കൊളോണ്‍: കൊളോണിലെ ഇന്ത്യന്‍ കമ്യൂണിറ്റിയുടെ മധ്യസ്ഥയായ പരിശുദ്ധ ദൈവമാതാവിന്റെ മുപ്പത്തിയഞ്ചാമത്തെ തിരുനാളിനും കൂട്ടായ്മ ദിനത്തിനും ജൂണ്‍ 13 നു (ശനി) വൈകുന്നേരം അഞ്ചിനു തുടക്കം കുറിക്കും.
ലദീഞ്ഞ്, നൊവേന എന്നിവയ്ക്കു ശേഷം പ്രസുദേന്തി ജോസ് മറ്റത്തില്‍ കൊടിയും വഹിച്ച് മുത്തുക്കുടയേന്തിയ മുന്‍പ്രസുദേന്തിമാരുടെ അകമ്പടിയില്‍ ആഘോഷമായ പ്രദക്ഷിണത്തോടുകൂടി കൊടിയേറ്റം നടത്തും. കൊളോണ്‍ മ്യൂള്‍ഹൈമിലെ ലീബ് ഫ്രൌവന്‍ ദേവാലയത്തിലാണ് (ഞലഴലിലിേൃമലൈ 4, 51063, ഗöഹി) ആഘോഷ പരിപാടികള്‍.
ജൂണ്‍ 14നു(ഞായര്‍) തിരുനാളിന്റെ മുഖ്യപരിപാടികള്‍. രാവിലെ 10ന് ആഘോഷമായ തിരുനാള്‍ കുര്‍ബാന, പ്രസംഗം (ഡീക്കന്‍ ഹാന്‍സ് ഗേര്‍ഡ് ഗ്രേവല്‍ഡിംഗ്) പ്രസുദേന്തി വാഴ്ച, നഗരം ചുറ്റിയുള്ള പ്രദക്ഷിണം, നേര്‍ച്ചവിളമ്പ്, ഉച്ചഭക്ഷണം, ലോട്ടറി നറുക്കെടുപ്പ് എന്നിവയ്ക്കു പുറമേ ഉച്ചകഴിഞ്ഞ് രണ്ടിന് ആരംഭിക്കുന്ന കലാപരിപാടികള്‍ക്കൊപ്പം സമാപന സമ്മേളനവും നടക്കും.
തിരുനാളിന്റെ സുഗമമായ നടത്തിപ്പിനുവേണ്ടി നൂറ്റിമുപ്പതോളം അംഗങ്ങളുള്ള വിവിധ കമ്മിറ്റികളും പ്രവര്‍ത്തിക്കുന്നു.
ജര്‍മനിയിലെ കൊളോണ്‍, എസന്‍, ആഹന്‍ എന്നീ രൂപതകളിലെ ഇന്ത്യക്കാരുടെ കൂട്ടായ്മയാണ് കൊളോണിലെ ഇന്ത്യന്‍ കമ്യൂണിറ്റി. കൊളോണ്‍ കര്‍ദിനാളിന്റെ കീഴിലുള്ള ഇന്ത്യന്‍ കമ്യൂണിറ്റിയുടെ പ്രവര്‍ത്തനം 1969 ലാണ് ആരംഭിച്ചത്. ഏതാണ്ട് എഴുനൂറ്റിയന്‍പതിലേറെ കുടുംബങ്ങള്‍ കമ്യൂണിറ്റിയില്‍ അംഗങ്ങളായുണ്ട്. ഇന്ത്യന്‍ സമൂഹത്തിന്റെ ചാപ്ളെയിനായി ഫാ.ഇഗ്നേഷ്യസ് ചാലിശേരി സിഎംഐ കഴിഞ്ഞ പതിനാലു വര്‍ഷമായി സേവനം അനുഷ്ടിക്കുന്നു.
കണ്ണൂര്‍, പേരാവൂര്‍ സ്വദേശി ജോസ് മറ്റത്തില്‍ ആണ് ഈ വര്‍ഷത്തെ പ്രസുദേന്തി. ഭാര്യ: അച്ചാമ്മ. അനിജ, അജിന എന്നിവര്‍ മക്കളാണ്. തിരുനാളിലേക്കും തിരുക്കര്‍മങ്ങളിലേക്കും ഏവരെയും സ്വാഗതം ചെയ്തു.
വിവരങ്ങള്‍ക്ക്: ഫാ. ഇഗ്നേഷ്യസ് ചാലിശേരി സിഎംഐ 0221 629868, 01789353004, ഡേവീസ് വടക്കുംചേരി (കണ്‍വീനര്‍) 0221 5904183, ജോസ് മറ്റത്തില്‍ (പ്രസുദേന്തി) 02173 420915.
വെബ്സൈറ്റ്: വു://ംംം.ശിറശരെവലഴലാലശിറല.റല
റിപ്പോര്‍ട്ട്: ജോസ് കുമ്പിളുവേലില്‍