വടംവലി മത്സരം: ഫണ്ട് റെയ്‌സിംഗ് കിക്കോഫ് പിണറായി വിജയന്‍ നിര്‍വഹിച്ചു : Deepika.com Nri News Americas

ഷിക്കാഗോ : 2018 സെപ്റ്റംബര്‍ മൂന്നാം തീയതി നടക്കുന്ന ചിക്കാഗോ സോഷ്യല്‍ ക്ലബിന്റെ അന്തര്‍ദേശീയ വടംവലി ടൂര്‍ണമെന്റിന്റെ ഫണ്ട് റെയ്‌സിംഗ് കിക്കോഫ് ഷിക്കാഗോ സെന്റ് മേരീസ് ക്‌നാനായ പള്ളിയുടെ ഓഡിറ്റോറിയത്തില്‍ വച്ചു കേരള മുഖ്യമന്ത്രി സ: പിണറായി വിജയന്‍ ശ്രീ. സൈമണ്‍ ചക്കാലപടവനും ശ്രീ. റോയി മുണ്ടയ്ക്കനും ചെക്ക് കൈമാറി ഉദ്ഘാടനം ചെയ്തതോടുകൂടി ഷിക്കാഗോ സോഷ്യല്‍ ക്ലബ്ബിന്റെ ഈ മെഗാ ടൂര്‍ണമെന്റ് ചരിത്രത്തിന്റെ ഭാഗമാകാന്‍ പോകുന്നു.

സോഷ്യല്‍ ക്ലബ്ബിന്റെ പ്രഥമ വടംവലി ടൂര്‍ണമെന്റ് പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്തപ്പോള്‍ സോഷ്യല്‍ ക്ലബ്ബിന്റെ ആറാമതു ടൂര്‍ണമെന്റ് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു. സോഷ്യല്‍ ക്ലബ്ബിനെ സംബന്ധിച്ചിടത്തോളം അത് ഭാഗ്യവും ചരിത്രവിജയവുമാണെന്ന് പ്രസിഡന്റ് അലക്‌സ് പടിഞ്ഞാറേല്‍, വൈസ് പ്രസിഡന്റ് സജി മുല്ലപ്പള്ളി, ചെയര്‍മാന്‍ സിറിയക്ക് കൂവക്കാട്ടില്‍, സെക്രട്ടറി ജോസ് മണക്കാട്ട് എന്നിവര്‍ പറഞ്ഞു.

ഒന്നാം സമ്മാനം ജോയി നെടിയകാലായില്‍ സ്‌പോണ്‍സര്‍ ചെയ്യുന്ന 5001 ഡോളറും മാണി നെടിയകാലായില്‍ മെമ്മോറിയല്‍ എവര്‍റോളിംഗ് ട്രോഫിയും, രണ്ടാം സമ്മാനം ഫിലിപ്പ് മുണ്ടപ്ലാക്കല്‍ സ്‌പോണ്‍സര്‍ ചെയ്യുന്ന 3001 ഡോളറും ജോയി മുണ്ടപ്ലാക്കല്‍ എവര്‍റോളിംഗ് ട്രോഫിയും, മൂന്നാം സമ്മാനം സാബു പടിഞ്ഞറേല്‍ സ്‌പോണ്‍സര്‍ ചെയ്യുന്ന 2001 ഡോളറും എവര്‍റോളിംഗ് ട്രോഫിയും, നാലാം സമ്മാനം ചിക്കാഗോ മംഗല്യ ജൂവല്ലറി സ്‌പോണ്‍സര്‍ ചെയ്യുന്ന 1001 ഡോളറും എവര്‍റോളിംഗ് ട്രോഫിയും ഉണ്ടായിരിക്കും. ഇതു കൂടാതെ ബെസ്റ്റ് കോച്ച്, ബെസ്റ്റ് ഫ്രണ്ട്, ബെസ്റ്റ് ബാക്ക്, ബെസ്റ്റ് സിക്‌സ്ത് എന്നിങ്ങനെയും സമ്മാനങ്ങളുണ്ട്.
മാത്യു തട്ടാമറ്റം അറിയിച്ചതാണിത്.

റിപ്പോര്‍ട്ട്: ജോയിച്ചന്‍ പുതുക്കുളം