ബെയ്റൂട്ട്: ലെബനനിലെ ഹിസ്ബുള്ളയുടെ ശക്തികേന്ദ്രങ്ങളിൽ വാക്കി ടോക്കികൾ പൊട്ടിത്തെറിച്ച് ഒൻപത് പേർ മരിച്ചു. നിരവധിപ്പേർക്ക് പരിക്ക്. മധ്യ-കിഴക്കൻ രാജ്യത്തുടനീളം പേജറുകൾ പൊട്ടിത്തെറിച്ച് പന്ത്രണ്ട് പേർ കൊല്ലപ്പെടുകയും 2,800-ലധികം പേർക്ക് പരിക്കേൽക്കുകയും ചെയ്തതിന് ഒരു ദിവസത്തിന് ശേഷമാണ് ഈ സംഭവം.
എത്ര വാക്കി-ടോക്കികൾ പൊട്ടിത്തെറിച്ചുവെന്ന് ഇതുവരെ വ്യക്തമല്ല. കിഴക്കൻ ലെബനനിലെ വിവിധ സ്ഥലങ്ങളിൽ ലാൻഡ്‌ലൈൻ ടെലിഫോണുകളും പൊട്ടിത്തെറിക്കുന്നതായി റിപ്പോർട്ടുകളുണ്ട്.
റിപ്പോർട്ടുകൾ പ്രകാരം, വയർലെസ് റേഡിയോ ഉപകരണങ്ങളും വാക്കി-ടോക്കികളും ഏകദേശം അഞ്ച് മാസം മുമ്പ് വാങ്ങിയതാണ്, ഏകദേശം ഇതേസമയം തന്നെയാണ് പേജറുകളും രാജ്യത്ത് ഇറക്കുമതി ചെയ്തിരിക്കുന്നത്.
തെക്കൻ ലെബനനിലും ബെയ്റൂട്ടിന്‍റെ പ്രാന്തപ്രദേശങ്ങളിലുമാണ് ഇന്ന് സ്ഫോടനങ്ങൾ നടന്നത്. ഇന്നലെ നടന്ന പേജർ സ്‌ഫോടനത്തിൽ കൊല്ലപ്പെട്ട ആളുകൾക്കായി ഹിസ്ബുല്ല സംഘടിപ്പിച്ച ശവസംസ്‌കാര ചടങ്ങിന് സമീപമാണ് സ്‌ഫോടനങ്ങളിലൊന്ന് ഉണ്ടായത്.