ദൈവപരിപാലനയുടെ തണലില്‍

Wednesday, October 30, 2024 9:26 PM IST
ബെന്നി ചിറയില്‍

ദൈവത്തോടു വിളിച്ചപേക്ഷിച്ചാല്‍ എന്തും ലഭിക്കുമെന്ന വലിയ പ്രത്യാശയാണ് മാര്‍ തോമസ് തറയിലിനെ നയിക്കുന്നത്. 2017 ജനുവരി 14നാണ് ചങ്ങനാശേരി അതിരൂപത സഹായമെത്രാനായി നിയമിതനായത്. അക്കൊല്ലം ഏപ്രില്‍ 23ന് മെത്രാഭിഷേകം. ഏഴു വര്‍ഷം സഹായമെത്രാനായി തെക്കന്‍മേഖലയിലെ കൊല്ലം, തിരുവനന്തപുരം, അമ്പൂരി ഫൊറോനകളുടെ സമഗ്ര വളര്‍ച്ചയ്ക്കായി പ്രവര്‍ത്തിച്ചു. മാര്‍ ജോസഫ് പെരുന്തോട്ടം വിരമിക്കുന്ന ഒഴിവിലാണ് അതിരൂപതയുടെ പുതിയ ഇടയനായി തെരഞ്ഞടുക്കപ്പെട്ടത്. "നിനക്ക് എന്‍റെ കൃപമതി' എന്ന ആപ്തവാക്യം സ്വീകരിച്ച് രൂപതയുടെ ഒമ്പതാമത്തെ ബിഷപ്പും അഞ്ചാമത്തെ ആര്‍ച്ച്ബിഷപ്പുമായാണ് മാര്‍ തോമസ് തറയില്‍ സ്ഥാനമേല്‍ക്കുന്നത്. ചങ്ങനാശേരി ആര്‍ച്ച്ബിഷപ്പായി ഇന്ന് സ്ഥാനാരോഹണം ചെയ്യപ്പെടുന്ന മാര്‍ തോമസ് തറയില്‍ പുതിയ നിയോഗത്തെക്കുറിച്ചും നിലപാടുകളെക്കുറിച്ചും ദീപികയോട് മനസുതുറക്കുന്നു.

പുതിയ ചുമതലയിലെ കാഴ്ചപ്പാട്

ഓരോ തെരഞ്ഞെടുപ്പും ദൈവം നമുക്ക് സ്ഥാനമായി നല്‍കുന്നതല്ല. ദൈവത്തിനു നമ്മെക്കൊണ്ട് എന്തെങ്കിലും നന്മ ചെയ്യാനുള്ളതുകൊണ്ടാണ് നമ്മെ തെരഞ്ഞെടുക്കുന്നത്. ആര്‍ച്ച്ബിഷപ് സ്ഥാനം ദൈവത്തിന്‍റെ തെരഞ്ഞെടുപ്പായി സ്വീകരിക്കുന്നു. ശുശ്രൂഷയ്ക്ക് അവിടുന്നുതന്നെ ആവശ്യമായ കൃപകള്‍ നല്‍കിക്കൊള്ളും. കഴിഞ്ഞ ഏഴു വര്‍ഷക്കാലം മെത്രാനടുത്ത ശുശ്രൂഷ ചെയ്തു. ഇപ്പോള്‍ അതിരൂപതയുടെ മുഴുവന്‍ ചുമതലയിലേക്കു വരുന്നു. ഇവിടെ ഏറെ നന്മകളും വിശ്വാസപാരമ്പര്യവും തീക്ഷ്ണതയുമുള്ള ദൈവജനവും വൈദിക ശുശ്രൂഷയില്‍ സംതൃപ്തിയടയുന്ന വൈദികഗണവുമുണ്ട്. ഒട്ടേറെ നന്മകളും വിശ്വാസപാരമ്പര്യവുമുള്ള രൂപതയാണ്. സ്ഥാനം ഏറ്റെടുക്കുന്നതില്‍ വലിയ ഭയപ്പാടൊന്നുമില്ല. ദൈവം നയിയിച്ചുകൊള്ളും. മനസ് സന്നദ്ധമായാല്‍ മതി. ബോധ്യങ്ങളില്‍ അധിഷ്ഠിതമായ സാമൂഹ്യ സൃഷ്ടിക്കായിരിക്കും പ്രഥമ പരിഗണന.

മഹാരഥന്മാരായ പിതാക്കന്മാരുടെ പാരമ്പര്യം എത്രത്തോളം കരുത്താകും?

