കടമെടുക്കുന്നതിലുൾപ്പെടെ കേന്ദ്രസർക്കാർ മുന്നോട്ടുവച്ച കർശനമായ ഉപാധികളും നിയന്ത്രണങ്ങളും സംസ്ഥാനത്തെ സാന്പത്തികമായി തളർത്തിയെന്നാണു സംസ്ഥാന സർക്കാർ വാദിക്കുന്നത്. ക്ഷേമപെൻഷൻ ഉൾപ്പെടെ കുടിശികയായതും മറ്റു ചെലവുകൾ നടത്താൻ സാധിക്കാതെ വന്നതും ഇതുമൂലമാണ്. കഴിഞ്ഞ ലോക്സഭാ തെരഞ്ഞെടുപ്പിൽ ഇടതുപക്ഷത്തിനുണ്ടായ കനത്ത തിരിച്ചടിക്ക് ഇതു കാരണമായതായും ഇടതുപക്ഷം വിലയിരുത്തുന്നു.
കേന്ദ്രത്തിൽ ബിജെപിക്കുണ്ടായ തെരഞ്ഞെടുപ്പു തിരിച്ചടിയുടെ പശ്ചാത്തലത്തിൽ അവരുടെ നിലപാടുകളിൽ മയമുണ്ടാകുമെന്നു കേരളം പ്രതീക്ഷിച്ചിരുന്നു. കേരളത്തിന്റെ ആവശ്യങ്ങളോട് അനുഭാവപൂർവമായ പരിഗണന ഉണ്ടായാൽ സാന്പത്തികഞെരുക്കത്തിൽനിന്നു പുറത്തുവരാമെന്നും സംസ്ഥാന സർക്കാർ പ്രതീക്ഷിച്ചു. എന്നാൽ, എല്ലാ പ്രതീക്ഷകളും അസ്ഥാനത്തായിരിക്കുകയാണ്.
കേന്ദ്രസർക്കാരിന്റെ നിലപാടുകളിൽ ഒരു മാറ്റവും വന്നിട്ടില്ലെന്നാണു ബജറ്റിലൂടെ അവർ വ്യക്തമായിരിക്കുന്നത്. സാന്പത്തിക നില മെച്ചപ്പെടുത്താൻ സർക്കാരിനു മറ്റു മാർഗങ്ങൾ തേടേണ്ടിവരും. കേന്ദ്രത്തിനെതിരേ കേസ് കൊടുത്തതു ദോഷമായി എന്നൊരു ചിന്തയും ഭരണപക്ഷത്തെ ഒരു വിഭാഗത്തിനിടയിലുണ്ട്. കേസ് വന്നതോടെ കേന്ദ്രത്തിനു പ്രതികാരമനോഭാവമുണ്ടായി എന്ന വിലയിരുത്തലിലാണിത്.
കേന്ദ്രവിരുദ്ധത മുറുക്കി യുഡിഎഫ്കേരളത്തിന്റെ സാന്പത്തിക പ്രതിസന്ധിയുടെ പ്രധാന കാരണം സംസ്ഥാന സർക്കാരിന്റെ മോശമായ സാന്പത്തിക മാനേജ്മെന്റ് ആണെന്ന നിലപാടായിരുന്നു ഇക്കാലമത്രയും യുഡിഎഫ് സ്വീകരിച്ചുവന്നിരുന്നത്. കേന്ദ്രത്തിനെതിരേ മയമുള്ള വിമർശനവും സംസ്ഥാന സർക്കാരിനെതിരേ മയമില്ലാത്ത വിമർശനവുമായിരുന്നു അവരുടെ നയം. എന്നാൽ, ഇന്നലെ കേന്ദ്രബജറ്റ് വന്നപ്പോൾ കേരളത്തെ കേന്ദ്രം അവഗണിച്ചു എന്നാരോപിച്ചു ശക്തമായ വിമർശനവുമായി യുഡിഎഫ് രംഗത്തു വന്നു. യോജിച്ച പ്രക്ഷോഭം നടത്തണമെന്നുവരെ അഭിപ്രായമുണ്ടായി.
കേന്ദ്രസർക്കാരിനും ബിജെപിക്കും എതിരായി അതിശക്തമായ പോരാട്ടമാണു കോണ്ഗ്രസിന്റെ നേതൃത്വത്തിൽ ദേശീയതലത്തിൽ നടക്കുന്നത്. കേന്ദ്രത്തിനെതിരേ യോജിച്ച പ്രക്ഷോഭം നടത്താം എന്ന ഇടതുപക്ഷത്തിന്റെ ആവശ്യത്തോടു യുഡിഎഫ് നേരത്തേ മുഖം തിരിക്കുകയായിരുന്നു. സർക്കാരിനൊപ്പം നിന്നു യോജിച്ച സമരം നടത്തിയാൽ ഭരണപക്ഷത്തിനായിരിക്കും അതു രാഷ്ട്രീയമായി ഗുണം ചെയ്യുക എന്ന തിരിച്ചറിവിലായിരുന്നു അവർ യോജിച്ച പ്രക്ഷോഭത്തിനു തയാറാകാതിരുന്നത്. ഇനി തത്കാലം തെരഞ്ഞെടുപ്പുകളില്ല. കേന്ദ്രനയങ്ങളെയും കേരളത്തോടുള്ള അവഗണനയെയും വിമർശിക്കുന്നതിൽ യുഡിഎഫും ഇനി ഒരിഞ്ചു പോലും പിറകോട്ടു പോകില്ല.
ബിജെപിക്കു ക്ഷീണം തീർക്കണംഅടുത്ത വർഷം അവസാനം നടക്കുന്ന തദ്ദേശ തെരഞ്ഞെടുപ്പിൽ വൻകുതിപ്പു നടത്താൻ കഴിയുമെന്ന പ്രതീക്ഷയിലാണ് എൻഡിഎയും ബിജെപിയും. കേന്ദ്രബജറ്റ് ആ തയാറെടുപ്പിനു വലിയ തിരിച്ചടിയാണു നൽകിയിരിക്കുന്നത്. എന്തെങ്കിലും പ്രഖ്യാപനങ്ങളിലൂടെ ഈ തിരിച്ചടിയിൽനിന്നു കരകയറുക എന്നതാകും ഇനി ബിജെപിയുടെ മുന്നിലുള്ള വഴി. ഏതായാലും കേരളത്തിലെ ബിജെപിയുടെ രാഷ്ട്രീയമോഹങ്ങൾക്കു തിരിച്ചടി നൽകുന്നതായി ഇത്തവണത്തെ കേന്ദ്രബജറ്റ് എന്നതിൽ സംശയമില്ല.