പ്രതികൂല കാലാവസ്ഥയും ഉത്പാദനം കുറഞ്ഞതുമാണു വിലവർധനയ്ക്കു കാരണം. കാലാവസ്ഥാ വ്യതിയാനങ്ങളും ശോഷിച്ച ജലസംഭരണികളും കാരണം കർഷകർ വെല്ലുവിളികൾ നേരിട്ടതായും സാന്പത്തിക സർവേയിൽ പറയുന്നു. പക്ഷേ, രാജ്യത്തെ പൊതുവായ വിലക്കയറ്റം നിയന്ത്രണവിധേയമാണെന്ന് ഇതേ സർവേ അവകാശപ്പെട്ടു.
ശതമാനക്കണക്കിൽ പണപ്പെരുപ്പം കുറഞ്ഞുവരികയാണെന്നും സാന്പത്തിക സർവേ അവകാശപ്പെട്ടു. കോവിഡ് മഹാമാരിക്കു ശേഷമുള്ള ഏറ്റവും താഴ്ന്ന നിലയിലാണു പണപ്പെരുപ്പം. അപ്രതീക്ഷിതമായ മഴക്കുറവോ, നയപരമോ അന്താരാഷ്ട്ര തലത്തിലുള്ള ഞെട്ടിക്കുന്ന സ്ഥിതിവിശേഷമോ ഉണ്ടായില്ലെങ്കിൽ 2025 സാന്പത്തികവർഷത്തിൽ 4.5 ശതമാനവും അടുത്ത വർഷം 4.1 ശതമാനവുമായി പണപ്പെരുപ്പം കുറയുമെന്നാണു സാന്പത്തിക സർവേയിലെ പ്രവചനം.
വിലക്കയറ്റം നിയന്ത്രിക്കുന്നതിന് കേന്ദ്ര-സംസ്ഥാന സർക്കാരുകളുടെ ശക്തവും ഫലപ്രദവുമായ ഇടപെടലുകളും പദ്ധതികളും ആവശ്യമാണ്. പാൽ, മുട്ട, മത്സ്യം, മാസം, പച്ചക്കറികൾ, പയർ, പരിപ്പ്, എണ്ണ, അരി, ഗോതന്പ് അടക്കമുള്ള നിത്യോപയോഗ സാധനങ്ങളുടെയും ഭക്ഷ്യോത്പന്നങ്ങളുടെയും വിലക്കയറ്റത്തിൽ പൊറുതി മുട്ടിയിരിക്കുകയാണ് ജനം. വിലകൾ റോക്കറ്റ് പോലെ കുതിച്ചുയർന്നിട്ടും കണക്കുകൾകൊണ്ട് ജനങ്ങളെ കബളിപ്പിക്കാനാണ് കേന്ദ്രസർക്കാരിന്റെ ശ്രമമെന്നു സാന്പത്തിക സർവേയിലും വ്യക്തമാകും.
വളരുന്ന സ്വകാര്യ നിക്ഷേപംമൂലധന നിക്ഷേപവും സ്വകാര്യ നിക്ഷേപവും കൂടുന്നതാണു സാന്പത്തിക സ്ഥിതി മെച്ചപ്പെടുത്തുന്നത്. 2023-24ൽ മൊത്ത സ്ഥിര മൂലധന രൂപീകരണം ഒന്പതു ശതമാനം വർധിച്ചു. കടമെടുക്കുന്ന പണം മൂലധന നിക്ഷേപത്തിനായി കൂടുതലായി വിനിയോഗിക്കാനായെന്നും സർവേ പറയുന്നു. അത്രയും നല്ലത്. ഭവനനിർമാണ റിയൽ എസ്റ്റേറ്റ് മേഖലയിൽ ആശാവഹമായ സ്വകാര്യ നിക്ഷേപമുണ്ടാകുന്നുണ്ട്.
സർക്കാരിന്റെ ദീർഘകാല വീക്ഷണത്തിന്റെ ഭാഗമാണ് ആറ് മടങ്ങ് വളർച്ചാതന്ത്രമെന്നും സർവേ പറയുന്നു. സ്വകാര്യ നിക്ഷേപം വർധിപ്പിക്കുന്നതിൽ ബോധപൂർവമായ ശ്രദ്ധയാണ് ആദ്യത്തേത്. രണ്ടാമതായി ചെറുകിട, ഇടത്തരം വ്യവസായങ്ങളുടെ (എംഎസ്എംഇ) വളർച്ചയ്ക്കും വികസനത്തിനും തന്ത്രപ്രധാനമായ മുൻഗണന നൽകിയെന്ന് അവകാശവാദമുണ്ട്.
ഭാവിയിലെ വളർച്ചയുടെ എൻജിനായി കൃഷിയുടെ സാധ്യതകൾ തിരിച്ചറിഞ്ഞു പ്രയോജനപ്പെടുത്തുകയും നയപരമായ തടസങ്ങൾ നീക്കുകയുമെന്നതാണു മൂന്നാമത്തെ പ്രധാന കാര്യമായി സാന്പത്തിക സർവേ ചൂണ്ടിക്കാട്ടുന്നത്.
