മലപ്പുറം: ജിദ്ദ കെഎംസിസി "വോട്ട് വിമാനത്തില്’ നാട്ടിലെത്തിച്ചവരെ അണിനിരത്തി മലപ്പുറത്ത് ജിദ്ദ കെഎംസിസി സെന്ട്രല് കമ്മിറ്റി പ്രവാസി റാലി നടത്തി. ഇന്ത്യ ജയിക്കണം മതേതരത്വം വീണ്ടെടുക്കണം എന്ന പ്രമേയത്തില് ഒന്നര മാസമായി നടത്തി വരുന്ന കാമ്പയിനിന്റെ അവസാന ഘട്ടമാണ് വോട്ടര്മാരെ നാട്ടിലെത്തിക്കാന് ജിദ്ദ അന്താരാഷട്ര വിമാനത്താളത്തില് നിന്നു കരിപ്പൂര് വിമാനത്താവളത്തിലേക്ക് സ്പൈസ് ജെറ്റ് വിമാനത്തില് കെഎംസിസി "വോട്ട് വിമാനം സര്വീസ്’ നടത്തിയത്.
കഴിഞ്ഞ ദിവസം വരെ എത്തിയ പ്രവാസികളെ അണിനിരത്തിയാണ് ഇന്നലെ മലപ്പുറത്ത് റാലി നടത്തിയത്. നൂറുക്കണക്കിന് കെഎംസിസി പ്രവര്ത്തകര് അണിനിരന്ന റാലി കിഴക്കേതലയില് മുസ്ലിം ലീഗ് ജില്ലാ പ്രസിഡന്റ് പാണക്കാട് അബ്ബാസലി ശിഹാബ് തങ്ങള്, കെഎംസിസി പ്രസിഡന്റ് അബൂബക്കര് അരിമ്പ്രക്ക് പതാക കൈമാറി ഉദ്ഘാടനം ചെയ്തു. നഗരം ചുറ്റിയ റാലി കുന്നുമ്മലില് സമാപിച്ചു.
സമാപന സമ്മേളനത്തില് പി.ഉബൈദുള്ള എംഎല്എ, കെ.പി.മുഹമ്മദ്കുട്ടി, ജില്ലാ മുസ്ലിം ലീഗ് സെക്രട്ടറിമാരായ നൗഷാദ് മണ്ണിശേരി, അന്വര് മുള്ളമ്പാറ, പി.എ, സലാം, ഇസ്ഹാഖ് പൂണ്ടോളി, മലപ്പുറം മുനിസിപ്പല് ലീഗ് സെക്രട്ടറി ബാവ എന്നിവര് പ്രസംഗിച്ചു.
റാലിക്ക് ജിദ്ദ കെഎംസിസി ഭാരവാഹികളായ ലത്തീഫ് മുസ്ലിയാരങ്ങാടി, നാസര് മച്ചിങ്ങല്, ഷൗക്കത്ത് ഒഴുകൂര്, അഷ്റഫ് താഴെക്കോട്, ഹുസൈന് കരിങ്കറ എന്നിവര് നേതൃത്വം നല്കി. ഇന്നു മലപ്പുറം, പൊന്നാനി, വയനാട് മണ്ഡലങ്ങളില് റോഡ് ഷോ നടത്തും.