തൂക്കത്തിന്റെ പരിധിയോ സമയപരിധിയോ റിംഗോ ഇല്ലാത്ത വിചിത്ര മത്സരങ്ങളായിരുന്നു ബോക്സിഗും ഗുസ്തിയും. തത്വശാസ്ത്ര സംവാദങ്ങളും ഗെയിംസിനോടനുബന്ധിച്ചു നടന്നിരുന്നു. തത്വശാസ്ത്ര സംവാദങ്ങളില് പങ്കെടുക്കാന് സോക്രട്ടീസും പ്ലേറ്റോയും എത്തിച്ചേര്ന്നു.
സ്ത്രീകളില്ലാതെപ്രാചീന ഒളിമ്പിക്സില് പങ്കെടുക്കാന് സ്ത്രീകള്ക്ക് അനുവാദമുണ്ടായിരുന്നില്ല. ഒളിമ്പിക്സ് മത്സര വിജയികള്ക്കു വീരപരിവേഷം ഉണ്ടായിരുന്നു. അവര് സിയൂസ് ദേവന്റെ പ്രിയപ്പെട്ടവരായി വാഴ്ത്തപ്പെട്ടു. വിജയികള്ക്കു വലിയ പാരിതോഷങ്ങളും നല്കി. ഒലിവ് മരത്തിന്റെ ഇലകള്ക്കൊണ്ടുണ്ടാക്കിയ കിരീടം വിജയികള്ക്ക് സമ്മാനിച്ചിരുന്നു.
സ്ത്രീകള്ക്ക് പങ്കെടുക്കാന് അനുവാദമുണ്ടായിരുന്നില്ലെങ്കിലും കാഴ്ചക്കാരായി അവര് ഒളിമ്പിക്സില് എത്തിയിരുന്നു എന്നാണ് തെളിവുകള് സൂചിപ്പിക്കുന്നത്. ചുരുക്കത്തില്, പ്രാചീന ഗ്രീസിലെ ഭൂരിപക്ഷം വരുന്ന സ്ത്രീകള്ക്കും അടിമകള്ക്കും അപ്രാപ്യമായിരുന്നു ഒളിമ്പിക്സ്.
ഗ്രീക്ക് നഗരരാഷ്ട്രങ്ങളുടെ പതനത്തിനു വഴി തെളിച്ച പെല്പ്പൊന്നേഷ്യന് യുദ്ധങ്ങള്ക്കു ശേഷം ഹെലനിസ്റ്റിക് യുഗത്തിലും ഒളിമ്പിക്സ് നടന്നിരുന്നു. എന്നാല്, ഗ്രീസില്നിന്ന് ഒളിമ്പിക്സ് റോമിലെത്തിയതോടെ അതിന്റെ രൂപവും ഭാവവും മാറി.
146 ബിസിയില് ഗ്രീക്ക് നഗര രാഷ്ട്രങ്ങള് റോമക്കാര് കീഴടക്കിയതോടെയാണ് ഒളിമ്പിക്സ് റോമിലെത്തിയത്. റോമ സാമ്രാജ്യത്തില് ഒളിമ്പിക്സ് ക്രൂരതയുടെയും അഴിമതിയുടെയും കേന്ദ്രങ്ങളായി അധഃപതിച്ചു.
ഒളിമ്പിക്സിലെ ഏറ്റവും വലിയ അഴിമതി ക്രൈസ്തവ മര്ദനത്തിന്റെ പേരില് ചരിത്രത്തില് കുപ്രസിദ്ധനായ നീറോ ചക്രവര്ത്തിയുമായി ബന്ധപ്പെട്ടതായിരുന്നു. 67 എഡിയില് ഒളിമ്പിക്സില് നടന്ന തേരോട്ട മത്സരത്തില് വിധികര്ത്താക്കളെ നീറോ ചക്രവര്ത്തി കൈക്കൂലി നല്കി സ്വാധീനിക്കുകയും വിജയം അനുകൂലമാക്കുകയും ചെയ്തു. തൊട്ടടുത്ത വര്ഷം നീറോ ചക്രവര്ത്തി കൊല്ലപ്പെട്ടതോടെ അദ്ദേഹത്തിന്റെ ഒളിമ്പിക്സിലെ എല്ലാ മത്സര വിജയങ്ങളും റദ്ദാക്കപ്പെട്ടു.
പ്രാചീന ഒളിമ്പിക്സിന്റെ അന്ത്യംഅഴിമതിയുടെയും സ്വജനപക്ഷപാതത്തിന്റെയും പേരിലല്ല പ്രാചീന ഒളിമ്പിക്സ് നിരോധിക്കപ്പെട്ടത്. പ്രാചീന ഒളിമ്പിക്സ് നിരോധിക്കപ്പെട്ടത് ക്രൈസ്തവമതത്തിന്റെ പേരിലായിരുന്നു. ദൈവത്തിനു മുന്നില് എല്ലാവരും സമന്മാരാണ് എന്ന ആശയമാണ് ക്രൈസ്തവ മതം ഉയര്ത്തിപ്പിടിച്ചത്. ഇതു റോമ ചക്രവര്ത്തിമാരുടെ നിലനില്പിനു ഭീഷണിയായിരുന്നു.
റോമ സാമ്രാജ്യത്തില് ക്രൈസ്തവര് ഭീകരമര്ദനത്തിനു വിധേയമായിരുന്നു. നിരവധി ക്രൈസ്തവരാണ് റോമാ സാമ്രാജ്യത്തില് കൊല്ലപ്പെട്ടത്. എന്നാല്, ഓരോ ക്രിസ്ത്യാനിയുടെയും രക്തസാക്ഷിത്വം റോമില് ക്രൈസ്തവ മതത്തെ കൂടുതല് ജനപ്രിയമാക്കി. ക്രിസ്തുമതത്തിന്റെ ജനപ്രിയത അതിനെ അംഗീകരിക്കാന് റോമ ചക്രവര്ത്തിമാരെ നിര്ബന്ധിച്ചു.
393 എഡിയില് റോമാ ചക്രവര്ത്തി തിയോഡിഷസ് ക്രിസ്തുമതത്തെ റോമാ സാമ്രാജ്യത്തിന്റെ ഔദ്യോഗിക മതമായി അംഗീകരിക്കുകയും എല്ലാ വിധത്തിലുള്ള ക്രൈസ്തവ വിരുദ്ധ ആഘോഷങ്ങളും നിരോധിക്കുകയും ചെയ്തു.
അങ്ങനെ ക്രൈസ്തവവിരുദ്ധം എന്നു കരുതപ്പെട്ട ഗ്രീക്ക്/റോമന് ആരാധനാലയങ്ങളും അവരുടെ പ്രധാന ആഘോഷമായ ഒളിമ്പിക്സും നിരോധിക്കപ്പെട്ടു. 393 എഡിയില് നിരോധിക്കപ്പെട്ട പ്രാചീന ഒളിമ്പിക്സ് പിന്നീട് ആധുനിക ഒളിമ്പിക്സായി പുതിയ രൂപഭാവങ്ങളോടെ പുനര്ജീവിച്ചത് 1896 ലാണ്.