ബി ഫ്രന്റ്സ് ഓണാഘോഷം സെപ്റ്റംബര്‍ മൂന്നിന്; സംഗീത വിരുന്നൊരുക്കി ജ്യോസ്നയും വിധുപ്രതാപും
Tuesday, June 28, 2016 5:39 AM IST
സൂറിച്ച്: സ്വിറ്റ്സര്‍ലന്‍ഡിലെ മലയാളികള്‍ക്കായി ബി ഫ്രന്റ്സ് ഒരുക്കുന്ന ഈ വര്‍ഷത്തെ ഓണാഘോഷം സെപ്റ്റംബര്‍ മൂന്നിനു നടക്കും. രാവിലെ 11ന് ആരംഭിക്കുന്ന ഓണാഘോഷം രാത്രി എട്ടിന് അവസാനിക്കും.

സംഗീത വിരുന്നും പതിനെട്ടില്‍ പരം കറികളും ചേര്‍ത്തുള്ള ഓണസദ്യയും കലാ സദ്യയും ഓണാഘോഷത്തിന്റെ ഭാഗമായിരിക്കും.

കലാ സദ്യയൊരുക്കുന്നത് അംഗങ്ങളും സുഹൃത്തുക്കളും ചേര്‍ന്നാണെങ്കില്‍ സംഗീത സദ്യ ഒരുക്കുന്നത് സംഗീതലോകത്തെ മിന്നും താരങ്ങളായ വിധു പ്രതാപും ജ്യോത്സനയും ചേര്‍ന്നാണ്. നൂറിലധികം കലാകാരന്മാര്‍ അണിയിച്ചൊരുക്കുന്ന കലാപരിപാടികളില്‍ നൃത്തങ്ങള്‍, സ്കിറ്റ് എന്നിവ കൂടാതെ മലയാളി മങ്കമാരണിയിച്ചൊരുക്കുന്ന തിരുവാതിരകളി എന്നിവയും ഓണാഘോഷത്തിന്റെ പ്രത്യേകതയാണ്.

ഓണപ്പൂക്കള മത്സരം, ബീ ഫ്രണ്ട്സിന്റെ മാത്രം തനതായ ഏറ്റവും നല്ല കേരളീയ വസ്ത്രധാരണത്തിനുള്ള സമ്മാനങ്ങള്‍ക്കുള്ള മത്സരവും ഇതോടൊപ്പം നടക്കും.

ഓണാഘോഷങ്ങളില്‍നിന്നു ലഭിക്കുന്ന വരുമാനം വിവിധ കാരുണ്യ പ്രവര്‍ത്തനങ്ങള്‍ക്കായിയാണു വിനിയോഗിച്ചുകൊണ്ടിരിക്കുന്നത്. എല്ലാ സ്വിസ് മലയാളികളുടെയും സഹകരണം ഇതോടൊപ്പം സംഘാടകര്‍ അഭ്യര്‍ഥിച്ചു.

ഓണാഘോഷങ്ങളുടെ ഒരുക്കങ്ങളെല്ലാം പൂര്‍ത്തിയാവുന്നതായി ഭാരവാഹികളായ പ്രസിഡന്റ് പ്രിന്‍സ് കാടൃക്കുടിയില്‍, സെക്രട്ടറി ബിന്നി വേങ്ങാപ്പള്ളില്‍, ട്രഷറര്‍ മാത്യു മണിക്കുട്ടിയില്‍, ആര്‍ട്സ് ക്ളബ്ബ് സെക്രട്ടറി ജസ്വിന്‍ പുതുമന എന്നിവരറിയിച്ചു.

റിപ്പോര്‍ട്ട്: ഷിജി ചീരംവേലില്‍
Copyright @ 2022 , Rashtra Deepika Ltd.