നടന്‍ ഷെയ്ന്‍ നിഗം സമൂഹ മാധ്യമങ്ങളില്‍ പങ്കുവെച്ച ഏറ്റവും പുതിയ ചിത്രവും അതിന് നല്‍കിയ തലക്കെട്ടുമാണ് ഇപ്പോൾ വൈറലായിരിക്കുന്നത്. തലയില്‍ കഫിയ ധരിച്ച ചിത്രത്തിനൊപ്പം 'സുഡാപ്പി ഫ്രം ഇന്ത്യ' എന്ന തലക്കെട്ടാണ് താരം നല്‍കിയത്.
ചിത്രം ഇന്‍സ്റ്റഗ്രാം സ്റ്റോറിയായിട്ടാണ് താരം പങ്കുവച്ചത്. രാഷ്ട്രീയ - സാമൂഹിക വിഷയങ്ങളിൽ അഭിപ്രായം തുറന്നുപറയുന്ന വ്യക്തിയാണ് ഷെയ്ന്‍. കഴിഞ്ഞ ദിവസം റഫായില്‍ ഇസ്രായേല്‍ നടത്തിയ കൂട്ടക്കുരുതിക്കെതിരേ എല്ലാ കണ്ണുകളും റഫായിലേക്ക് എന്ന പോസ്റ്റ് ഷെയ്ന്‍ പങ്കുവച്ചിരുന്നു.
ഇതിനെതിരേയും നിരവധി അനുകൂലവും പ്രതികൂലവുമായ കമന്‍റുകൾ വന്നിരുന്നു. പിന്നാലെയാണ് ഇതിന് മറുപടിയെന്നോണം ഷെയ്നിന്‍റെ പുതിയ ചിത്രം.
നിലപാടുകൾ തുറന്നുപറയുന്ന ഷെയ്നിനെതിരേ പലപ്പോഴും വലിയ രീതിയിലുള്ള സൈബർ ആക്രമണങ്ങൾ ഉണ്ടാകാറുണ്ട്.
ഇസ്രയേൽ നരഹത്യ തുടരുന്നതിനിടെ പലസ്തീൻ ജനതയ്ക്ക് ഐക്യദാർഢ്യവുമായി ദുൽഖർ സൽമാനും ബേസില്‍ ജോസഫും അടക്കം ഒട്ടേറെ താരങ്ങളും സിനിമാ പ്രവര്‍ത്തകരും കഴിഞ്ഞ ദിവസം രംഗത്തെത്തിയിരുന്നു.
റഫായിലെ ഇസ്രായേൽ അതിക്രമങ്ങളുടെ പശ്ചാത്തലത്തിലാണ് താരങ്ങളുടെ ഐക്യദാർഢ്യം. എല്ലാ കണ്ണും റഫായിലേക്കെന്ന ഇൻസ്റ്റഗ്രാം സ്‌റ്റോറി കാംപയിനിൽ ഇവരും പങ്കുചേരുകയായിരുന്നു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.