‘ഭൈരവ’ തീയറ്ററുകളിൽ; എക്സിബിറ്റേഴ്സ് ഫെഡറേഷന്റെ തീയറ്ററുകൾ അടഞ്ഞുകിടക്കുന്നു
Thursday, January 12, 2017 12:13 AM IST
കൊച്ചി: തീയറ്റർ വിഹിതം ഉയർത്തണമെന്ന ആവശ്യത്തെ തുടർന്ന് ഉടലെടുത്ത സിനിമാ പ്രതിസന്ധി മാറ്റമില്ലാതെ തുടരുന്നതിനിടെ സംസ്‌ഥാനത്തെ തീയറ്ററുകളിൽ ഇന്നു പുതിയ റിലീസ് ചിത്രമെത്തി. വിജയ് ചിത്രമായ ഭൈരവയാണ് ഇന്നു റിലീസ് ചെയ്തത്. സംസ്‌ഥാനത്തെ 206 ഓളം തീയറ്ററുകളിലാണ് ചിത്രം റിലീസ് ചെയ്തത്. മാളുകളിലും നിർമാതാക്കളുടെയും വിതരണക്കാരുടെയും തീയറ്ററുകളിലും സർക്കാരിന്റെ ഉടമസ്‌ഥതയിലുള്ള തീയറ്ററുകളും എക്സിബിറ്റേഴ്സ് ഫെഡറേഷനിൽ അംഗങ്ങളല്ലാത്ത എ ക്ലാസ് തീയറ്ററുകകളിലുമാണ് ഭൈരവ റിലീസ് ചെയ്തിരിക്കുന്നത്. എക്സിബിറ്റേഴ്സ് ഫെഡറേഷനിൽ അംഗങ്ങളായ ഒൻപതു തീയറ്ററുകളിലും ചിത്രം റിലീസ് ചെയ്തിട്ടുണ്ട്.

അതേസമയം, ഫിലിം എക്സിബിറ്റേഴ്സ് ഫെഡറേഷൻ അംഗങ്ങളായ എ ക്ലാസ് തീയറ്ററുകൾ ഇന്ന് മുതൽ അടച്ചിട്ടിരിക്കുകയാണ്. ഫെഡറേഷനിൽ അംഗങ്ങളായ സംസ്‌ഥാനത്തെ 350 തീയറ്ററുകളിൽ 341 തീയറ്ററുകളാണ് അടഞ്ഞു കിടക്കുന്നത്. നിർമാതാക്കൾക്കും വിതരണക്കാർക്കും തങ്ങളുടെ ഈ ഒമ്പതു തീയറ്ററുകരെ മാത്രമേ സ്വാധീനിക്കാൻ സാധിച്ചുള്ളൂവെന്നും അതിനാൽ തങ്ങളുടെ അടച്ചിടൽ സമരം വിജയമാണെന്നുമാണ് എക്സിബിറ്റേഴ്സ് ഫെഡറേഷൻ പ്രസിഡന്റ് ലിബർട്ടി ബഷീർ പറയുന്നത.് എന്നാൽ, ഫെഡറേഷന്റെ കീഴിലുള്ള 30 ഓളം തീയറ്ററുകൾ തങ്ങളോടൊപ്പമുണ്ടെന്ന് വിതരണക്കാരും നിർമാതാക്കളും അവകാശപ്പെട്ടു. ഈ തീയറ്ററുകളിലും ഭൈരവ ഉടൻ റിലീസ് ചെയ്യുമെന്ന് വിതരണക്കാരുടെ സംഘടനയായ ഫിലിം ഡിസ്ട്രിബ്യൂട്ടേഴ്സ് അസോസിയേഷൻ ജനറൽ സെക്രട്ടറി എം.എം.ഹംസ പറഞ്ഞു.

എ, ബി, സി ക്ലാസ് വേർതിരിവ് ഇല്ലാതെയാണ് ഭൈരവയുടെ റിലീസ് ചെയ്തിരിക്കുന്നത്. അതേസമയം, ഇന്നു റിലീസ് ചെയ്യുമെന്ന് നേരത്തെ അറിയിച്ചിരുന്ന കംബോജിയുടെ റിലീസ് രണ്ടാഴ്ചത്തേക്കു മാറ്റിവച്ചിരിക്കുകയാണ്്. മലയാള സിനിമകൾ 19 മുതൽ റിലീസ് ചെയ്യാനാണ് നിർമാതാക്കളുടെയും വിതരണക്കാരുടെയും തീരുമാനം. അന്ന് ഏതൊക്കെ ചിത്രങ്ങളാണ് റിലീസ് ചെയ്യുന്നതെന്ന് പിന്നീട് തീരുമാനിക്കും.

റിലീസിംഗ് തീയറ്ററുകൾ നിശ്ചയിക്കുന്നതിന് നിർമാതാക്കളും വിതരണക്കാരും അംഗങ്ങളായ കോർ കമ്മറ്റി രൂപികരിക്കാൻ ബുധനാഴ്ച ചേർന്ന യോഗത്തിൽ ഇവർ തീരുമാനമെടുത്തിരുന്നു. ഭാവിയിൽ ഈ കമ്മറ്റിക്കായിരിക്കും സിനിമ റിലീസ് ചെയ്യേണ്ട തീയറ്ററുകളെ നിശ്ചയിക്കാനുള്ള അധികാരം. ഇന്നു റിലീസ് ചെയ്യാത്ത തീയറ്ററുകൾക്ക് ഇനി സിനിമകൾ റിലീസിന് നൽകണമോ എന്ന കാര്യവും ഈ കമ്മറ്റിയായിരിക്കും പരിഗണിക്കുക. ഈ കമ്മറ്റിയിലേക്കുള്ള അംഗങ്ങളുടെ തെരഞ്ഞെടുപ്പ് ഉടൻ നടക്കുമെന്നാണ് സൂചന.

നിലവിലുള്ള 60–40 തീയറ്റർ വിഹിതം അംഗീകരിക്കുന്ന തീയറ്റർ ഉടമകളുമായി വിതരണക്കാരും നിർമാതാക്കളും സഹകരിക്കും. കൂടെ നിൽക്കുന്ന തീയേറ്റർ ഉടമകളെ എന്തു വില കൊടുത്തും സംരക്ഷിക്കുമെന്നും ഭാവിയിൽ സിനിമ റിലീസിംഗിൽ ഇവരുടെ തീയേറ്ററുകൾ മുൻഗണന നൽകാനുമാണ് വിതരണക്കാരുടെയും നിർമാതാക്കളഉടെയും തീരുമാനം.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.