തൊഴിലധിഷ്ഠിത വിദ്യാഭ്യാസത്തിന് ഐടിഐ
ഡോ. ഡെയ്സൺ പാണേങ്ങാടൻ
പഠനത്തിൽ ശരാശരി നിലവാരമുള്ളവർക്കും കൈത്തൊഴിൽ പഠിച്ച് എത്രയും പെട്ടെന്ന് സർട്ടിഫിക്കറ്റോടെ ജോലിമേഖലയിൽ പ്രവേശിക്കാൻ ആഗ്രഹിക്കുന്നവർക്കും മുൻപിലുള്ള വലിയ സാധ്യതയാണ് നാഷണൽ കൗൺസിൽ ഫോർ വൊക്കേഷണൽ ട്രെയിനിംഗ് ലഭ്യമാകുന്ന ഐടിഐകൾ.
സർക്കാർ മേഖലയിലും സ്വാശ്രയ മേഖലയിലുമാണ് ഭൂരിഭാഗം ഐടിഐകളും പ്രവർത്തിക്കുന്നത്. ഒരു വർഷവും രണ്ടു വർഷവുമുള്ള ഡിപ്ലോമ കോഴ്സുകളാണ് ഇവയിലെ മുഖ്യ ആകർഷണം. ഒന്നോ രണ്ടോ വർഷം കൊണ്ടുതന്നെ വൈവിധ്യമാർന്ന വിവിധ കോഴ്സുകളിൽ ഡിപ്ലോമയ്ക്കുളള സാധ്യതയുള്ളതുകൊണ്ട്, സാധാരണക്കാർക്കിടയിൽ വലിയ ഡിമാൻഡാണ് ഐടിഐയിലെ പ്രവേശനത്തിനുള്ളത്.
രണ്ടു വർഷത്തെ ഐടിഐ ഡിപ്ലോമ പൂർത്തീകരിച്ചവർക്ക് രണ്ടാം വർഷ പോളിടെക്നിക് കോളജുകളിലേക്ക് ലാറ്ററൽ എൻട്രി വഴി പ്രവേശനം തേടാവുന്നതുമാണ്.
പ്ലംബർ, വെൽഡർ, ഇലക്ട്രീഷൻ, ഫിറ്റർ, കാർപെന്റർ, ആർക്കിടെക്ചറൽ അസിസ്റ്റന്റ്, ഡ്രസ് മെയ്ക്കിംഗ്, ഇലക്ട്രോണിക് മെക്കാനിക്, ലബോറട്ടറി അസിസ്റ്റന്റ്, ഫാഷൻ ടെക്നോളജി, ഹെയർ ആൻഡ് സ്കിൻ കെയർ, ലിഫ്റ്റ് മെക്കാനിക്, സർവേയർ തുടങ്ങി വിവിധ ഡിപ്ലോമ കോഴ്സുകൾ ലഭ്യമാണ്.
അപേക്ഷാ രീതി
സംസ്ഥാനത്തെ വിവിധ സർക്കാർ ഐടിഐകളിലെ ഡിപ്ലോമ കോഴ്സുകളിലേക്കുള്ള പ്രവേശനം ഏകജാലക രീതിയിലാണ്. ഒരു ജില്ലയിലെ എല്ലാ സർക്കാർ ഐടിഐകളിലേക്കും ഒരൊറ്റ അപേക്ഷ സമർപ്പിച്ചാൽ മതിയാകും. എന്നാൽ, പ്രൈവറ്റ് ഐടിഐകളിൽ സ്ഥാപനം നേരിട്ടാണ് പ്രവേശന നടപടിക്രമങ്ങൾ നിയന്ത്രിക്കുന്നത്.