ഒരു വ്യക്തിക്കും അധികാരം തലയ്ക്കു പിടിക്കാതിരിക്കാൻ പാർട്ടികൾ നോക്കണമെന്ന് ആർഎസ്എസ് പലവട്ടം മുന്നറിയിപ്പു നല്കി. അധികാരം കൈയാളുന്നവരുടെ അഹങ്കാരത്തെക്കുറിച്ച് ആർഎസ്എസ് നൽകിയ മുന്നറിയിപ്പിനു പിന്നാലെ അധികാരികൾക്കു ദൈവമായി എന്ന തോന്നൽ വരുന്നതു വലിയ ആപത്താണെന്ന് ആർഎസ്എസ് അധ്യക്ഷൻ മോഹൻ ഭാഗവത് ഓർമിപ്പിച്ചു. ആർക്കാണ് ഭാഗവത് ഈ ഉപദേശം കൊടുത്തതെന്ന് എല്ലാവർക്കും അറിയാം. മോദിക്കെതിരേയുള്ള ഒളിയന്പായി കോണ്ഗ്രസ് നേതാവ് ജയറാം രമേശ് ഈ വാക്കുകളെ വ്യാഖ്യാനിച്ചു. അധികാരം തലയ്ക്കു പിടിച്ച ആർക്കും ചേരുന്ന തൊപ്പിതന്നെയാണിത്.
പുതുമയില്ലാത്ത നൂറുദിന പരിപാടിപിണറായി സർക്കാരിന്‍റെ നാലാമത് ശതദിന പരിപാടികൾ മുഖ്യമന്ത്രിതന്നെ പ്രഖ്യാപിച്ചു. ലോക്സഭാ തെരഞ്ഞെടുപ്പിന്‍റെ തിരിച്ചടിയിൽനിന്നു കരകയറാനാണ് പുതിയ 100 ദിന പരിപാടികൾ. 47 വകുപ്പുകൾ നടപ്പാക്കുന്ന 13,013.4 കോടിയുടെ പദ്ധതികളാണ് പിണറായി പ്രഖ്യാപിച്ചത്. ഇക്കാലത്ത് 700 പദ്ധതികൾ ഉദ്ഘാടനം ചെയ്യുകയും 364 പദ്ധതികൾ ആരംഭിക്കുകയും ചെയ്യും.
സർക്കാരിന്‍റെ പതിവു പരിപാടികൾ അല്ലാതെ പുതിയതൊന്നും ഈ 100 ദിന പരിപാടികളിൽ കണ്ടില്ല. പെൻഷൻ അടക്കം മറ്റു പല കാര്യങ്ങളെക്കുറിച്ചും വലിയ പരാതികൾക്കു പരിഹാരമായിട്ടുമില്ല. പണമടച്ചു കാത്തിരിക്കുന്ന 5.23 ലക്ഷം പേർക്കാണ് ഡ്രൈവിംഗ് ലൈസൻസ് കിട്ടാത്തത്.ഉദാഹരണങ്ങൾ നിരവധി. എല്ലാ സർക്കാർ സേവനങ്ങൾക്കും ചാർജ് വല്ലാതെ കൂട്ടുന്നു. ധനമന്ത്രിയുടെ ബി പ്ലാൻ വല്ലാതെ ദുഷിപ്പിക്കും.
രവീന്ദ്രൻ നായരും ലിഫ്റ്റുംതിരുവനന്തപുരം മെഡിക്കൽ കോളജിൽ ചികിത്സയ്ക്കെത്തിയ രോഗി 42 മണിക്കൂർ ലിഫ്റ്റിൽ കുടുങ്ങി ഒറ്റയ്ക്കു കഴിയേണ്ടിവന്നതു ഗിന്നസ് ബുക്കിൽ ചേർക്കപ്പെടാവുന്ന സംഭവമാകണം. നമ്മുടെ മെഡിക്കൽ കോളജ് ആശുപത്രികളുടെ പ്രവർത്തനത്തിൽ ഇനിയുമേറെ മുന്നോട്ടു പോകേണ്ടതുണ്ടെന്ന സൂചനയാണ് ഇതു നൽകുന്നത്.
സംഭവത്തിനുശേഷം ആരോഗ്യമന്ത്രി വീണാ ജോർജ് ചില പദ്ധതികൾ പ്രഖ്യാപിച്ചിട്ടുണ്ട്. ജീവനക്കാർക്ക് പരിശീലനം നിർബന്ധം, രോഗികളോടും കൂട്ടിരിപ്പുകാരോടും സഹാനുഭൂതിയോടെ പെരുമാറണം, മെഡിക്കൽ കോളജ് പ്രിൻസിപ്പൽമാരും ആശുപത്രി സൂപ്രണ്ടുമാരും നിരന്തരം ആശുപത്രിയിൽ സന്ദർശനം നടത്തണം, മെഡിക്കൽ കോളജുകളിലെ സുരക്ഷ സംബന്ധിച്ചു പ്രത്യേക യോഗം, ഓരോ വിഭാഗത്തിലും ചെക്ക് ലിസ്റ്റുകൾ ഏർപ്പെടുത്തും, ലിഫ്റ്റിൽ ഓട്ടോമാറ്റിക് റെസ്ക്യു ഡിവൈസ് സംഘടിപ്പിക്കും, ഓരോ ദിവസവും ലിഫ്റ്റ് താഴെ കൊണ്ടുവന്നു പരിശോധിച്ചു ലോക്ക് ചെയ്യണം... ഇങ്ങനെ നീളുന്നു പുതിയ നിർദേശങ്ങൾ. നിർദേശങ്ങളില്ലാത്തതല്ല, പാലിക്കാത്തതാണു പ്രശ്നം.