മഹാരഥന്മാരുടെ ഓര്‍മ എന്നെ എളിമപ്പെടുത്തുന്നു. അവരുടെ നിരയിലേക്ക് ഉയരാന്‍ കഴിവോ യോഗ്യതയോ ഉണ്ടെന്നു ഞാന്‍ കരുതുന്നില്ല. അവര്‍ തെളിച്ച വലിയ പാത വ്യക്തമാണ്. ചങ്ങനാശേരി അതിരൂപത എന്നും വിശ്വാസചൈതന്യവും ഏറെ ദൈവവിളികളുമുള്ള കൂട്ടായ്മയാണ്. ആത്മീയ മുന്നേറ്റം, ചെറുപുഷ്പ മിഷന്‍ ലീഗിന്‍റെ തുടക്കം, മലബാര്‍ കുടിയേറ്റം, വിദ്യാഭ്യാസ-ആരോഗ്യരംഗത്തെ ചുവടുവയ്പുകള്‍ തുടങ്ങിയവയ്ക്ക് മുന്‍ പിതാക്കന്മാര്‍ ദിശാബോധം പകര്‍ന്നിട്ടുണ്ട്. സ്ഥാപനങ്ങള്‍ തുടങ്ങുക മാത്രമല്ല ദര്‍ശനത്തോടെ അവയെ നയിക്കാനും മുന്‍പിതാക്കന്മാര്‍ക്കു കഴിഞ്ഞു.

വിദ്യാഭ്യാസ സ്ഥാപനങ്ങള്‍ പിടിച്ചെടുക്കാനുള്ള സര്‍ സി.പി.യുടെ നീക്കത്തിനെതിരേ മാര്‍ ജയിംസ് കാളാശേരി പിതാവ് നടത്തിയ പോരാട്ടം ശ്രദ്ധേയമായിരുന്നു. അതിലൂടെയാണ് നമ്മുടെ സ്ഥാപനങ്ങള്‍ സംരക്ഷിച്ചു നിർത്താനായത്.

മാര്‍ മാത്യു കാവുകാട്ട് പിതാവിന്‍റെ കാലത്താണ് തെക്കന്‍ മേഖലയിലേക്കുള്ള പ്രേഷിത പ്രവര്‍ത്തനം ആരംഭിച്ചത്. അജപാലന പ്രവര്‍ത്തനങ്ങള്‍ സംഘടിതമായി കൊണ്ടുപോകാന്‍ മാര്‍ ആന്‍റണി പടിയറ പിതാവിനു കഴിഞ്ഞു. ന്യൂനപക്ഷാവകാശങ്ങള്‍ക്കായി ഉജ്വല പോരാട്ടം നടത്തിയ മാര്‍ ജോസഫ് പവ്വത്തില്‍ പിതാവ് ഈ കാലഘട്ടത്തെ സ്വാധീനിച്ച ഇടയനാണ്. സഭയോടു ചേര്‍ന്നുനിന്ന് അതിരൂപതയ്ക്കു വലിയ സംഭാവനകള്‍ നല്‍കിയ മാര്‍ ജോസഫ് പെരുന്തോട്ടം പിതാവ് വലിയ മാതൃകയാണ്.

മാര്‍ ജോസഫ് പവ്വത്തിലിന്‍റെ സ്വാധീനം?

മാര്‍ ജോസഫ് പവ്വത്തിൽ ഏറെപ്പേരെ എന്നതുപോലെ എന്നെയും സ്വാധീനിച്ചിട്ടുണ്ട്. ബൗദ്ധിക ഔന്നത‍്യത്തിനൊപ്പം പിതാവിന്‍റെ ആര്‍ദ്രമായ സ്‌നേഹം അനുഭവിക്കാനും കഴിഞ്ഞിട്ടുണ്ട്. വൈദികര്‍ക്കും സെമിനാരിക്കാര്‍ക്കും വിശ്വാസികള്‍ക്കും ഉറച്ച ബോധ്യങ്ങള്‍ അദ്ദേഹം നല്‍കിയതിനാലാണ് ചങ്ങനാശേരി അതിരൂപത പ്രതിസന്ധികളില്ലാതെ മുന്നോട്ടു പോകുന്നത്.

ഭൗതികവും ആത്മീയവുമായ വളര്‍ച്ചയ്ക്കുള്ള പുതിയ പദ്ധതികള്‍?

പദ്ധതികളെല്ലാം ദൈവത്തിന്‍റേതാണ്. എന്‍റെ മനസിലുള്ള പദ്ധതി അവതരിപ്പിക്കലല്ല, സൃഷ്ടിപരമായ ശ്രവണം എന്ന ഫ്രാന്‍സിസ് പാപ്പായുടെ ആഹ്വാനമനുസരിച്ച് ദൈവത്തെയും വിശ്വാസികളെയും വൈദികരെയും സന്യസ്തരെയും ശ്രവിക്കാന്‍ ആഗ്രഹിക്കുന്നു. ദൈവിക പദ്ധതി വെളിപ്പെടാന്‍ പ്രാര്‍ഥിക്കും. അതനുസരിച്ചായിരിക്കും പ്രവര്‍ത്തനം.

