കോഴിക്കോട്: വടകര സിപിഎം ഏരിയാ കമ്മിറ്റിയിൽ മത്സരം. നാലു നേതാക്കൾ മത്സരിച്ചുതോറ്റു. മണിയൂർ പഞ്ചായത്ത്‌ പ്രസിഡന്‍റ് ടി.കെ.അഷ്‌റഫ്‌, ലോക്കൽ സെക്രട്ടറിമാരായ പി.പി.ദാമോദരൻ, വത്സൻ കുനിയിൽ, സിഐടിയു നേതാവ് വേണു കക്കട്ടിൽ എന്നിവരാണു മത്സരിച്ചത്.
മത്സരം ഉണ്ടാകുമെന്ന മുന്നറിയിപ്പ് കിട്ടിയതിനെ തുടർന്ന് നേതൃത്വം ഇതു വിലക്കിയിരുന്നു. എന്നാൽ നാലു പേർ നിലപാടിൽ ഉറച്ചുനിൽക്കുകയായിരുന്നു. 167 അംഗങ്ങളുള്ള കമ്മിറ്റിയിൽ തോറ്റ ഒരാൾക്ക് 77 വോട്ട് വരെ കിട്ടിയെന്നാണ് സൂചന.
മുൻ സെക്രട്ടറി ടി.പി.ഗോപാലനെ വീണ്ടും തെരഞ്ഞെടുത്തു. നിരവധി പ്രമുഖർ ഈ സ്ഥാനത്തേക്കു വരണം എന്ന ആവശ്യം ഉയർത്തിയിരുന്നു. എന്നാൽ ഭൂരിപക്ഷാഭിപ്രായം പരിഗണിച്ചു ഗോപാലനെ തന്നെ നിയമിക്കുകയായിരുന്നു.