ഈ വികസനതന്ത്രം പക്ഷേ ആഗ്രഹിച്ചതുപോലെ വിജയിച്ചില്ല. റോഡ് -റെയിൽ നിർമാണം കൂടുതൽ യന്ത്രവത്കൃതമായതിനാൽ തൊഴിൽവർധന ഉദ്ദേശിച്ചതുപോലെ സംഭവിച്ചില്ല. ടെലികോമിലും ഊർജമേഖലയിലും മൂലധന നിക്ഷേപം പ്രധാനമായും യന്ത്രങ്ങൾക്കും സാങ്കേതികവിദ്യക്കുമാണ് ഉപയോഗിക്കുന്നത്. അവ തൊഴിൽ കൂട്ടുന്നില്ല.
സ്വകാര്യമേഖല മൂലധന നിക്ഷേപം നടത്താത്തതിനാൽ കൂടുതൽ ഫാക്ടറികൾ കൂടുതൽ തൊഴിൽ ഉണ്ടാക്കുമെന്ന മോഹവും നടന്നില്ല. ഫലം? തൊഴിലില്ലായ്മ രൂക്ഷമായി തുടരുന്നു. ഉത്പാദനമേഖല വളർന്നുമില്ല. മേക്ക് ഇൻ ഇന്ത്യയും അതിന്റെ വകഭേദങ്ങളും അവതരിപ്പിച്ചിട്ടും സ്വകാര്യ മൂലധനനിക്ഷേപം മെച്ചപ്പെട്ടില്ല.
ഗതാഗതവും പാർപ്പിടവുംഎങ്കിലും ഇത്തവണയും ഈ സമീപനത്തിൽ മാറ്റം പ്രതീക്ഷിക്കുന്നില്ല. അടിസ്ഥാനസൗകര്യ വികസനത്തിനു ഗണ്യമായ തുക നീക്കിവയ്ക്കും. ഇടക്കാല ബജറ്റിൽ റോഡ്, റെയിൽവേ പദ്ധതികൾക്കു വിഹിതം കാര്യമായി വർധിപ്പിച്ചിരുന്നില്ല. തലേ വർഷത്തെ പുതുക്കിയ എസ്റ്റിമേറ്റിനേക്കാൾ റോഡിന് 0.6 ഉം റെയിൽവേക്ക് അഞ്ചും ശതമാനമേ വർധിപ്പിച്ചുള്ളൂ. ആ പോരായ്മ സമ്പൂർണ ബജറ്റിൽ തിരുത്തുമെന്നാണു പ്രതീക്ഷ. മൊത്തം 11.11 ലക്ഷം കോടി രൂപയാണ് ഇടക്കാല ബജറ്റിൽ മൂലധനച്ചെലവ്. അതു ഗണ്യമായി വർധിപ്പിക്കും എന്നാണു സൂചന.
പാർപ്പിടനിർമാണ മേഖലയ്ക്കു ബജറ്റ് വലിയ മുൻഗണന നൽകുമെന്നു സർക്കാർ വ്യക്തമാക്കിക്കഴിഞ്ഞു. ഗ്രാമീണ മേഖലയിൽ നടത്തുന്ന പ്രധാനമന്ത്രി ആവാസ് യോജന (പിഎംഎവെെ) വിപുലീകരിക്കും, നഗരങ്ങളിലെ ഇടത്തരക്കാർക്കും ദുർബല വിഭാഗങ്ങൾക്കുംവേണ്ടി പുതിയ സ്കീം പ്രഖ്യാപിക്കും; ഭവനവായ്പയ്ക്ക് നികുതി ഇളവ് വർധിപ്പിക്കും എന്നൊക്കെയാണു പ്രതീക്ഷകൾ. ഇതിൽ നല്ലപങ്ക് പ്രതീക്ഷകളും നടപ്പായെന്നു വരും. ഭവനവായ്പാ സ്ഥാപനങ്ങൾ മുതൽ റിയൽ എസ്റ്റേറ്റുകാരും സിമന്റ്, പെയിന്റ്, സ്റ്റീൽ, സാനിട്ടറി, ഇലക്ട്രിക്കൽ കേബിൾ, ഗൃഹോപകരണങ്ങൾ തുടങ്ങിയവയുടെ കമ്പനികളും ഇതിൽ നേട്ടമുണ്ടാക്കും.
ട്രംപ് വന്നാൽ പ്രതിരോധച്ചെലവ് കൂട്ടണംഅമേരിക്കയിൽ ഡോണൾഡ് ട്രംപ് പ്രസിഡന്റാകാനുള്ള സാധ്യത വർധിച്ചത് പ്രതിരോധ സന്നദ്ധത കൂട്ടാൻ ഇന്ത്യപോലുള്ള രാജ്യങ്ങളെ നിർബന്ധിതമാക്കും. ശീതയുദ്ധാനന്തര ലോകത്തിൽ ഉണ്ടായിരുന്ന സുരക്ഷാബോധം നഷ്ടമാക്കുന്നതാണ് പുതിയ സാഹചര്യം. സഖ്യരാജ്യങ്ങളിലായാലും മിത്ര രാജ്യങ്ങളിലായാലും ഇടപെടുന്ന രീതി ട്രംപ് ഭരണകൂടത്തിന് ഉണ്ടാവില്ല. ചെെനയും പാക്കിസ്ഥാനും ഉയർത്തുന്ന ഭീഷണികൾ പ്രതിരോധിക്കാൻ ഇന്ത്യ തനിയേ സജ്ജമാകേണ്ടതുണ്ട്. ഇതിനർഥം ഇന്ത്യ കൂടുതൽ തുക പ്രതിരോധ സമാഹരണത്തിനു മുടക്കണം എന്നതാണ്. ആയുധങ്ങളും ഉപകരണങ്ങളും സംവിധാനങ്ങളും വർധിപ്പിക്കുന്നതിനു മുന്പെന്നത്തേക്കാളും ആവശ്യവും പ്രാധാന്യവും ഉണ്ട്.
