ആലപ്പുഴ: നഗരസഭ മഴക്കാല പൂര്‍വ ശുചീകരണ പ്രവര്‍ത്തനങ്ങളുടെ ഭാഗമായി 18, 19 തീയതികളില്‍ വിപുലമായ ജനകീയ പങ്കാളിത്തത്തോടെ ശുചീകരണ പ്രവര്‍ത്തനങ്ങള്‍ നടത്തുന്നതിന് അടിയന്തര കൗണ്‍സില്‍ യോഗം തീരുമാനിച്ചു. സര്‍ക്കാര്‍ നിര്‍ദേ പ്രകാരം ഒരു വാര്‍ഡില്‍ കുറഞ്ഞത് നാല് കേന്ദ്രങ്ങളില്‍ ശുചീകരണത്തിന്‍റെ ഭാഗമായി ശുചീകരണ പ്രവര്‍ത്തനം നടത്തും. നഗരത്തിലെ മുഴുവന്‍ ജനവിഭാഗത്തിന്‍റെയും പങ്കാളിത്തം ഉറപ്പാക്കി ശുചീകരണ പ്രവര്‍ത്തനം നടത്തുന്നതിന് കൗണ്‍സില്‍ തീരുമാനിച്ചു.
16ന് മൂന്നിന് നഗരസഭാ കൗണ്‍സില്‍ ഹാളില്‍ രാഷ്ട്രീയപാര്‍ട്ടികള്‍, കുടുംബശ്രീ, റെസിഡന്‍സ് അസോസിയേഷന്‍, സന്നദ്ധ സംഘടനകള്‍, യുവജന സംഘടനകള്‍, ക്ലബുകള്‍, റോട്ടറി, ലയണ്‍സ്, ജെസിഐ, വ്യാപാരി വ്യവസായ പ്രതിനിധികള്‍ തുടങ്ങി നഗരത്തിലെ മുഴുവന്‍ ജനവിഭാഗങ്ങളുടെയും വിപുലമായ യോഗം ചേര്‍ന്ന് ശുചീകരണ പ്രവര്‍ത്തനങ്ങള്‍ക്ക് പൂര്‍ണ രൂപം നല്‍കും.
18ന് നഗരത്തിലെ വീടുകളും പരിസരവും ഓഫീസുകളും പരിസരവും ശുചീകരിക്കും. 19ന് നഗരത്തിലെ എല്ലാ വാര്‍ഡുകളിലും പൊതു ഇടങ്ങള്‍ ജനകീയ പങ്കാളിത്തത്തോടെ ശുചീകരണ പ്രവര്‍ത്തനങ്ങള്‍ നടത്തും. മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ക്ക് ഓരോ വാര്‍ഡിലും 20,000 രൂപ തനത് ഫണ്ടില്‍ നിന്നു അനുവദിച്ചിട്ടുണ്ട്. അപകടാവസ്ഥയിലുള്ള മരങ്ങള്‍ വെട്ടി അപകടം ഒഴിവാക്കാനുള്ള നടപടി സ്വീകരിക്കുന്നതിനും മഴക്കെടുതിയെ നേരിടാന്‍ ഹെല്‍ത്ത് സര്‍ക്കിള്‍ അടിസ്ഥാനത്തില്‍ ശുചിത്വ സ്ക്വാഡ് രൂപീകരിക്കാനും കൗണ്‍സില്‍ തീരുമാനിച്ചു. നഗരസഭാ ചെയര്‍പേഴ്സണ്‍ കെ.കെ. ജയമ്മ അധ്യക്ഷത വഹിച്ചു.
കൗണ്‍സിലില്‍ വൈസ് ചെയര്‍മാന്‍ പി.എസ്.എം. ഹുസൈന്‍, സ്ഥിരംസമിതി അധ്യക്ഷരായ എ.എസ്. കവിത, എം.ആര്‍. പ്രേം, കക്ഷിനേതാക്കളായ സൗമ്യരാജ്, ഡി.പി. മധു, അഡ്വ. റീഗോ രാജു, സലിം മുല്ലാത്ത്, കൗണ്‍സിലര്‍മാരായ ബി. മെഹബൂബ്, ബി. അജേഷ്, മനു ഉപേന്ദ്രന്‍, അരവിന്ദാക്ഷന്‍, എല്‍ജിന്‍ റിച്ചാഡ്, നജിത ഹാരിസ്, പ്രഭ ശശികുമാര്‍ തുടങ്ങിയവര്‍ പ്രസംഗിച്ചു.