ജോണ് സ്റ്റുവർട്ട് ബ്ലാക്കിയുടെ "സെൽഫ് കൾച്ചർ' ആത്മസംസ്കാരം എന്ന പേരിലും വിവർത്തനം ചെയ്തു. ജീവിതവിജയം കൈവരിക്കാൻ പ്രജ്ഞാസംസ്കാരം, ശരീരസംസ്കാരം, ആചാരസംസ്കാരം എന്നീ ഉപാധികൾ വിവരിക്കുന്ന ഈ ഗ്രന്ഥം ബിഎ ക്ലാസിൽ പാഠപുസ്തകമായിരുന്നു.
മനഃശാസ്ത്രതത്വങ്ങൾ വിവരിക്കുന്ന അദ്ദേഹത്തിന്റെ "മനസിന്റെ മാനദണ്ഡം' (1920) ട്രെയിനിംഗ് സ്കൂൾ വിദ്യാർഥികൾക്കു പാഠപുസ്തകമായിരുന്നു. കുഞ്ചൻ നന്പ്യാരുടെ കൃതികളിലേക്കുള്ള പ്രവേശകമായ "സാഹിത്യവിഹാരം’, സന്മാർഗകഥകൾ അടങ്ങിയ "ബാലാലാപം’ എന്നീ കൃതികൾ കുട്ടികൾക്കുവേണ്ടി എഴുതിയതാണ്.
മഹാരാജാസ് ഹൈസ്കൂളിൽ പ്രവർത്തിക്കുന്പോൾ 1906ൽ മദ്രാസ് സർവകലാശാല അദ്ദേഹത്തെ അസിസ്റ്റന്റ് എക്സാമിനർ ആയും 1908ൽ തിരുവിതാംകൂർ ഗവണ്മെന്റ് രാജകൊട്ടാരത്തിലെ ട്യൂട്ടറായും നിയമിച്ചു.
1911ൽ തിരുവനന്തപുരം ട്രെയിനിംഗ് കോളജിൽ സീനിയർ ലക്ചറർ ആയി നിയമനം ലഭിച്ചു. വിദ്യാഭ്യാസവകുപ്പിൽ റേഞ്ച് ഇൻസ്പെക്ടർ തസ്തികയിൽ കോട്ടയത്തും കൊല്ലത്തും പ്രവർത്തിച്ചിട്ടുണ്ട്. ഇക്കാലത്തു പുതിയ സ്കൂളുകൾ തുടങ്ങാൻ അദ്ദേഹം നേതൃത്വം നൽകി.
ഒന്നാം ലോകമഹായുദ്ധകാലത്ത് 1914ൽ റിക്രൂട്ടിംഗ് ഓഫീസറായി അദ്ദേഹത്തെ ഗവണ്മെന്റ് നിയോഗിച്ചു. തിരുവിതാംകൂറിന്റെ വിവിധ ഭാഗത്തു ക്യാന്പുകൾ തുടങ്ങിയാണ് സൈനികസേവനത്തിലേക്ക് ആളുകളെ അദ്ദേഹം റിക്രൂട്ട് ചെയ്തത്. അതിനായി ലേഖനങ്ങൾ എഴുതുകയും പ്രഭാഷണങ്ങൾ നടത്തുകയും ചെയ്തു.
റിക്രൂട്ടിംഗ് ഓഫീസറായി നടത്തിയ മികച്ച സേവനങ്ങളെ മുൻനിർത്തിയാണ് ബ്രിട്ടീഷ് റസിഡന്റ് അദ്ദേഹത്തിനു റാവുസാഹിബ് ബഹുമതി നൽകിയത്. വെർണാക്കുലർ സ്കൂൾ ചീഫ് ഇൻസ്പെക്ടർ ആയിട്ടാണ് അദ്ദേഹം സർക്കാർ ജോലിയിൽനിന്നു 1929ൽ വിരമിച്ചത്. തുടർന്നു നിവർത്തന പ്രക്ഷോഭത്തിലും സമുദായ പ്രവർത്തനങ്ങളിലും മറ്റും പങ്കാളിയായി.
1944 ഫെബ്രുവരി ഒന്നിന് റാവു സാഹിബ് ഒ.എം. ചെറിയാന് അന്തരിച്ചു. പുതുപ്പള്ളി കന്നുകുഴിയില് കൊച്ചുതൊമ്മന് അപ്പോത്തിക്കിരിയുടെ മകള് അച്ചാമ്മയാണ് ഭാര്യ. മക്കള്: പരേതരായ പ്ലാന്റര് ഒ.സി. മാത്യു, മറിയാമ്മ, അന്നാമ്മ, അച്ചാമ്മ.
