അച്ചന്റെ പേരിൽ ഡോ. ടി.ജെ. ജോഷ്വാ ഫൗണ്ടേഷൻ സ്ഥാപിച്ചപ്പോൾ അച്ചൻ ഒരു സഭയുടെ മാത്രം സ്വത്തല്ലെന്നും സർവസഭകളുടെയും പൊതുസ്വത്താണെന്നും പറഞ്ഞു. ഫൗണ്ടേഷന്റെ ചെയർമാൻ സ്ഥാനത്തേക്ക് എന്നെയും സെക്രട്ടറിയായി ഫാ. തോമസ് കുര്യൻ മരോട്ടിപ്പുഴ അച്ചനെയും നിയോഗിച്ചതും പൗലോസ് ദ്വിതീയൻ ബാവയായിരുന്നു. പിന്നീട് മാത്യൂസ് തൃതീയൻ ബാവയും ഫൗണ്ടേഷന്റെ എക്യുമെനിക്കൽ സ്വഭാവം നിലനിർത്തണമെന്നുതന്നെ നിർദേശിക്കുകയാണുണ്ടായത്.
ഡോ. ജോഷ്വാ അച്ചനു ഭക്തിയും വിശ്വാസവും ആരാധനയും ഒന്നുതന്നെയായിരുന്നുവെന്നതാണ് ശരി-ഹൃദയസ്പർശിയായിരുന്നു അച്ചന്റെ സ്ഫുടമായ ഉച്ചാരണശുദ്ധിയോടെയുള്ള പ്രാർഥനകളും ആരാധനാശുശ്രൂഷകളും വേദവിജ്ഞാനീയ പ്രഭാഷണങ്ങളും. അച്ചന് പൗലോസ് ശ്ലീഹായുടെ ഒരു ഫാനായിരുന്നുവെന്നു പറയണം. പൗലോസ് ശ്ലീഹായെപ്പറ്റി പറയാത്ത ഒരു പ്രസംഗംപോലും ജോഷ്വാ അച്ചൻ ഇന്നേവരെ നടത്തിയിട്ടില്ല. അച്ചനെ കൃത്യമായി നിർവചിക്കാനും പ്രയാസമാണ്. നലം തികഞ്ഞ ആത്മീയ ചിന്തകനായിരുന്നു അച്ചൻ.
നാല്പതു വർഷത്തോളം അച്ചൻ മുടങ്ങാതെ പത്രമാധ്യമങ്ങളിലും മാസികകളിലും പുസ്തകങ്ങളിലും ചിന്താവിഷയങ്ങളെഴുതിയിരുന്നു. തൊണ്ണൂറ്റിയാറാം വയസിലും എഴുതുന്നതിലും പറയുന്നതിലുമൊന്നും ആവർത്തനമുണ്ടായതുമില്ല. അതായിരുന്നു ജോഷ്വാ അച്ചന്റെ ദൈവാധീനം.
ഡോ. സിറിയക് തോമസ് (മുൻ വൈസ് ചാൻസർ -എംജി യൂണിവേഴ്സിറ്റി)
പ്രാർഥനാ പ്രണാമം...