എല്ലാ കാര്യത്തിലുമുള്ള അദ്ദേഹത്തിന്‍റെ സമീപനം നാം കണ്ടു പഠിക്കേണ്ടതായിരുന്നു. ഒപ്പമുള്ളവരുടെ വളര്‍ച്ച കണ്ടു സന്തോഷിക്കുന്ന അദ്ദേഹം അത് എപ്പോഴും പ്രകടമാക്കിയിരുന്നു. ഒപ്പം പ്രവര്‍ത്തിക്കുന്നവരുടെ സേവനങ്ങളാണ് ശ്രീ ചിത്രയുടെ നട്ടെല്ല് എന്ന് അദ്ദേഹം എന്നും പറഞ്ഞിരുന്നു.
1972ല്‍ അമേരിക്കയിലെ ഉപരിപഠനത്തിനുശേഷം തിരികെയെത്തിയ ഡോ. വല്യത്താന്‍ അന്നത്തെ മുഖ്യമന്ത്രിയായിരുന്ന സി. അച്യുതമേനോന്‍റെ നിര്‍ദേശപ്രകാരമാണ് രാജ്യത്തിനാകെ അഭിമാനമായ ശ്രീ ചിത്ര ഇന്‍സ്റ്റിറ്റ്യൂട്ട് പണിതുയര്‍ത്തിയത്. 20 വര്‍ഷത്തോളമാണ് ഡോ.വല്യത്താന്‍ ശ്രീ ചിത്ര ഇന്‍സ്റ്റിറ്റ്യൂട്ടില്‍ ഹൃദയ ശസ്ത്രക്രിയാ വിഭാഗത്തില്‍ പ്രഫസറും ഡയറക്ടറുമായി സേവനമനുഷ്ഠിച്ചത്. ശ്രീ ചിത്രയിലെ സേവനകാലയളവില്‍ കൃത്രിമ വാല്‍വുകളുടെ നിര്‍മാണത്തില്‍ അദ്ദേഹം വഹിച്ച പങ്ക് വളരെ വലുതാണ്.
വിദേശത്തുനിന്നു വലിയ തുക കൊടുത്തു വാങ്ങിയിരുന്ന വാല്‍വുകള്‍ അദ്ദേഹം ശ്രീ ചിത്രയില്‍തന്നെ കുറഞ്ഞ ചെലവില്‍ നിര്‍മിച്ചു. ഈ കൃത്രിമ ഹൃദയവാല്‍വ് ഒരു ലക്ഷത്തിലധികം രോഗികളില്‍ വച്ചുപിടിപ്പിച്ചിട്ടുണ്ട്. ശ്രീ ചിത്രയില്‍നിന്നു വിരമിച്ച അദ്ദേഹം മണിപ്പാല്‍ സര്‍വകലാശാലയുടെ ആദ്യ വൈസ് ചാന്‍സലറായി സ്ഥാനമേറ്റു.