പരിശുദ്ധ ത്രിത്വത്തിന്‍റെ അതിരറ്റ സ്നേഹവും കരുണയും നിരന്തരം ഹൃദയത്തിൽ അനുഭവിച്ച പിതാവ് ദൃഢവിശ്വാസത്തോടെ മറ്റുള്ളവരെ ഉപദേശിച്ചു: “ലോകത്തിലുള്ള എല്ലാവരും ദൈവത്തിന്‍റെ മക്കളാണെന്ന് നാം മറക്കരുത്. ദൈവം വിധിയാളനല്ല, കാരുണ്യവാനാണ്” (ഉപദേശം, 3). ഒരു നൂറ്റാണ്ടു നീണ്ട തന്‍റെ ജീവിതത്തിലുടനീളം താൻ കണ്ടുമുട്ടിയവരിലും സന്ദർശിച്ച ഭവനങ്ങളിലും പിതാവുമായി ബന്ധപ്പെട്ടിട്ടുള്ള എല്ലാവരിലും ഊഷ്മളമായ സ്നേഹത്തിന്‍റെ, സൗഹൃദത്തിന്‍റെ, സാന്ത്വനത്തിന്‍റെ, കരുണയുടെ, അതിലുപരി വിശുദ്ധിയുടെ വിത്ത് വിതയ്ക്കുവാൻ പിതാവിന് സാധിച്ചു. ത്രിത്വസ്നേഹത്താൽ ജ്വലിച്ച് “ആദ്യമായി സ്നേഹചൈതന്യത്തോടെ സ്വഭവനത്തിൽ ജീവിക്കുവാൻ പഠിക്കുക. അതിനുശേഷമാണ് ഭവനസന്ദർശനത്തിന് ഇറങ്ങേണ്ടത്” (ഉപദേശം, 3) എന്ന് തന്‍റെ ആത്മീയപുത്രിമാരോട് ആഹ്വാനംചെയ്ത ധന്യനായ പിതാവിന്‍റെ വാസസ്ഥലം, ജാതിമതഭേദമെന്യേ, ഏവർക്കും കൂടപ്പിറപ്പുസ്നേഹവും കരുണാർദ്രസ്നേഹവും ആതിഥ്യമര്യാദയും നിറഞ്ഞുനിൽക്കുന്ന ഒരു അഭയസ്ഥാനമായിരുന്നു.
“പുത്തൻചിറയുടെ വിയാനിയായും പിതാവായും” അറിയപ്പെടുന്ന വിതയത്തിൽ പിതാവിന് “പുത്തൻചിറയുടെ അഡ്വക്കേറ്റ്” എന്ന വിശേഷണം കൂടി നൽകുന്നതിൽ തെല്ലും അതിശയോക്തിയില്ല. കാരണം, ഇടവകയുടെ അകത്തും പുറത്തും ദൈവത്തിനും മനുഷ്യർക്കും ഇടയിലും, മനുഷ്യർ തമ്മിൽ തമ്മിലും അനുരഞ്ജനം സാധ്യമാക്കാൻ അർപ്പണബോധത്തോടെ പരിശ്രമിച്ച ഒരു യഥാർഥ അനുരഞ്ജകനായിരുന്നു വിതയത്തിൽ പിതാവ്. ജാതിമതഭേദമെന്യേ, എല്ലാവരെയും ശ്രവിക്കുന്നതിലും നയിക്കുന്നതിലും പിതാവിനുള്ള ക്ഷമയും കരുണയും ജ്ഞാനവും അസാധാരണമായിരുന്നു. പലപ്പോഴും പിതാവിന്‍റെ മുറിയുടെ മുന്പിൽ ധാരാളം ജനങ്ങൾ വന്നുനില്ക്കുമായിരുന്നു. തന്നോട് സംസാരിക്കുന്നവർക്ക് യുക്തമായ പരിഹാരമാർഗം പിതാവ് നിർദേശിച്ചു കൊടുത്തിരുന്നു. ജനങ്ങളുടെ പ്രശ്നങ്ങൾക്ക് പരിഹാരം നല്കുന്നതോടൊപ്പം തന്നെ അവരെ ദൈവത്തിലേക്ക് അടുപ്പിക്കാനും ഏറെ ശ്രദ്ധാലുവായിരുന്നു. പല കുടുംബകലഹങ്ങളും പിതാവിന്‍റെ മധ്യസ്ഥതയിൽ തീർക്കാൻ ജനങ്ങൾ പിതാവിന്‍റെ അടുത്തു വരുക പതിവായിരുന്നു.
