പുതുപ്പള്ളിയിൽ എത്തിയ രാഹുൽ ചാണ്ടി ഉമ്മനുമായി ഫോണിൽ സംസാരിച്ചിരുന്നു.