പ്രതിരോധ മേഖലയിലെ പല കമ്പനികളുടെയും ഓഹരികൾ സമീപകാലത്തു ലഭിച്ച ഓർഡറുകളുടെ ബലത്തിൽ കുതിച്ചുകയറി. ഓഹരിവില പത്തു മടങ്ങായ കാെച്ചിൻ ഷിപ്യാർഡ് തന്നെ ഉദാഹരണം. പ്രതിരോധ കമ്പനികൾക്ക് ഇനിയും കൂടുതൽ ഓർഡറുകൾ ലഭിച്ച് അവയുടെ ഓഹരികൾ വീണ്ടും കയറാം.
വരുമാനം കൂടുന്നു, നിർമല ഹാപ്പി! നിർമല സീതാരാമൻ ഇപ്പോൾ ഹാപ്പിയാണ് എന്നു വേണം കരുതാൻ. കാരണം ഇഷ്ടംപോലെ പണമുണ്ട്. നികുതിപിരിവ് പ്രതീക്ഷയിലധികം വർധിച്ചു. ജൂലൈ 11 വരെയുള്ള കണക്കനുസരിച്ച് പ്രത്യക്ഷ നികുതി പിരിവിൽ 19.54 ശതമാനമാണു വർധന. കഴിഞ്ഞ വർഷം 4.80 ലക്ഷം കോടി രൂപ കിട്ടിയ സ്ഥാനത്ത് ഈ വർഷം കിട്ടിയത് 5.74 ലക്ഷം കോടി.
നികുതിപിരിവിൽ 11 ശതമാനം മാത്രം വർധന ലക്ഷ്യമിട്ടാണു നിർമല ഫെബ്രുവരിയിൽ ഇടക്കാല ബജറ്റ് അവതരിപ്പിച്ചത്. ആദായനികുതി 10.43 ലക്ഷം കോടിയും കമ്പനി നികുതി 11.56 ലക്ഷം കോടിയുമടക്കം 22 ലക്ഷം കോടി രൂപ പ്രത്യക്ഷനികുതിയിൽ പ്രതീക്ഷിച്ചു. നികുതിപിരിവ് 18 മുതൽ 20 വരെ ശതമാനം വർധിച്ചേക്കാം എന്നാണ് ഇടക്കാല കണക്കു സൂചിപ്പിക്കുന്നത്. 22 ലക്ഷം കോടി എന്ന ലക്ഷ്യം കടന്ന് 24 ലക്ഷം കോടി രൂപയിലേക്ക് പ്രത്യക്ഷനികുതി എത്തിയാൽ ചെലവിടാൻ കൂടുതൽ തുക ലഭിക്കും. കഴിഞ്ഞ വർഷം കിട്ടുമെന്നു പുതുക്കിയ എസ്റ്റിമേറ്റിൽ കണക്കാക്കിയ തുകയേക്കാൾ കൂടുതൽ ഒടുവിൽ ലഭിച്ചു എന്നതും ഓർക്കണം.
മേയിൽ റിസർവ് ബാങ്കും നിർമലയ്ക്കു വലിയ സമ്മാനം നൽകി. റിസർവ് ബാങ്കിന്റെ ലാഭവീതമായി 2.11 ലക്ഷം കോടി രൂപ സർക്കാരിനു നൽകി. കഴിഞ്ഞ വർഷം 87,416 കോടി മാത്രം നൽകിയ സ്ഥാനത്താണിത്.
കേന്ദ്ര എക്സൈസ് ഡ്യൂട്ടി, കസ്റ്റംസ് ഡ്യൂട്ടി, ജിഎസ്ടി എന്നിവയിലും ശരാശരിയേക്കാൾ വർധനയുള്ളതായി ആദ്യ രണ്ടു മാസങ്ങളിലെ കണക്ക് കാണിക്കുന്നു. പാെതുമേഖലാ ബാങ്കുകൾ, എണ്ണക്കമ്പനികൾ, ധനകാര്യ സ്ഥാപനങ്ങൾ, മറ്റു പാെതുമേഖലാ കമ്പനികൾ എന്നിവയിൽനിന്നുള്ള ലാഭവീതത്തിലും ഗണ്യമായ വർധനയുണ്ട്. എല്ലാംകൂടി ധനമന്ത്രിക്കു സുഭിക്ഷകാലം.
ഈ നല്ല കാലംകൊണ്ടു നികുതിദായകർക്ക് ആശ്വാസം നൽകാൻ നിർമല തയാറാകില്ല. എങ്കിലും ബജറ്റിന്റെ വലുപ്പം 50 ലക്ഷം കോടി രൂപയിലേക്കു വർധിപ്പിക്കാൻ കഴിയും.