വര്‍ധിച്ചുവരുന്ന വിദേശകുടിയേറ്റം സഭയെ ബാധിക്കുമോ?

യുവജനങ്ങളുടെ വിദേശ കുടിയേറ്റം നേരിട്ടു ബാധിക്കുന്നത് സഭയെയാണെന്നു കരുതുന്നില്ല. നമ്മുടെയാളുകള്‍ ചെല്ലുന്ന സ്ഥലങ്ങളില്‍ സഭയോടു ചേര്‍ന്നു പ്രവര്‍ത്തിക്കുന്നുണ്ട്. അതിനാല്‍ ഇത് സഭയെ വിശാലമാക്കുകയാണ്. വിദേശകുടിയേറ്റം പ്രതികൂലമായി ബാധിക്കുന്നത് കേരള സമൂഹത്തെയാണ്. നമ്മുടെ നാടിന് ബൗദ്ധിക ചോര്‍ച്ച സംഭവിക്കുന്നു. നല്ല ഡോക്ടര്‍മാരും എന്‍ജിനിയര്‍മാരും ഗവേഷകരും നാടുവിട്ടുപോകുന്നത് നാടിനു നല്ലതല്ല. പഠിക്കാന്‍ വേണ്ടിയല്ല, ജോലി ചെയ്തു ജീവസന്ധാരണത്തിനുവേണ്ടിയാണ് വിദേശത്തേക്കു പോകുന്നത്. ഇതു ഭരണരംഗത്തും രാഷ്‌ട്രീയരംഗത്തും ബൗദ്ധിക ചോര്‍ച്ചയ്ക്കിടയാക്കും. ഇവിടെ മാന്യമായി ജോലി ചെയ്ത് ശമ്പളം നേടി ജീവിക്കാന്‍ ഉതകുന്ന സാഹചര്യം സംജാതമാക്കാന്‍ സര്‍ക്കാരിനു കഴിയുന്നില്ല. ഇത് സര്‍ക്കാരിന്‍റെ പരാജയമാണ്. മാന്യമായ ജോലി നല്‍കാന്‍ കഴിഞ്ഞാല്‍ നമ്മുടെ ചെറുപ്പക്കാർ‍ എങ്ങും പോകില്ല.

സീറോമലബാർ സഭാ വെല്ലുവിളികള്‍, കുര്‍ബാനക്രമ ഭിന്നതകള്‍.. ഭാവിയെ എങ്ങനെ ബാധിക്കും?

മാര്‍പാപ്പയും സിനഡും പ്രഖ്യാപിച്ചിരിക്കുന്ന ഏകീകൃത രീതിയിലുള്ള കുര്‍ബാന എല്ലാ രൂപതകളിലും എല്ലാ ഇടവകകളിലും അര്‍പ്പിച്ചാല്‍ മാത്രമേ സീറോമലബാര്‍ സഭയില്‍ ഐക്യവും ആത്മീയതയും വളരുകയുള്ളൂ. പ്രശ്‌നങ്ങള്‍ പരിഹരിക്കപ്പെടുകയുള്ളൂ. തെറ്റിദ്ധാരണകളാണ് ഇപ്പോഴത്തെ പ്രശ്‌നം. നമ്മുടെ പിതാക്കന്മാരോ വിശ്വാസികളോ ഭിന്നതകള്‍ വളര്‍ത്താന്‍ ആഗ്രഹിക്കുന്നവരല്ല. നല്ല വിശ്വാസമുള്ളവര്‍ മാര്‍പാപ്പയ്‌ക്കെതിരേ പ്രവര്‍ത്തിക്കില്ല. ദൈവിക ഇടപെടലുള്ളതിനാല്‍ ശിഥില ശക്തികള്‍ക്ക് ഒരു കാലത്തും സഭയെ തകര്‍ക്കാനാവില്ല.

സമുദായം നേരിടുന്ന വെല്ലുവിളികള്‍?

