സാന്റാ അന്നയില്‍ അല്‍ഫോന്‍സാമ്മയുടെ തിരുനാള്‍ ആഘോഷിച്ചു
Thursday, July 31, 2014 6:33 AM IST
ലോസ്ആഞ്ചലസ്: സാന്റാ അന്നയിലുള്ള സെന്റ് തോമസ് സീറോ മലബാര്‍ കാത്തലിക് ഫൊറോനാ ദേവാലയത്തില്‍ വിശുദ്ധ അല്‍ഫോന്‍സാമ്മയുടെ തിരുനാള്‍ ഭക്ത്യാദരപൂര്‍വം ആഘോഷിച്ചു. അല്‍ഫോന്‍സാമ്മയെ വിശുദ്ധരുടെ ഗണത്തിലേക്ക് ഉയര്‍ത്തപ്പെട്ടതിനുശേഷമുള്ള ആറാമത്തെ തിരുനാളാണ് ഇടവക ദേവാലയത്തില്‍ നടത്തപ്പെട്ടത്.

ജൂലൈ 27-ന് (ഞായര്‍) രാവിലെ 10 ന് നടന്ന വിശുദ്ധ കുര്‍ബാനയില്‍ ഇടവക വികാരി ഫാ. ഇമ്മാനുവല്‍ മടുക്കക്കുഴി കാര്‍മികത്വം വഹിച്ചു. ഭരണങ്ങാനത്തെ ക്ളാരമഠത്തില്‍ പ്രാര്‍ഥനയോടെ ജീവിച്ച് യേശുനാഥന്റെ സന്നിധിയിലേക്ക് മടങ്ങിയ കന്യാരത്നത്തിന്റെ ജീവിതം നമുക്ക് മാതൃകയാകണമെന്നും സഹനജീവിതത്തിന്റെ വിശുദ്ധി നമ്മള്‍ പിന്തുടരണമെന്നും ദിവ്യബലി മധ്യേയുള്ള വചനസന്ദേശത്തില്‍ ഇമ്മാനുവേലച്ചന്‍ ഉദ്ബോധിപ്പിച്ചു.

വിശുദ്ധ കുര്‍ബാനയ്ക്കുശേഷം രൂപം വെഞ്ചരിപ്പും ലദീഞ്ഞും തുടര്‍ന്ന് മോടിയേകി. ഇടവകാംഗങ്ങളായ പെരുമ്പ്രായില്‍ കുടുംബാംഗങ്ങളാണ് സ്നേഹവിരുന്ന് സ്പോണ്‍സര്‍ ചെയ്തത്.

തിരുനാളിനോടനുബന്ധിച്ച് സെന്റ് തോമസ് ഫാമിലെ പച്ചക്കറികളുടെ ആദ്യ വിളവെടുപ്പിലും തുടര്‍ന്നുള്ള വില്‍പ്പനയിലും എല്ലാവരും പങ്കെടുത്തു.

ട്രസ്റി ജോണ്‍സണ്‍ വണ്ടനാംതടത്തിന്റെ നേതൃത്വത്തില്‍ ഇടവകാംഗങ്ങള്‍ ഒന്നായി തിരുനാള്‍ വിജയത്തിനായി പ്രവര്‍ത്തിച്ചു. ജോര്‍ജുകുട്ടി പുല്ലാപ്പള്ളില്‍ അറിയിച്ചതാണിത്.

റിപ്പോര്‍ട്ട്: ജോയിച്ചന്‍ പുതുക്കുളം
Copyright @ 2022 , Rashtra Deepika Ltd.