മോഷണം അടക്കമുള്ള അതിക്രമങ്ങള് വര്ധിച്ചതോടെ വിവിധ റസിഡന്റ്സ് അസോസിയേഷനുകളുടെ നേതൃത്വത്തില് സിസിടിവികള് സ്ഥാപിച്ച് മുന്കരുതല് ഒരുക്കിയിട്ടുണ്ട്. എങ്കിലും പൊതുജനങ്ങളുടെ സുരക്ഷയെ മുന്നിര്ത്തി ഇതരസംസ്ഥാനക്കാരുടെ വിവരശേഖരണം നടത്തി അതിക്രമങ്ങള് കുറയ്ക്കുന്നതിനാവശ്യമായ നടപടികള് അധികൃതര് സ്വീകരിക്കണമെന്നാണ് പ്രദേശവാസികളുടെ ആവശ്യം.
ഒറ്റ ദിവസം, 30 കേസ് ലഹരിവസ്തുക്കളുടെ വില്പന വ്യാപകമാണെന്ന പരാതികള് ഉയര്ന്നതോടെ ഒന്നരമാസം മുമ്പ് നഗരത്തില് ഇതരസംസ്ഥാന തൊഴിലാളികള് തമ്പടിക്കുന്ന പ്രദേശങ്ങളില് പോലീസ് നടത്തിയ മിന്നല് പരിശോധനയില് ലക്ഷങ്ങള് വിലവരുന്ന ലഹരിവസ്തുക്കള് പിടികൂടിയിരുന്നു. കഞ്ചാവ്, എംഡിഎംഎ, ഹെറോയിന്, നിരോധിത പുകയില ഉത്പന്നങ്ങള് തുടങ്ങിയവ താമസസ്ഥലത്തുനിന്നടക്കമാണ് പിടിച്ചെടുത്തത്.
30 കേസുകളാണ് ഈ ഒരുദിവസം മാത്രം പോലീസ് രജിസ്റ്റര് ചെയ്തത്. എറണാകുളം റൂറലില് ദിവസേന രജിസ്റ്റര് ചെയ്യുന്ന കേസുകളില് ഇതരസംസ്ഥാനക്കാര് പ്രതികളാകുന്ന കേസുകള് നിത്യസംഭവമാണ്. സ്ത്രീകള് പൊതുനിരത്തില് അടി കൂടുന്നതും കുട്ടികള് ഉള്പ്പെടെയുള്ളവരുടെ സാന്നിധ്യത്തില് പൊതുസ്ഥലങ്ങളില് മദ്യപിക്കുന്നതും പ്രദേശത്തെ സ്ഥിരം കാഴ്ചയാണ്. ഇതോടൊപ്പം ലൈംഗികാതിക്രമ കേസുകളും പെരുകുകയാണ്.
ഇതരസംസ്ഥാന തൊഴിലാളികളെ പ്രദേശത്തെ വിവിധ സ്ഥാപനങ്ങളും നിർമാണ മേഖലയുൾപ്പടെ വിവിധ തൊഴിൽരംഗങ്ങളും ഉപയോഗപ്പെടുത്തുന്നുണ്ടെന്നതു വസ്തുതയാണ്. അതേസമയം, അവർക്കിടയിലെ ചിലരുണ്ടാക്കുന്ന പ്രശ്നങ്ങളും അതുമൂലം പൊതുസമൂഹത്തിനുണ്ടാകുന്ന ബുദ്ധിമുട്ടുകളും പരിഹരിക്കാൻ ഫലപ്രദമായ നടപടികളാണ് നിയമപാലകരിൽനിന്ന് പെരുന്പാവൂർ നിവാസികൾ പ്രതീക്ഷിക്കുന്നത്.