ജര്‍മനിയില്‍ മാന്യമായി വാഹനമോടിച്ചാല്‍ ബോണസായി പണം ലഭിക്കും : Deepika.com Nri News Europe

ബെര്‍ലിന്‍: ട്രാഫിക് നിയമം ലംഘിച്ചാല്‍ ലോകത്തില്‍ എവിടെയാണെങ്കിലും പിഴ കിട്ടും. അപ്പോള്‍, നിയമം അനുസരിക്കുന്നതിന് ഇങ്ങോട്ടു പണം കിട്ടുമോ ? കിട്ടുമല്ലോ, എവിടെയാണന്നല്ലേ ജര്‍മനിയില്‍.

ഇതുവരെ അങ്ങനെയൊരു സംവിധാനം ജര്‍മനിയില്‍ ഇല്ലായിരുന്നു. എന്നാല്‍, ഒരു ജര്‍മന്‍ ഇന്‍ഷ്വറന്‍സ് കമ്പനി ഇപ്പോള്‍ വാഗ്ദാനം ചെയ്യുന്നത് അതു തന്നെയാണ്. നന്നായി വാഹനമോടിക്കുന്നവര്‍ക്ക് അതായത് ട്രാഫിക് നിയമം അപ്പടി സ്വീകരിച്ച് വാഹനമോടിച്ചാല്‍ കാര്‍ ഇന്‍ഷ്വറന്‍സില്‍ നിശ്ചിത തുക തിരിച്ചു കിട്ടും.

ബോണസ് ഡ്രൈവ് എന്ന ആപ്ളിക്കേഷനിലൂടെയാണ് പദ്ധതി നടപ്പാക്കുന്നത്. ഡ്രൈവര്‍മാരുടെ ആക്സിലറേഷന്‍ രീതിയും വളവുകള്‍ തിരിയുന്ന രീതിയും പൊതുവിലുള്ള വേഗവും വേഗത്തിലെ ഏറ്റക്കുറച്ചിലുകളുമെല്ലാം പരിഗണിച്ചാണ് എത്ര സുരക്ഷിതമായാണ് വാഹനം ഓടിക്കുന്നതെന്നു നിര്‍ണയിക്കുക. അതും കൃത്യമായി നിര്‍ണയിച്ചിരിക്കും.

ഏറ്റവും ഉയര്‍ന്ന ഇന്‍ഷ്വറന്‍സ് പ്രീമിയം അടയ്ക്കേണ്ടിവരുന്ന, 28 വയസിനു താഴെ പ്രായമുള്ളവരെയാണ് ഈ ആപ്പ് പ്രധാനമായും ആകര്‍ഷിക്കാന്‍ ശ്രമിക്കുന്നത്. നൂറു കിലോമീറ്റര്‍ സുരക്ഷിതമായി വാഹനമോടിച്ചെന്ന് ആപ്പിനു ബോധ്യമായാല്‍ ഇന്‍ഷ്വറന്‍സ് പ്രീമിയത്തില്‍ പത്തു ശതമാനം കുറവാണ് വാഗ്ദാനം ചെയ്യുന്നത്.

വര്‍ഷാവസാനം ആകെ റേറ്റിംഗ് എടുത്ത് ഗോള്‍ഡ് ഡ്രൈവര്‍ കാറ്റഗറിയില്‍ വരുന്നവര്‍ക്ക് മുപ്പതു ശതമാനം കൂടി ഇളവു നല്‍കും. സില്‍വര്‍ ഡ്രൈവര്‍മാര്‍ക്ക് ഇരുപതു ശതമാനവും ബ്രോണ്‍സ് ഡ്രൈവര്‍മാര്‍ക്ക് മറ്റൊരു പത്തു ശതമാനവും കൂടി ഇളവ്. കാര്യം എന്തായാലും നല്ലതെന്നാണ് പൊതുവെ ഉയര്‍ന്ന അഭിപ്രായം.

പ്രത്യേകിച്ച് യുവജനങ്ങളിലെ അലക്ഷ്യവും അലസ്യവുമായ ഡ്രൈവിംഗ് ശീലം മാറ്റാന്‍ ഇതുപകരിക്കുമെന്നും വിദഗ്ധര്‍ കണക്കുകൂട്ടുന്നു.

റിപ്പോര്‍ട്ട്: ജോസ് കുമ്പിളുവേലില്‍