ഇന്ത്യയിലെ ഹരിത പരിവർത്തനത്തിനു ധനസഹായം ഉറപ്പാക്കേണ്ടതിന്റെ ആവശ്യകതയാണു നാലാമത്തേത്. വിദ്യാഭ്യാസ-തൊഴിൽ വിടവ് നികത്തലാണ് അഞ്ചാമത്തേത്. ഇന്ത്യയുടെ പുരോഗതി നിലനിർത്തുന്നതിനും ത്വരിതപ്പെടുത്തുന്നതിനുമുള്ള ശേഷി വർധിപ്പിക്കുകയെന്നതാണ് ആറാമത്തേത്.
കറന്റ് അക്കൗണ്ട് കമ്മി കുറഞ്ഞുവരുന്നതും നല്ല സൂചനയാണ്. 2023 സാന്പത്തികവർഷത്തിൽ ജിഡിപിയുടെ രണ്ടു ശതമാനം ആയിരുന്ന കറന്റ് അക്കൗണ്ട് കമ്മി 2024ൽ 0.7 ശതമാനമായി കുറഞ്ഞതു വലിയ പുരോഗതിയാണെന്നു സർവേ അഭിപ്രായപ്പെട്ടു. ചരക്കുകളുടെ ആഗോള ഡിമാൻഡ് കുറയുന്നതു ബാഹ്യ സന്തുലിതാവസ്ഥയെ സമ്മർദത്തിലാക്കിയിട്ടുണ്ടെങ്കിലും ശക്തമായ സേവന കയറ്റുമതി ഇതിനെ വലിയ തോതിൽ സമതുലിതമാക്കിയെന്നാണു സാന്പത്തിക സർവേ വിലയിരുത്തിയത്.
കുതിച്ച് ഓണ്ലൈൻ വിപണി ഇന്ത്യയിലെ ഇ-കൊമേഴ്സ് വ്യവസായം 2030ഓടെ 35,000 കോടി ഡോളർ മറികടക്കാൻ സാധ്യതയുണ്ടെന്നാണു സാന്പത്തിക സർവേ പറയുന്നത്. ഇ-കൊമേഴ്സ് ഉൾപ്പെടെയുള്ള ആധുനിക റീട്ടെയിലിന്റെ വിഹിതം മൂന്നു മുതൽ അഞ്ചു വർഷത്തിനുള്ളിൽ മൊത്തം റീട്ടെയിലിന്റെ 30-35 ശതമാനമായി ഉയരും. സാങ്കേതിക മുന്നേറ്റങ്ങളും സർക്കാർ നയങ്ങളും പുതിയകാല ബിസിനസ് മോഡലുകളുമാണ് ഓണ്ലൈൻ വ്യാപാരത്തെ പരിപോഷിപ്പിച്ചത്.
ഡിജിറ്റൽ ഇന്ത്യ പരിപാടി, യുപിഐ, ഒരു ജില്ല-ഒരു ഉത്പന്നം (ഒഡിഒപി) ഓപ്പണ് നെറ്റ്വർക്ക് ഫോർ ഡിജിറ്റൽ കൊമേഴ്സ് (ഒഎൻഡിസി), പുതിയ വിദേശ വ്യാപാര നയം, എഫ്ഡിഐ പരിധികളിലെ ഇളവ്, ഇ-കൊമേഴ്സിനായുള്ള ഉപഭോക്തൃ സംരക്ഷണം ഭേദഗതി ചട്ടങ്ങൾ തുടങ്ങിയവ ഓണ്ലൈൻ വ്യാപാരത്തിന് പ്രോത്സാഹനമായി. പലചരക്കു സാധനങ്ങൾ അടക്കമുള്ളവയുടെ ഓണ്ലൈൻ ഓർഡറുകളിൽ 52 ശതമാനം വർധനയുണ്ട്.
എങ്കിലും വർധിച്ചുവരുന്ന ഓണ്ലൈൻ തട്ടിപ്പുകൾ, ഓണ്ലൈൻ വില്പനയ്ക്കുള്ള വൈദഗ്ധ്യത്തിലെ അപര്യാപ്ത, വ്യക്തികളുടെ വിവരങ്ങളിലെ സ്വകാര്യതാ പ്രശ്നങ്ങൾ എന്നിവ ഇന്ത്യയിലെ ഇ-കൊമേഴ്സിന്റെ വളർച്ചയ്ക്കു വെല്ലുവിളിയാണെന്ന് സാന്പത്തിക സർവേ ചൂണ്ടിക്കാട്ടി. ഇ-കൊമേഴ്സ് പ്ലാറ്റ്ഫോമുകളുടെ സുരക്ഷിത ഉപയോഗത്തെക്കുറിച്ച് ഉപയോക്താക്കളെ ബോധവത്കരിക്കേണ്ടത് അനിവാര്യമാണെന്നു സർവേ അഭിപ്രായപ്പെട്ടു.