തിരുവനന്തപുരം: ആത്മകഥാ വിവാദത്തിൽ സിപിഎം കേന്ദ്ര കമ്മിറ്റി അംഗം ഇ.പി. ജയരാജൻ ഡിസി ബുക്ക്സിന് വക്കീൽ നോട്ടീസയച്ചു. ഡിസി മാപ്പുപറയണമെന്ന് ജയരാജന്‍റെ വക്കീൽ നോട്ടീസിൽ പറയുന്നു.
ആത്മകഥ എന്ന പേരിൽ വിശദാംശങ്ങൾ പുറത്തുവിട്ടു. ആത്മകഥ പ്രസിദ്ധീകരിച്ചത് തന്നെ തേജോവധംചെയ്യാൻ. പുറത്തുവന്നത് താൻ എഴുതിയതല്ല. തെരഞ്ഞെടുപ്പ് ദിനത്തിൽ പിഡിഎഫ് പുറത്തുവിട്ടത് രാഷ്ട്രീയ എതിരാളികൾക്ക് ആയുധം നൽകാൻ എന്നും വക്കീൽനോട്ടീസിൽ പറയുന്നു.
ഡിസി ബുക്ക്സ് പുറത്തുവിട്ട ആത്മകഥ എന്ന ഭാഗം പിൻവലിക്കണം. എല്ലാ പോസ്റ്റുകളും പിൻവലിച്ച് മാപ്പുപറയണമെന്നും ഇ.പി.യുടെ നോട്ടീസിൽ ആവശ്യപ്പെടുന്നു. അഡ്വ. കെ. വിശ്വൻ മുഖേനയാണ് ജയരാജൻ ഡിസി ബുക്ക്സിന് വക്കീൽ നോട്ടീസ് അയച്ചത്.
തെരഞ്ഞെടുപ്പ് ദിവസം വ്യാജ വാർത്ത പ്രചരിപ്പിച്ചതിന് പിന്നിൽ ഗൂഢാലോചനയെന്ന് ഇ.പി. ജയരാജൻ നേരത്തെ പറഞ്ഞിരുന്നു. തന്‍റെ ആത്മകഥ പ്രസിദ്ധീകരിക്കാൻ ആരെയും ചുമതലപ്പെടുത്തിയിട്ടില്ലെന്നും ജയരാജൻ പറഞ്ഞു.
പല പ്രസാധകരും തന്നോട് ചോദിച്ചിരുന്നു. എല്ലാം പൂർത്തീകരിച്ച് വായിച്ചുനോക്കി പ്രിന്‍റിംഗിലേക്ക് കൊടുക്കാമെന്നാണ് വിചാരിച്ചിരിക്കുന്നതെന്നും അദ്ദേഹം വ്യക്തമാക്കി.
സംശയാസ്പതമായ കാര്യങ്ങളിലൂടെ പറയുന്നത് ശരിയല്ല. അന്വേഷിച്ച് കണ്ടെത്തേണ്ട കാര്യങ്ങളുണ്ട്. കാര്യങ്ങളിൽ ഇനിയും വ്യക്തത വരാനുണ്ട്. ഡിസി ബുക്ക്സിനെ താൻ പ്രസിദ്ധീകരണത്തിന് ഏൽപ്പിച്ചിട്ടില്ല. താൻ എഴുതിക്കൊണ്ടിരിക്കുന്ന പരുസ്തകം എങ്ങനെയാണ് പ്രസിദ്ധീകരിക്കുക എന്ന് ജയരാജൻ പറഞ്ഞു.
തെറ്റായ നിലപാടാണ് ഡിസി സ്വീകരിച്ചത്. തെറ്റായ നടപടിയാണ് അവരുടേത്. താൻ എഴുതാത്ത കാര്യത്തെക്കുറിച്ച് അടിസ്ഥാനരഹിതമായ വാർത്തയാണ് വന്നിരിക്കുന്നത്. ഇത് സംബന്ധിച്ച് സമഗ്രമായ അന്വേഷണം നടത്തി നടപടി സ്വീകരിക്കണമെന്ന് ആവശ്യപ്പെട്ട് ഡിജിപിക്ക് പരാതി നൽകിയിട്ടുണ്ട്.
തന്‍റെ വിശ്വസ്തനായിട്ടുള്ള പത്രപ്രവർത്തകനെ ഇത് എഡിറ്റ്ചെയ്ത് തയാറാക്കാൻ ചുമതലപ്പെടുത്തിയിട്ടുണ്ട്. അദ്ദേഹത്തിൽനിന്ന് പുറത്തുപോകാൻ സാധ്യതയില്ല. താൻ എഴുതാത്ത കാര്യങ്ങൾ വന്നതിനാലാണ് സംശയം വർധിക്കുന്നത്.
സ്വയം പരിഹസിക്കുന്ന ഭാഗം താൻ തലക്കെട്ടായി നൽകുമോ. കവറിലുള്ള തന്‍റെ ചിത്രം എവിടെയെല്ലാമുണ്ട്. പുസ്തകത്തിന് ഒരു പേര് പോലും താൻ ഇതുവരെ നിർദേശിച്ചിട്ടില്ല.
ഡിസി ബുക്ക്സിൽ വിളിച്ച് പുസ്തകം പ്രസിദ്ധീകരിക്കാൻ ഏൽപ്പിച്ചിട്ടുണ്ടോ എന്ന് ചോദിച്ചു. ബോധപൂർവമാണ് ഈ നീക്കം നടന്നിട്ടുള്ളത്. തെറ്റ് ചെയ്യാത്ത താൻ ഭയപ്പെടേണ്ടതില്ലെന്നും ജയരാജൻ വ്യക്തമാക്കി.