പീഡനക്കേസില്‍ പ്രതിയായ പ്രൊഡക്ഷന് കണ്ട്രോളര് തിരുവനന്തപുരം സ്വദേശി ഷാനു ഇസ്മായിലിനെ മരിച്ച നിലയില്‍ കണ്ടെത്തിയ സംഭവത്തില്‍ ഇദേഹത്തിനൊപ്പം ഹോട്ടലില്‍ ഉണ്ടായിരുന്ന രണ്ട് സുഹൃത്തുക്കളുടെ മൊഴി ഇന്നെടുക്കും.
രണ്ട് സുഹൃത്തുക്കളോട് മൊഴിയെടുക്കുന്നതിന് ഹാജരാകാനായി അറിയിച്ചിട്ടുണ്ടെന്ന് എറണാകുളം സെന്‍ട്രല്‍ പോലീസ് ഇന്‍സ്‌പെക്ടര്‍ അനീഷ് ജോയി പറഞ്ഞു. ഇന്‍ക്വസ്റ്റ് നടപടികള്‍ പൂര്‍ത്തിയായി മൃതദേഹം പോസ്റ്റുമോര്‍ട്ടത്തിനായി എറണാകുളം ജനറല്‍ ആശുപത്രി മോര്‍ച്ചറിയിലേക്ക് മാറ്റി. പോസ്റ്റുമോര്‍ട്ടത്തിനുശേഷം മൃതദേഹം ബന്ധുക്കള്‍ക്ക് വിട്ടുകൊടുക്കും.
ഇന്നലെയാണ് എംജി റോഡിലെ ഹോട്ടലിന്‍റെ കുളിമുറിയില്‍ ഷാനു ഇസ്മായിലിനെ മരിച്ച നിലയില്‍ കണ്ടെത്തിയത്. കമിഴ്ന്നു കിടക്കുന്ന നിലയിലായിരുന്നു മൃതദേഹം. ഈ മാസം 11 നായിരുന്നു രണ്ടു സുഹൃത്തുക്കള്‍ക്കൊപ്പം ഷാനു ഹോട്ടലില്‍ മുറിയെടുത്തത്.
രണ്ടു ദിവസം മുന്‍പ് ഒപ്പമുണ്ടായിരുന്ന സുഹൃത്തുക്കള്‍ മുറിയൊഴിഞ്ഞു പോയിരുന്നു. ഇന്നലെ ഷാനുവിനെ പുറത്തു കാണാത്തതിനെ തുടര്‍ന്നു ജീവനക്കാര്‍ നടത്തിയ പരിശോധനയിലാണ് വൈകിട്ട് മൂന്നോടെ മരിച്ച നിലയില്‍ കണ്ടെത്തിയത്.
തിരുവനന്തപുരം സ്വദേശിയായ നടിയുടെ പരാതിയില്‍ ഷാനുവിനെതിരേ മ്യൂസിയം പോലീസ് കേസെടുത്തിരുന്നു. 2018ല്‍ സിനിമയില്‍ അവസരം വാഗ്ദാനം ചെയ്തു പീഡിപ്പിച്ചു എന്നായിരുന്നു പരാതി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.