1965ൽ അഖിലകേരള കത്തോലിക്കാ കോൺഗ്രസ് പ്രസിഡന്റായി ഐകകണ്ഠ്യേന തെരഞ്ഞെടുക്കപ്പെട്ടു. കത്തോലിക്കാ കോൺഗ്രസിന്റെ സുവർണകാലമായിരുന്നു ജസ്റ്റീസ് വിതയത്തിൽ പ്രസിഡന്റായിരുന്ന കാലഘട്ടമെന്നാണ് ജോൺ കച്ചിറമറ്റം രേഖപ്പെടുത്തിയിരിക്കുന്നത്. ലോട്ടറി നടത്തിപ്പിലൂടെ ഒന്നേമുക്കാൽ ലക്ഷം രൂപയുടെ മൂലധന സമാഹരണം, ഭൂരഹിതർക്കായി കോളനൈസേഷൻ പദ്ധതി വഴി മലബാറിൽ സ്ഥലംവാങ്ങൽ, എറണാകുളത്ത് സ്വന്തമായി സ്ഥലവും കെട്ടിടവും, അംഗസംഖ്യയിൽ ആറ് ഇരട്ടിയുടെ വർധന, തൊഴിൽരഹിതർക്കായി എംപ്ലോയ്മെന്റ് ബ്യൂറോ, യുവജനങ്ങളെ ആകർഷിക്കുന്നതിനായി യുവജനപ്രസ്ഥാനം ഇതൊക്കെ വിതയത്തിലിന്റെ കാലഘട്ടത്തിലെ പ്രധാന സംഭാവനകളാണ്.
1953ൽ ഷെവലിയർ സ്ഥാനവും 1964ൽ ഗ്രാൻഡ് ഷെവലിയർ സ്ഥാനവും നൽകി മാർപാപ്പ അദ്ദേഹത്തെ ആദരിച്ചു. 1983ൽ കത്തോലിക്കാ കോൺഗ്രസ് അവാർഡും 1989ൽ കേരള സഭാതാരം അവാർഡും ലഭിച്ചിട്ടുണ്ട്.
ക്രൈസ്തവ സഭാ മേലധ്യക്ഷന്മാരും സ്ഥാപനാധികാരികളും ന്യൂനപക്ഷാവകാശവും വിദ്യാഭ്യാസ പ്രശ്നങ്ങളും സംബന്ധിച്ച് ഉപദേശം തേടിയിരുന്നത് ജസ്റ്റീസ് ജോസഫ് വിതയത്തിലിനോടായിരുന്നു. ഭരണഘടനയുടെ മുപ്പതാം വകുപ്പിന്റെ ചരിത്രപശ്ചാത്തലവും വ്യാപ്തിയും വിശകലനം ചെയ്യുന്ന ആധികാരികമായൊരു ഗ്രന്ഥം രചിച്ചിട്ടുണ്ട്.
ആലങ്ങാട് ഔസേപ്പ് മാനാടന്റെ മകൾ ത്രേസ്യാക്കുട്ടിയായിരുന്നു സഹധർമിണി. സീറോ മലബാർ സഭാ മേജർ ആർച്ച്ബിഷപ്പായിരുന്ന കർദിനാൾ മാർ വർക്കി വിതയത്തിൽ, പ്രഫ. ജോസഫ്, പ്രഫ. പോൾ, സിസ്റ്റർ മരിയ ത്രേസ്യ, ഡോ. ജോൺ, ഡോ. ഫ്രാൻസിസ്, പ്രഫ. മേരി ആന്റിയോ എന്നിവരാണ് മക്കൾ.1992 ജൂൺ 10ന് അന്തരിച്ചു.