മലപ്പുറം: ലോക്സഭാ തെരഞ്ഞെടുപ്പിന്റെ ഭാഗമായി മാധ്യമ പ്രവര്ത്തകര് ഉള്പ്പെടെയുള്ള അവശ്യ സര്വീസ് വിഭാഗത്തിലെ (എവിഇഎസ്) ജീവനക്കാര്ക്കുള്ള പോസ്റ്റല് വോട്ടെടുപ്പിന് തുടക്കമായി.
മലപ്പുറത്തും നിലമ്പൂരിലും പ്രത്യേകം സജ്ജീകരിച്ച പോസ്റ്റല് വോട്ടിംഗ് സെന്ററുകളിലെത്തിയാണ് ഇവര് വോട്ട് രേഖപ്പെടുത്തുന്നത്. ഇന്നും നാളെയും കൂടി വോട്ട് രേഖപ്പെടുത്താന് അവസരമുണ്ട്. ഈ ദിവസങ്ങളില് രാവിലെ ഒമ്പതു മുതല് വൈകിട്ട് അഞ്ചുവരെ വോട്ടിംഗ് കേന്ദ്രങ്ങള് പ്രവര്ത്തിക്കും.
മലപ്പുറം, പൊന്നാനി (തൃത്താല നിയോജക മണ്ഡലം ഒഴികെ) ലോക്സഭാ മണ്ഡലങ്ങളിലെ വോട്ടര്മാര്ക്ക് മലപ്പുറം എംഎസ്പി ഹയര്സെക്കന്ഡറി സ്കൂളിലും വയനാട് ലോക്സഭാ മണ്ഡലത്തില് ഉള്പ്പെട്ട നിലമ്പൂര്, വണ്ടൂര്, ഏറനാട് നിയോജക മണ്ഡലങ്ങളിലെ വോട്ടര്മാര്ക്ക് നിലമ്പൂര് (നോര്ത്ത്) ഡിവിഷണല് ഫോറസ്റ്റ് ഓഫീസിലെ ഫോറസ്റ്റ് കോണ്ഫറന്സ് ഹാളിലുമാണ് പോസ്റ്റല് വോട്ടിംഗ് പുരോഗമിക്കുന്നത്.
ആദ്യദിനമായ ഇന്നലെ 122 പേരാണ് ഈ രണ്ടു കേന്ദ്രങ്ങളിലുമായി വോട്ട് രേഖപ്പെടുത്തിയത്. മലപ്പുറം ലോക്സഭാ മണ്ഡലം 53, പൊന്നാനി 7, വയനാട് ലോക്സഭാ മണ്ഡലത്തില് പെടുന്ന ഏറനാട്, വണ്ടൂര്, നിലമ്പൂര് നിയോജകമണ്ഡലങ്ങളിലായി 62 എന്നിങ്ങനെയാണ് ഇന്നലെ വോട്ട് രേഖപ്പെടുത്തിയവരുടെ എണ്ണം.
പൊന്നാനി ലോക്സഭാ മണ്ഡലത്തില് 173, മലപ്പുറം 468, വയനാട് ലോക്സഭാ മണ്ഡലത്തില് പെടുന്ന ഏറനാട്, വണ്ടൂര്, നിലമ്പൂര് നിയോജകമണ്ഡലങ്ങളിലായി 438 എന്നിങ്ങനെ ജില്ലയില് ആകെ 1079 പേരാണ് എവിഇഎസ് വിഭാഗത്തില് പോസ്റ്റല് വോട്ടിനായി അപേക്ഷ നല്കിയിട്ടുള്ളത്.
ഡ്യൂട്ടിയുള്ള ഉദ്യോഗസ്ഥര് ഫോട്ടോ അപ്ലോഡ് ചെയ്യണം
മലപ്പുറം: ലോക്സഭാ തെരഞ്ഞെടുപ്പുമായി ബന്ധപ്പെട്ട് പോളിംഗ് ഡ്യൂട്ടി ലഭിച്ച ഉദ്യോഗസ്ഥര് അവരവരുടെ ഫോട്ടോ, ബാങ്ക് അക്കൗണ്ട് സംബന്ധിച്ച വിവരങ്ങള് എന്നിവ ഓര്ഡര് സോഫ്റ്റ്വെയറില് ഇന്നു വൈകുന്നേരം അഞ്ചിനകം അപ്ലോഡ് ചെയ്യണമെന്നു ജില്ലാ തെരഞ്ഞെടുപ്പ് ഓഫീസര് കൂടിയായ ജില്ലാ കളക്ടര് അറിയിച്ചു.
അപ്ലോഡ് ചെയ്യാന് സാധിക്കാതെ വരുന്ന ഉദ്യോഗസ്ഥര് 25ന് വിതരണ കേന്ദ്രങ്ങളില് ഹാജരാകുമ്പോള് അവരവരുടെ പാസ്പോര്ട്ട് സൈസിലുള്ള ഫോട്ടോ കൊണ്ടുവരണമെന്നും വിതരണ കേന്ദ്രത്തില് നിന്നു ലഭിക്കുന്ന തിരിച്ചറിയല് കാര്ഡില് പതിച്ച് ഉപയോഗിക്കണമെന്നും കളക്ടര് അറിയിച്ചു.
പോളിംഗ് ഉദ്യോഗസ്ഥര്ക്കു പരിശീലനം ഇന്ന്
മലപ്പുറം: ലോക്സഭാ തെരഞ്ഞെടുപ്പുമായി ബന്ധപ്പെട്ട് മലപ്പുറം ജില്ലയില് പ്രിസൈഡിംഗ് ഓഫീസറായും ഒന്നാം പോളിംഗ് ഓഫീസറായും നിയോഗിക്കപ്പെട്ട ഉദ്യോഗസ്ഥര്ക്ക് ഈ മാസം 9, 17, 18 തിയതികളില് നടത്തിയ പരിശീലനങ്ങളില് വിവിധ കാരണങ്ങളാല് പങ്കെടുക്കാന് സാധിക്കാതിരുന്നവര്ക്കായി ഇന്ന് രാവിലെ 9.30ന് മലപ്പുറം പ്ലാനിംഗ് സെക്രട്ടറിയറ്റ് ഹാളില് പരിശീലനം സംഘടിപ്പിക്കും.
പരിശീലനത്തില് പങ്കെടുക്കാത്ത പ്രിസൈഡിംഗ് ഓഫീസറായും ഒന്നാം പോളിംഗ് ഓഫീസറായും നിയോഗിക്കപ്പെട്ട എല്ലാ ഉദ്യോഗസ്ഥരും പരിശീലനത്തില് പങ്കെടുക്കണമെന്നു ജില്ലാ തെരഞ്ഞെടുപ്പ് ഓഫീസര് കൂടിയായ കളക്ടര് അറിയിച്ചു.