ബ്രിട്ടനു മികവിന്റെ വാഗ്ദാനവുമായി തെരേസാ മേ
Tuesday, July 12, 2016 8:22 AM IST
ലണ്ടൻ: നിയുക്‌ത പ്രധാനമന്ത്രി തെരേസാ മേ ബ്രിട്ടനു നൽകുന്നത് കൂടുതൽ മികവിന്റെ വാഗ്ദാനങ്ങൾ. യൂറോപ്യൻ യൂണിയനിൽ നിന്നുള്ള പുറത്തുപോക്ക് വിജയമാക്കുമെന്നൊരു ഉറപ്പു കൂടി അവർ നൽകുന്നു.

ബുധനാഴ്ച മേ പ്രധാനമന്ത്രിയായി സത്യപ്രതിജ്‌ഞ ചെയ്തു അധികാരമേൽക്കും.

ഡേവിഡ് കാമറോണിന്റെ പിൻഗാമിയായി തെരഞ്ഞെടുക്കപ്പെടുമ്പോൾ താൻ ആദരിക്കപ്പെടുകയും വിനയാന്വിതയാകുകയും ചെയ്യുന്നതായി പാർലമെന്റിനു മുന്നിൽ തെരേസ പറഞ്ഞു.

കാമറോൺ ബുധനാഴ്ച രാജ്‌ഞിക്ക് രാജിക്കത്ത് നൽകും. 2010ൽ ബ്രിട്ടീഷ് പ്രധാനമന്ത്രിയായി തെരഞ്ഞെടുക്കപ്പെട്ട കാമറോൺ, ബ്രെക്സിറ്റ് ഹിതപരിശോധനാ ഫലം തന്റെ നിലപാടിന് എതിരായ സാഹചര്യത്തിൽ രാജി പ്രഖ്യാപിക്കുകയായിരുന്നു.

ടോറി പാർട്ടി നേതൃത്വത്തിലേക്കുള്ള മത്സരത്തിൽ രണ്ടാം സ്‌ഥാനത്തുണ്ടായിരുന്ന ആൻഡ്രിയ ലീഡ്സം പിൻമാറിയതോടെയാണ് തെരേസ പാർട്ടി നേതാവും പ്രധാനമന്ത്രിയും ആകുമെന്ന് ഉറപ്പായത്. സുശക്‌തവും സുസ്‌ഥിരവുമായൊരു സർക്കാർ രൂപീകരിക്കാനുള്ള പിന്തുണ തനിക്കില്ലെന്ന പ്രഖ്യാപനത്തോടെയാണ് ആൻഡ്രിയ അപ്രതീക്ഷിതമായി മത്സരരംഗത്തുനിന്നു പിൻമാറിയത്.

2010 ൽ കാമറോൺ പ്രധാനമന്ത്രിയായതു മുതൽ ബ്രിട്ടന്റെ ഹോം സെക്രട്ടറിയാണ് മേ. പാർട്ടിയെയും രാജ്യത്തെയും കാമറോൺ ഇതുവരെ നയിച്ച രീതി മികച്ചതായിരുന്നുവെന്നും അവർ അഭിപ്രായപ്പെട്ടു. നേതൃത്വത്തിലേക്ക് തന്നോടു മത്സരിച്ച നാലു പേർക്കുമുള്ള ആദരവും അവർ അറിയിച്ചു.

<ആ>റിപ്പോർട്ട്: ജോസ് കുമ്പിളുവേലിൽ
Copyright @ 2022 , Rashtra Deepika Ltd.