നൊയസ് മലയാളം സ്കൂള്‍ തിരുവോണം ആഘോഷിച്ചു : Deepika.com Nri News Europe

നൊയസ്: മധ്യജര്‍മന്‍ നഗരമായ നൊയസിലെ മലയാളം സ്കൂളിന്റെ ആഭിമുഖ്യത്തില്‍ തിരുവോണം ആഘോഷിച്ചു. സെപ്റ്റംബര്‍ 14 ന് ഡോര്‍മാഗനിലെ ജോഹനസ് ദേവാലയ ഹാളില്‍ ഒരുക്കിയ ഓണാഘോഷം ജര്‍മനിയിലെ രണ്ടാം തലമുറയില്‍പെട്ട കുട്ടികള്‍ക്ക് ആഹ്ളാദവും കൌതുകവും പകര്‍ന്നു.

മുഖ്യാതിഥികളായ ഫാ.സേവി മാടപ്പിള്ളി, ഫാ. ഫിലിപ്പ് കാരികൂട്ടത്തില്‍ എന്നിവര്‍ക്കു പുറമെ സ്കൂള്‍ കമ്മിറ്റി അംഗങ്ങളും ചേര്‍ന്ന് ഭദ്രദീപം തെളിച്ച് ആഘോഷ പരിപാടികള്‍ ഉദ്ഘാടനം ചെയ്തു.

സ്കൂളിലെ കുട്ടികളുടെ വൈവിധ്യങ്ങള്‍ നിറഞ്ഞ ആവേശകരമായ ഓണക്കളികളും സ്കൂള്‍ അംഗങ്ങള്‍ കൊണ്ടുവന്ന പച്ചക്കറികളുടെ വാശിയേറിയ ലേലം വിളിയും ഓണാഘോഷത്തിന് മാറ്റുകൂട്ടി.

പുലികളിയുടെയും ചെണ്ടമേളത്തിന്റെയും താലപ്പൊലിയേന്തിയ മങ്കമാരുടെയും അകമ്പടിയോടെ മാവേലിയെ വരവേറ്റു. തിരുവാതിര, കുട്ടികളുടെ വിവിധ നൃത്തങ്ങള്‍, പാട്ടുകള്‍, ഫാഷന്‍ ഷോ, ആശംസാപ്രസംഗം, സ്കെച്ചുകള്‍, നാടന്‍ കോല്‍ക്കളി തുടങ്ങിയവ ആഘോഷത്തെ കമനീയമാക്കി.

കമ്മിറ്റി പ്രസിഡന്റ് സണ്ണി പുത്തന്‍പുരയ്ക്കല്‍ സ്വാഗതം ആശംസിച്ചു. അജിതാ സൈലേഷ്, ജെസി വെന്റ്സ്ളാഫ് എന്നിവര്‍ നന്ദി പറഞ്ഞു. ഓണത്തിന്റെ തനതായ ശൈലിയില്‍ കേരളീയ പാരമ്പര്യത്തില്‍ നിലത്തിരുന്ന് തൂശനിലയില്‍ വിളമ്പിയ രുചികരമായ ഓണസദ്യ ഉണ്ണാന്‍ കുട്ടികള്‍ക്ക് ഏറെ ഉല്‍സാഹമായിരുന്നു. നിലത്തിരുന്നുള്ള ഓണസദ്യ ജര്‍മനിയില്‍ തന്നെ ഇതാദ്യമാണ്. കുട്ടികളില്‍ ഏറെ കൌതുകമുണര്‍ത്തിയ ഇത്തരം പാരമ്പര്യചട്ടങ്ങള്‍ പുതുതലമുറയ്ക്ക് പരിചയപ്പെടുത്താനും മലയാളം സ്കൂളിന്റെ സംഘാടകര്‍ക്ക് കഴിഞ്ഞു. ഓണസദ്യയോടെ പരിപാടികള്‍ അവസാനിച്ചു.

നോയ്സില്‍ എല്ലാ വെള്ളിയാഴ്ചയും നടത്തുന്ന മലയാളം സ്കൂളിന്റെ അധ്യാപകരായി മേരി ജെയിംസ്, അജിപ്രസാദ് മണ്ണില്‍ എന്നിവര്‍ നിസ്വാര്‍ഥ സേവനം ചെയ്യുന്നു. സണ്ണി പുത്തന്‍പുരയ്ക്കല്‍, ഗ്രേസി പുത്തന്‍പുരയ്ക്കല്‍, അജിതാ സൈലേഷ്, ജെസി വെന്റ്സ്ളാഫ് എന്നിവരാണ് ഇപ്പോഴത്തെ സ്കൂള്‍ കമ്മിറ്റിയംഗങ്ങള്‍.

റിപ്പോര്‍ട്ട്: ജോസ് കുമ്പിളുവേലില്‍