ആദ്യ ഡിറ്റക്ടീവ് നോവൽഒ.എം. ചെറിയാന്റെ മിസ്റ്റർ കെയ്ലി, കാലന്റെ കൊലയറ തുടങ്ങിയ രചനകൾ മലയാളത്തിൽ ഒരു നവീന സാഹിത്യപ്രസ്ഥാനത്തിന്റെ തുടക്കമായിരുന്നെങ്കിലും നോവൽ സാഹിത്യചരിത്രങ്ങളിലൊന്നും അദ്ദേഹത്തിന്റെ നാമം പരാമർശിക്കപ്പെട്ടില്ല.
"മിസ്റ്റർ കെയ്ലി'യാണ് മലയാളത്തിലെ ആദ്യത്തെ ഡിറ്റക്ടീവ് നോവൽ. ഭാഷാപോഷിണിയിൽ 1076ൽ (1900) കന്നി മുതൽ കുംഭം വരെയുള്ള ആറു ലക്കങ്ങളിലായിട്ടാണ് ഈ കുറ്റാന്വേഷണ കഥ ആദ്യമായി പ്രസിദ്ധീകരിച്ചത്.
ഈ അപസർപ്പകകഥ ഇന്നത്തെ നോവൽ രൂപമുള്ള ഒരു നീണ്ടകഥയാണ്. മലയാളത്തിൽ പത്തൊന്പതാം നൂറ്റാണ്ടിൽ കുറ്റാന്വേഷണകഥകളും സംഭ്രമജനകമായ കഥകളും രചിക്കപ്പെട്ടു കാണാത്തതുകൊണ്ട്, സർ ആർതർ കൊണൻ ഡോയൽ ഷെർലക് ഹോംസിനെ നായകനാക്കി രചിച്ച കുറ്റാന്വേഷണ കഥകളെ അനുകരിച്ച്, ഒ.എം. ചെറിയാൻ മിസ്റ്റർ കെയ്ലിയെ മലയാളത്തിൽ അവതരിപ്പിക്കുകയാണ് ചെയ്തത്. മറ്റൊരു കഥാപാത്രത്തെ നായകനാക്കി ഒ.എം. ചെറിയാൻ പിന്നീട് ഒരു ഡിറ്റക്ടീവ് നോവൽ കൂടി എഴുതി, "കാലന്റെ കൊലയറ'എന്ന പേരിൽ. ഒരു ഇംഗ്ലീഷ് കഥയെ അനുകരിച്ചാണ് അദ്ദേഹം ഈ നോവൽ എഴുതിയത്.
സരസ്വതി നദിയുടെ അന്തർവാഹിനിയെ കണ്ടിട്ടുള്ള കാലപുരോഹിതന്മാരെ ചുറ്റിപ്പറ്റി നൂർജിഹാൻപുരം പശ്ചാത്തലമാക്കി അവതരിപ്പിക്കുന്ന ഒരു കുറ്റാന്വേഷണ കഥയാണ് "കാലന്റെ കൊലയറ'. പത്തൊന്പതാം നൂറ്റാണ്ടിന്റെ അന്ത്യത്തിലും ഇരുപതാം നൂറ്റാണ്ടിന്റെ തുടക്കത്തിലുമായി ഇത്തരത്തിലുള്ള നവീനഗദ്യപരിശ്രമങ്ങൾ ഒ.എം. ചെറിയാൻ നടത്തിയതു മലയാള ഗദ്യത്തിന്റെ വളർച്ചയെയും സ്വാധീനിച്ചു.
ഡിറ്റക്ടീവ് നോവൽ ക്ലാസിക്കൽ മൂല്യങ്ങൾ നിലനിർത്തുന്ന സാഹിത്യരൂപമാണെന്നാണ് അദ്ദേഹം തെളിയിച്ചത്. മലയാള സാഹിത്യത്തിൽ പുതുപാതകൾ വെട്ടിത്തുറന്ന പ്രതിഭാശാലിയായ റാവു സാഹിബ് ഒ.എം. ചെറിയാന് അർഹമായ അംഗീകാരം നൽകാന് ഇനിയും അമാന്തിക്കുന്നതു കൃതഘ്നതയാണ്.