ഒരു വാക്കോ വരിയോ ക്രൈസ്തവമൂല്യങ്ങൾക്കോ ധാർമികചിന്തകൾക്കോ വിരുദ്ധമായി എഴുതിയിട്ടില്ലെന്ന് ഉറപ്പോടെ പറയുന്ന സി.എൽ. ജോസ്, ആഗോള കത്തോലിക്കാ സഭയുടെ അത്യുന്നത ബഹുമതിയായ ഷെവലിയർ പദവി തേടിയെത്താനും അതുതന്നെയാണ് കാരണമെന്നു വിശ്വസിക്കുന്നു.
അനുഭവങ്ങളിൽനിന്നാണ് നാടകത്തിനുള്ള ഇതിവൃത്തങ്ങൾ കണ്ടെത്തുന്നതെന്ന് ജോസേട്ടൻ പറയാറുണ്ട്. ആനുകാലികങ്ങളിലേക്ക് എഴുത്ത് ചുരുക്കിയെങ്കിലും വായനയുടെ ലോകത്തു സജീവമാണ് തൊണ്ണൂറ്റിരണ്ടാം വയസിലും സി.എൽ. ജോസ്.
സി.എൽ. ജോസ് ജീവിതരേഖ ചക്കാലയ്ക്കൽ ലോനപ്പൻ - മറിയക്കുട്ടി ദന്പതികളുടെ മകൻ. ഭാര്യ: ലിസി. മക്കൾ: ഷേർളി, തങ്കച്ചൻ, ഡെയ്സൻ.
കൃതികൾ: 1956ൽ ആദ്യനാടകം ‘മാനം തെളിഞ്ഞു’. ഇതുവരെ 38 സന്പൂർണ നാടകങ്ങൾ, 16 സമാഹാരങ്ങളിലായി നൂറോളം ഏകാങ്കങ്ങൾ, നാടകത്തിന്‍റെ കാണാപ്പുറങ്ങൾ (ജീവിതസ്മരണകൾ), ചിരിയുടെ പൂരം, ചിരിയുടെ മേളം (ഫലിതസമാഹാരങ്ങൾ), ഓർമകൾക്ക് ഉറക്കമില്ല (ആത്മകഥ), സി.എൽ. ജോസിന്റെ തെരഞ്ഞെടുത്ത അരമണിക്കൂർ നാടകങ്ങൾ, ജോസിന്റെ തെരഞ്ഞെടുത്ത ഏകാങ്കങ്ങൾ, തെരഞ്ഞെടുത്ത ലഘുനാടകങ്ങൾ, നാടകരചന എന്ത്, എങ്ങനെ? പഠനഗ്രന്ഥം, എന്‍റെ നാടകജീവിതം (നാടകാനുഭവങ്ങൾ) എന്നിവ പ്രസിദ്ധീകരിച്ചു.
വഹിച്ച ഭാരവാഹിത്വങ്ങൾ: ചെയർമാൻ - കേരള സംഗീതനാടക അക്കാദമി. മെംബർ - കേന്ദ്ര സംഗീതനാടക അക്കാദമി. കാലിക്കട്ട് യൂണിവേഴ്സിറ്റിയുടെ ഫൈൻ ആർട്സ് ഫാക്കൽറ്റി അംഗം. പ്രസിഡന്‍റ് - തൃശൂർ ഫൈൻ ആർട്സ് സൊസൈറ്റി, പ്രസിഡന്‍റ് - തൃശൂർ കലാസദൻ. കേരള സാഹിത്യ അക്കാദമി, സമസ്ത കേരള സാഹിത്യ പരിഷത്ത്, ആകാശവാണി ഉപദേശക സമിതി എന്നിവയിലും അംഗമായിരുന്നു. നാടകനടനും നാടക സംവിധായകനുമാണ്. ആകാശവാണിയുടെ ഹൈഗ്രേഡ് ആർട്ടിസ്റ്റ്. ഒട്ടേറെ റേഡിയോ നാടകങ്ങളിൽ അഭിനയിച്ചു. സൺഡേ ദീപികയിൽ ‘ഓർമച്ചെപ്പ്’ എന്ന പംക്തിയിൽ എഴുതുന്ന അനുഭവക്കുറിപ്പുകൾ ശ്രദ്ധേയമാണ്.