ലിഫ്റ്റുകൾ സംബന്ധിച്ച് ഇലക്‌ട്രിക്കൽ ഇൻസ്പക്ടറേറ്റ് പറയുന്ന ഉപാധികൾപോലും മെഡിക്കൽ കോളജുകളിൽ പാലിക്കുന്നില്ലെന്നാണ് പറയുന്നത്. ഇവയുടെ ലൈസൻസ് പുതുക്കുന്നുണ്ടോയെന്ന് ആർക്കും ഉറപ്പില്ല. റെസ്ക്യു സംവിധാനം ഉണ്ടെങ്കിൽ അഥവാ ലിഫ്റ്റിന് ഇടയ്ക്കു കേടു സംഭവിച്ചാലും ലിഫ്റ്റിലുള്ള ബാറ്ററി ഉപയോഗിച്ച് തൊട്ടടുത്ത നിലയിൽ എത്തേണ്ടതാണ്. ഒന്നും നടന്നില്ല. അതൊന്നും ഇല്ലെന്നു വ്യക്തം. രവീന്ദ്രൻ നായർ രക്ഷപ്പെട്ടു കഴിഞ്ഞപ്പോൾ മനുഷ്യാവകാശ കമ്മിഷൻ വരെ ഇടപെട്ടു. അനന്തരം എല്ലാം പഴയതുപോലെ!
രമേഷ് നാരായണും ആസിഫലിയുംകഴിഞ്ഞ തിങ്കളാഴ്ച കൊച്ചിയിലെ ക്രൗണ്‍പ്ലാസ ഹോട്ടലിൽ നടന്ന ഹൃദ്യമായ ചടങ്ങ് ഒരു വലിയ മനുഷ്യന്‍റെ ഹൃദയച്ചെറുപ്പംകൊണ്ട് വല്ലാത്ത അനുഭവമാക്കി. നടൻ ആസിഫലിയിൽനിന്നു സമ്മാനം വാങ്ങാൻ രമേഷ് നാരായൺ കാണിച്ച വൈമനസ്യമാണ് ചടങ്ങിൽ കരിനിഴൽ വീഴ്ത്തിയത്. ചടങ്ങിൽ രമേഷ് നാരായണെ സംഘാടകർ വേണ്ടതുപോലെ പരിഗണിക്കാത്തതിലുള്ള വിഷമവും സങ്കടവും അദ്ദേഹം മറ്റൊരു രീതിയിൽ പ്രകടിപ്പിച്ചതാണെന്ന വാദവുമുണ്ട്.
പക്ഷേ, ദൃശ്യം കണ്ട സോഷ്യൽ മീഡിയ രമേഷ് നാരായണെ ശരിക്കും കൈകാര്യം ചെയ്തു.
സംഭവം പെട്ടെന്നു വർഗീയമായി വരെ ചിത്രീകരിക്കാൻ തുടങ്ങി. അതാണ് കേരളം എത്തിച്ചേർന്നിരിക്കുന്ന ദുരന്ത മുനന്പ്. അതോടെ ആസിഫലി ഇടപെട്ടു. സ്നേഹത്തിനു നന്ദി. പക്ഷേ, തന്‍റെ പേരിൽ വിദ്വേഷം പടർത്തരുതെന്ന് അദ്ദേഹം അഭ്യർഥിച്ചു.
രമേഷ് നാരായൺ തന്നെ വിളിച്ചെന്നും എന്നാൽ അദ്ദേഹം തന്നോടു മാപ്പു പറയാൻ താൻ സമ്മതിക്കില്ലെന്നും ആസിഫലി പറഞ്ഞു. ആസിഫലിയുടെ ചിരിയിൽ പലർക്കും രമേഷ് നാരായണോടുള്ള ആദരവ് അലിഞ്ഞുപോയി എന്നതാണ് സത്യം. നമ്മുടെ പെരുമാറ്റംകൊണ്ട് മറ്റുള്ളവർക്ക് ഒരു രീതിയിലും പോരായ്മ ഉണ്ടാകാതിരിക്കാൻ എല്ലാവരും ശ്രദ്ധിച്ചിരുന്നെങ്കിൽ എത്ര നന്നായിരുന്നു.