കേന്ദ്ര വാണിജ്യ മന്ത്രാലയത്തിനു കീഴിൽ നോയിഡ ആസ്ഥാനമായുള്ള ഫുട്‌വേർ ഡിസൈൻ ആൻഡ് ഡെവലപ്മെന്‍റ് ഇൻസ്റ്റിറ്റ്യൂട്ടിൽ (എഫ്ഡിഡിഐ) വിവിധ റീട്ടെയിൽ, ഫാഷൻ, മാനേജ്മെന്‍റ് കോഴ്സുകൾക്ക് അപേക്ഷിക്കാം. മേയ് 24ന് നടത്തുന്ന ഓൾ ഇന്ത്യ സെലക്‌ഷൻ ടെസ്റ്റിന്‍റെ (എഐഎസ്ടി) അടിസ്ഥാനത്തിലാണ് അഡ്മിഷൻ.
കംപ്യൂട്ടർ അധിഷ്ഠിത പ്രവേശന പരീക്ഷയാണ് എഐഎസ്ടി. ഏപ്രിൽ 15 നകം ഓൺലൈനായി അപേക്ഷിക്കണം. ജൂൺ അഞ്ചിന് ഫലം പ്രഖ്യാപിക്കും. കൊച്ചി ഉൾപ്പെടെയുള്ള കേന്ദ്രങ്ങളിലാണു പ്രവേശന പരീക്ഷ. നാലു സെന്‍ററുകൾ വരെ തെരഞ്ഞെടുക്കാം. അപേക്ഷാ ഫീസ് 500 രൂപ.
കോഴ്സുകൾ
കോർപറേറ്റ് മേഖലയിൽ നിരവധി തൊഴിലവസരങ്ങൾ വാഗ്ദാനം ചെയ്യുന്ന ബിരുദ, ബിരുദാനന്തര ബിരുദ, മാനേജ്മെന്‍റ് കോഴ്സുകളാണ് എഫ്ഡിഡിഐ നടത്തുന്നത്. നോയിഡ, റോഹ്ത്തക്ക്, കോൽക്കത്ത, ചെന്നൈ, ഫർസ്തഗഞ്ജ് (ലക്നോയ്ക്കു സമീപം), ജോധ്പുർ, ഗുണ, ചിന്ദ്‌വാര, അങ്കലേശ്വർ, ഹൈദരാബാദ്, ചണ്ഡിഗഡ്, പാറ്റ്ന എന്നിവിടങ്ങളിലെ കാമ്പസുകളിലാണു കോഴ്സുകൾ നടത്തുന്നത്.
രണ്ടു വർഷത്തെ മാസ്റ്റർ ഡിഗ്രി പ്രോഗ്രാമുകൾ: എംബിഎ (ഫാഷൻ മർച്ചൻഡൈസിംഗ് ആൻഡ് റീയെിൽ മാനേജ്മെന്‍റ്), എംബിഎ (ഫുട്‌വേർ ഡിസൈൻ ആൻഡ് പ്രൊഡക്ഷ ൻ മാനേജന്‍റ്), എം ഡിസൈൻ ബിരുദധാരികൾക്ക് അപേക്ഷിക്കാം.
നാലു വർഷത്തെ ബിരുദ പ്രോഗ്രാമുകൾ: ഫുട്‌വേർ ഡിസൈൻ ആൻഡ് പ്രൊഡക്ഷൻ മാനേജ്മെന്‍റ്, റീട്ടെയിൽ ആൻഡ് ഫാഷൻ മെർക്കൻഡൈസിംഗ്, ലതർ ഗുഡ്സ് ആൻഡ് അസസറീസ് ഡിസൈൻ, ഫാഷൻ ഡിസൈൻ, ബിബിഎറീട്ടെയിൽ ആൻഡ് ഫാഷൻ മർച്ചൻഡൈസിംഗ്. അപേക്ഷിക്കാനുള്ള യോഗ്യത പ്ലസ്ടു.
അവസാന വർഷ പരീക്ഷ എഴുതുന്നവർക്കും അപേക്ഷിക്കാം. പ്രായം 2020 ജൂലൈ ഒന്നിന് 25 വയസ് കവിയരുത്. ബിരുദാനന്തര ബിരുദ കോഴ്സുകൾക്ക് പ്രായപരിധി ഇല്ല.
പ്രവേശന പരീക്ഷ
രണ്ടര മണിക്കൂർ ദൈർഘ്യമുള്ളതാണു പ്രവേശന പരീക്ഷ. ക്വാണ്ടിറ്റേറ്റീവ് ആപ്റ്റിറ്റ്യൂഡ്, വെർബൽ എബിലിറ്റി, ജനറൽ അവയർനെസ്, ബിസിനസ് ആപ്റ്റിറ്റ്യൂഡ് എന്നീ മേഖലകളിൽ നിന്നുള്ള 200 മാർക്കിന്‍റെ ചോദ്യങ്ങളാണ് ബിരുദ കോഴ്സിനുള്ള എഐഎസ്ടിയിൽ ഉൾപ്പെടുത്തിയിരിക്കുന്നത്. ബിരുദാനന്തര ബിരുദ കോഴ്സിന് ക്വാണ്ടിറ്റേറ്റീവ് ആപ്റ്റിറ്റ്യൂഡ് ആൻഡ് റീസണിംഗ്, ഇംഗ്ലീഷ്, ജനറൽ അവയർനെസ്, ബിസിനസ് ആപ്റ്റിറ്റ്യൂഡ് ടെസ്റ്റ് എന്നിവയാണ് ഉൾപ്പെടുത്തിയിരിക്കുന്നത്. ഒരാൾക്ക് ഒന്നിലധികം പ്രോഗ്രാമുകൾക്ക് അപേക്ഷിക്കാം. ബിരുദ കോഴ്സുകൾക്കും ബിരുദാനന്തര ബിരുദ കോഴ്സുകൾക്കും അപേക്ഷിക്കുന്നവർ പ്രത്യേകം അപേക്ഷ സമർപ്പിക്കണം. അപേക്ഷാ ഫീസ് 500 രൂപ.
ടെസ്റ്റ് സെന്‍ററുകൾ: കൊച്ചി, ആഗ്ര, അലഹാബാദ്, ബാംഗളൂരു, ബറേലി, ഭുവനേശ്വർ, ചണ്ഡിഗഡ്, ചെന്നൈ, ചിന്ദ്‌വാര, ഡെറാഡൂണ്‍, ഡൽഹി, ഫരീദാബാദ്, റായ്ബറേലി, ഗാസിയാബാദ്, ഗോരഖ്പുർ, ഗുഡ്ഗാവ്, ഹൈദരാബാദ്, ഇൻഡോർ, ജയ്പുർ, ജലന്തർ, ജംഷഡ്പുർ, കാണ്‍പുർ, കോൽക്കത്ത, ലക്നോ, മീററ്റ്, മുംബൈ, നോയിഡ, പാറ്റ്ന, റാഞ്ചി, റോഹ്ത്തക്, ജോധ്പുർ, ജബൽപുർ, ഗ്വാളിയർ. അപേക്ഷകർക്കു നാലു കേന്ദ്രങ്ങൾ വരെ തെരഞ്ഞെടുക്കാം. വിലാസം: അഡ്മിഷൻ സെൽ, ഫുട് വേർ ഡിസൈൻ ആൻഡ് ഡെവലപ്മെന്‍റ് ഇൻസ്റ്റിറ്റ്യൂട്ട്, എ10/ എ, സെക്ടർ 24,നോയിഡ201301.വെബ്സൈറ്റ്: www.fddiindia.com.