ബുദ്ധമത സമ്മേളനത്തില്‍ ദലൈലാമ; ഇന്ത്യക്കു ചൈനയുടെ മുന്നറിയിപ്പ്
Monday, March 20, 2017 5:54 PM IST
ബെയ്ജിംഗ്: ബുദ്ധമത സമ്മേളനത്തിലേക്കു ദലൈലാമയെ ക്ഷണിച്ചതില്‍ എതിര്‍പ്പുമായി ചൈന. നയതന്ത്രബന്ധങ്ങളിൽ ഉലച്ചിൽ തട്ടാതിരിക്കാൻ അടിസ്ഥാന വിഷയങ്ങൾക്കു എതിരായി പ്രവർത്തിക്കുന്നത് അവസാനിപ്പിക്കണമെന്നാണ് ചൈനയുടെ ആവശ്യം. ബിഹാറിൽ നടന്ന അന്താരാഷ്ട്ര ബുദ്ധമത സെമിനാറിൽ പങ്കെടുക്കുന്നതിനു വേണ്ടിയാണ് 14മത് ദലൈലാമ ബിഹാറിലെത്തിയത്.

അടുത്തിടെ, ചൈനയുടെ ശക്തമായ എതിർപ്പുകൾ അവഗണിച്ച്, അന്താരാഷ്ട്ര ബുദ്ധമത സെമിനാറിൽ പങ്കെടുക്കാൻ ഇന്ത്യ ദലൈലാമയെ ക്ഷണിച്ചു. ഈ നീക്കത്തിൽ ചൈനയ്ക്കു ശക്തമായ എതിർപ്പും അതൃപ്തിയുമുണ്ട്. ദലൈ ഗ്രൂപ്പിന്‍റെ ശക്തമായ ചൈന വിരുദ്ധ നടപടികളെ ഇന്ത്യ കണക്കിലെടുക്കുകയും ടിബറ്റിനോടുള്ള പ്രതിബദ്ധത കാത്തുസൂക്ഷിക്കുകയും ചെയ്യണം- ചൈനീസ് വിദേശകാര്യ വക്താവ് ഹുവ ചുൻയിങ് പറഞ്ഞു.

81കാരനായ ദലൈലാമയാണ് അന്താരാഷ്ട്ര ബുദ്ധമത സെമിനാർ ഉദ്ഘാടനം ചെയ്തത്. മാർച്ച് 17നായിരുന്നു നളന്ദയിൽ പരിപാടി സംഘടിപ്പിച്ചത്. ബുദ്ധമതത്തെക്കുറിച്ച് പ്രഭാഷണം നടത്തുന്നതിനായി ലോകത്തിന്‍റെ വിവിധ ഭാഗങ്ങളിൽനിന്നുള്ള ബുദ്ധ സന്യാസിമാരും പണ്ഡിതരും എത്തിയിരുന്നു.