ന്യൂനപക്ഷമെന്ന നിലയില്‍ സഭ അവിഹിതമായ ഒരു ആനുകൂല്യങ്ങള്‍ക്കുംവേണ്ടി സര്‍ക്കാരിനെ സമീപിക്കാറില്ല. ഭരണഘടന അനുശാസിക്കുന്ന നീതി മാത്രം ലഭിച്ചാല്‍ മതി. എല്ലാ സമൂഹങ്ങള്‍ക്കും അര്‍ഹിക്കുന്നത് ലഭിച്ചേ മതിയാകൂ. അത് കൊടുക്കുകയും കിട്ടുകയും വേണം. ഭൂരിപക്ഷ സമുദായങ്ങളെയും ഒപ്പം ന്യൂനപക്ഷ സമുദായങ്ങളെയും മാനിക്കണം. സമത്വത്തിന്‍റെ തത്വവും നീതിയും ലംഘിക്കപ്പെടുമ്പോഴാണ് അസ്വസ്ഥതയുണ്ടാകുന്നത്. വോട്ടുബാങ്ക് നോക്കി ചില ന്യൂനപക്ഷങ്ങളെ മാത്രം പ്രീണിപ്പിക്കുന്നത് ശരിയല്ല. ഭാരതം മതേതരരാജ്യമായി നിലനില്‍ക്കണമെങ്കില്‍ സമത്വത്തിന്‍റെ തത്വം പാലിക്കപ്പെടണം.

സഭാംഗങ്ങള്‍ പൊതുപ്രവര്‍ത്തനത്തിലേക്ക് വരേണ്ടതിന്‍റെ ആവശ്യകത?

ക്രൈസ്തവർക്ക് രാഷ്‌ട്രീയ താത്പര്യം കുറഞ്ഞുവെന്നത് വലിയ പ്രതിസന്ധിയാണ്. മിടുക്കരായ യുവാക്കള്‍ വിദേശത്തേക്കു കുടിയേറുന്നു. ഇക്കാലത്തെ രാഷ്‌ട്രീയ രംഗത്തോട് ചെറുപ്പക്കാര്‍ക്ക് വിരക്തിയാണ്. നേതൃസ്ഥാനത്ത് ചെറുപ്പക്കാര്‍ക്ക് അവസരങ്ങള്‍ ലഭിക്കുന്നില്ല. കുട്ടികളായിരിക്കുമ്പോള്‍ തന്നെ മതബോധനരംഗത്ത് സാമൂഹ്യ പ്രതിബദ്ധതയെക്കുറിച്ചുള്ള ഔത്സുക്യം വളര്‍ത്തണം.

ദൈവവിളി കുറയുന്നത് ആശങ്കപ്പെടുത്തുന്നുണ്ടോ?

വിശ്വാസത്തിന്‍റെ ആഴം കുറയുന്നതാണ് ദൈവവിളി കുറയാന്‍ കാരണം. കുട്ടികളുടെ എണ്ണം കുറഞ്ഞതും കാരണമാണ്. ദൈവവിളിയില്‍ പെണ്‍കുട്ടികളുടെ എണ്ണം വളരെ കുറഞ്ഞു. ആണ്‍കുട്ടികളുടെ എണ്ണം മുന്‍വര്‍ഷങ്ങളിലെ അത്രയും തന്നെയില്ല. ദൈവവിളിയുടെ ആവശ്യബോധം കുട്ടികളില്‍ ജനിപ്പിക്കാന്‍ മതബോധനത്തിലൂടെ കഴിയണം. ദൈവവിളി കുറയുന്നത് വരുംതലമുറയുടെ വിശ്വാസ ജീവിതത്തിനു കനത്ത വെല്ലുവിളിയാണ്.

കുടുംബഭദ്രത, വിവാഹമോചനം?

ഇപ്പോഴും ആയിരക്കണക്കിനു നല്ല കുടുംബങ്ങളുണ്ട്. വിവാഹമോചനം നേടുന്ന കുടുംബങ്ങളുടെ എണ്ണത്തില്‍ ഭയാനകമായ വര്‍ധനവില്ല. സന്തോഷം ഇല്ലാത്ത കുടുംബങ്ങളുടെയും കലഹിച്ചും നിശബ്ദരായും ആയുസ് തീര്‍ക്കുന്ന കുടുംബങ്ങളുടെയും എണ്ണം വര്‍ധിക്കുന്നതാണ് ആശങ്കപ്പെടുത്തുന്നത്. വിവാഹമോചനത്തെയല്ല സന്തോഷമില്ലാതെ ജീവിതം തള്ളിവിടുന്ന കുടുംബങ്ങളെയാണ് ഭയപ്പെടേണ്ടത്. കുടുംബപ്രാര്‍ഥനയും കൂദാശാപങ്കാളിത്തവും ശക്തിപ്പെട്ടാലേ കുടുംബഭദ്രത ഉറപ്പാകൂ. മക്കള്‍ക്ക് ജീവിക്കാന്‍ ധൈര്യം നല്‍കുന്ന കുടുംബാന്തരീക്ഷം നല്‍കണം.തുറന്നു പറയാനും ചിരിക്കാനും ഒരുമിച്ചിരുന്നു ഭക്ഷണം കഴിക്കാനും സാധിക്കണം.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.