കുടുംബങ്ങൾ തമ്മിലുള്ള ഭിന്നതയും വഴക്കുകളും തീർക്കാൻ വീടുകളിൽ പോയി വ്യക്തികളെ അനുരഞ്ജനപ്പെടുത്തിയതിനുശേഷം, അനുരഞ്ജനകൂദാശയ്ക്ക് അവരെ ഒരുക്കിയിരുന്നു. ചില സന്ദർഭങ്ങിൽ പരിശുദ്ധ കന്യകാമറിയത്തിന്‍റെ പ്രത്യേക ഇടപെടലുകളോടുകൂടി വിശുദ്ധ മറിയം ത്രേസ്യയോടൊപ്പം ഭവനങ്ങൾ സന്ദർശിച്ച് രോഗികളെയും മരണാസന്നരെയും കുന്പസാരിപ്പിക്കുകയും അവരെ നന്മരണത്തിന് ഒരുക്കുകയും അവർക്കുവേണ്ടി പ്രത്യേകം പ്രാർഥിക്കുകയും ചെയ്തിരുന്നു (ഡയറി, ഭാഗം 10). കൂടാതെ, മറ്റു മതസ്ഥരുടെയും ഭവനങ്ങൾ സന്ദർശിച്ച് രോഗികൾക്കുവേണ്ടി പിതാവ് പ്രാർഥിച്ചിരുന്നു.
പുത്തൻചിറ ഇടവകയിലെ തന്‍റെ ഇരുപത് വർഷത്തെ അജപാലനശുശ്രൂഷയ്ക്കുശേഷം വികാരിപദവിയിൽനിന്നു വിരമിച്ചിട്ടും തുടർന്നുള്ള 42 വർഷവും, അതായത് മരണംവരെയും, പിതാവ് തന്‍റെ കുടുംബവ്യക്തികേന്ദ്രീകൃത അജപാലനശുശ്രൂഷ ഏറെ വിശ്വസ്തതയോടെ നിറവേറ്റി. പഴയതിനെയെല്ലാം തച്ചുടയ്ക്കുന്ന, എന്തിലും ഏതിലും പുതുമ തേടുന്ന ഇന്നത്തെ സംസ്കാരത്തിന് വിപരീതമായി ധന്യൻ വിതയത്തിൽ പിതാവ് വിശുദ്ധ മറിയം ത്രേസ്യയുടെ കുടുംബപ്രേഷിത ദർശനത്തിനും ചൈതന്യത്തിനും ലേശം പോലും മങ്ങലേൽപ്പിക്കാതെ അതിനെ പരിപോഷിപ്പിക്കുകയും ഈ മഹനീയ ദൗത്യം തീക്ഷ്ണതയോടെ സഫലീകരിക്കാൻ സമൂഹതനയരെ പ്രചോദിപ്പിക്കുകയും പ്രോത്സാഹിപ്പിക്കുകയും ചെയ്തു.
കുടുംബങ്ങളുടെ സൂക്ഷിപ്പുകാരനായി സ്വർഗത്തിലിരുന്ന് ദൈവസ്നേഹത്തിന്‍റെ മാധുര്യം നുകർന്ന് ഇന്നും ഈ പുണ്യതാതൻ എല്ലാ കുടുംബങ്ങളുടെയും സമഗ്ര വളർച്ചയ്ക്കും ഉന്നമനത്തിനുമായി മാധ്യസ്ഥ്യം പ്രാർഥിക്കുന്നു.