ഗ്രാമപഞ്ചായത്ത് തലംരാജ്യത്തു നിലവിൽ 1.6 ലക്ഷം ഗ്രാമപഞ്ചായത്തുകളിലും പ്രാഥമിക സഹകരണ സംഘങ്ങൾ പ്രവർത്തിക്കുന്നില്ല. മൃഗസംരക്ഷണ സഹകരണ സൊസൈറ്റികൾ ഇല്ലാത്ത രണ്ടു ലക്ഷം ഗ്രാമപഞ്ചായത്തുകളുണ്ട്. കർഷകർക്കും അനുബന്ധ കാർഷിക പ്രവർത്തനങ്ങളിൽ ഏർപ്പെടുന്ന ഇതര ഗ്രാമനിവാസികൾക്കും ചെറുകിട വായ്പകൾ ലഭ്യമാക്കാൻ നബാർഡ്, നാഷണൽ ഫിഷറീസ് ഡെവലപ്മെന്റ് ബോർഡ് എന്നിവ പ്രവർത്തിക്കുന്നുണ്ടെങ്കിലും പ്രവർത്തനം സംബന്ധിച്ച ഏകീകൃത രീതിയിലുള്ള വിവരങ്ങൾ ലഭ്യമല്ലാത്തതു പോരായ്മയാണ്.
അടിസ്ഥാന സൗകര്യംകാർഷിക പഞ്ചായത്തുതല അടിസ്ഥാന സൗകര്യങ്ങൾ, മണ്ണു പരിശോധന, വളം നിർമാണം, വിതരണം, കോൾഡ് സ്റ്റോറേജുകൾ, ശേഖരണ സംസ്കരണ സംവിധാനങ്ങൾ, ബയോഫോളിക് കുളങ്ങൾ, മാർക്കറ്റിംഗ് യാർഡുകൾ എന്നിങ്ങനെ അനേക അടിസ്ഥാനസൗകര്യങ്ങൾ സഹകരണ മേഖലയിലൂടെ ഏർപ്പാടാക്കാൻ സാധിച്ചിട്ടുണ്ട്. എന്നാൽ, അഴിമതിയും നടക്കുന്നുണ്ട്. കരുവന്നൂർ സഹകരണ ബാങ്ക് അഴിമതിതന്നെ ഉദാഹരണം. സുതാര്യമായി ഇവ വിലയിരുത്താൻ കഴിയുന്ന സംവിധാനങ്ങൾ ഉണ്ടാകണം.
ഇ നാം പ്ലാറ്റ് ഫോം2016ൽ ആരംഭിച്ച ഇ നാം ഡിജിറ്റൽ പ്ലാറ്റ് ഫോം ഓൺലൈൻ മാർക്കറ്റിംഗ് സംവിധാനം കർഷകർക്ക് എപിഎംസികൾ, എഫ്പിഒകൾ എന്നിവ മുഖേന ആധുനിക ഇ-മാർക്കറ്റിംഗ് സൗകര്യങ്ങൾ, ആധുനിക ഡ്രോണ് മെഷീനുകളുടെ ഉപയോഗം എന്നിവ ലഭ്യമാക്കി. നൂറു ശതമാനം സർക്കാർ ചെലവിലാണ് ഡ്രോൺ സംവിധാനമൊക്കെ ലഭിക്കുന്നത്. തുടക്കത്തിൽ 250 എപിഎംസികൾ ഇ നാമുമായി ബന്ധിപ്പിച്ചിരുന്നത് 2023ൽ 138 എണ്ണത്തിലെത്തി. ഓണ്ലൈനിൽ മാർക്കറ്റിംഗിനായി 209 ഫലവർഗ ഇനങ്ങൾ ഈ പോർട്ടലിൽ ഇടം പിടിച്ചു. നാളിതുവരെ 1.8 കോടി കർഷകരും 2.5 ലക്ഷം വ്യാപാരികളും പുതുതായി ഈ പോർട്ടലിൽ രജിസ്റ്റർ ചെയ്തിട്ടുണ്ട്. വില്പന 2017ൽ 0.30 കോടി രൂപയായിരുന്നത് 2023ൽ മൂന്നു ലക്ഷം കോടിയായി. ഈ ഓൺലൈൻ മാർക്കറ്റിംഗ് സംവിധാനം സാധാരണ കർഷകർക്ക് എത്ര പ്രയോജനപ്പെട്ടുവെന്ന് വിലയിരുത്തേണ്ടതുണ്ട്.
സോഫ്റ്റ് ദേശീയ നെറ്റ് വർക്ക്സ്നബാർഡിന്റെ മേൽനോട്ടത്തിൽ നിലവിൽ 62,318 പ്രാഥമിക അഗ്രികൾച്ചർ സഹകരണ സൊസൈറ്റികൾ ദേശീയ സോഫ്റ്റ്വേർ നെറ്റ്വർക്കിന്റെ ഭാഗമായിട്ടുണ്ട്. എളുപ്പത്തിൽ കർഷകർക്കു വായ്പ ലഭ്യമാക്കുകയാണ് ഈ സോഫ്റ്റ്വേറിന്റെ ലക്ഷ്യം. ഇവ കർഷകർക്ക് എത്രത്തോളം പ്രയോജനപ്പെടുന്നുവെന്ന് കാണാനിരിക്കുന്നതേയുള്ളൂ. കർഷകർക്കാണോ കർഷകേതരർക്കാണോ ഇതു കൂടുതൽ പ്രയോജനപ്പെടുന്നതെന്നും പഠനവിധേയമാക്കണം.
അഗ്രിസ്റ്റാക്ക്കേന്ദ്ര ഗവണ്മെന്റിന്റെ കൃഷിവകുപ്പിനു കീഴിൽ ആരംഭിച്ചിരിക്കുന്ന പുതിയ ഡിജിറ്റൽ ഫൗണ്ടേഷനാണ് ‘അഗ്രിസ്റ്റാക്ക്’. മെച്ചപ്പെട്ട കൃഷി നടത്തിപ്പിന് ഡാറ്റകൾ, സേവനങ്ങൾ, ഉപദേശങ്ങൾ എന്നിവ ലഭ്യമാകും.
അഞ്ച് മുഖ്യലക്ഷ്യങ്ങൾ:1. സർക്കാർ സംവിധാനങ്ങൾ, സേവനങ്ങൾ എന്നിവ ത്വരിതഗതിയിൽ കർഷകരിലെത്തിക്കുക.
2. അർഹതപ്പെട്ട ഗുണഭോക്താക്കളെ - കർഷകരെ തെരഞ്ഞെടുക്കാൻ സഹായിക്കുക.
3. കാർഷികസേവനങ്ങൾ ലഭ്യമാകുന്നതിനാൽ കർഷകർക്കുള്ള കഷ്ടനഷ്ടങ്ങൾ കുറയ്ക്കുക.
4. മികവുറ്റ ഏകോപനങ്ങൾ എല്ലാ കാർഷികതലങ്ങളിലും ഏർപ്പാടാക്കുക.
5. ത്വരിതഗതിയിലുള്ള കാർഷിക നവീകരണം, ഉത്പാദനം, സേവനതലങ്ങളിൽ അഗ്രിടെക്കുകളുടെ സഹായത്തോടെ മികച്ച ഡാറ്റകൾ ഉപയോഗപ്പെടുത്തി നടപ്പിലാക്കുക.
ഈ പുതുസംവിധാനത്തിന്റെ ആവശ്യകത എവിടെ, ആർക്ക്, എപ്പോൾ, എപ്രകാരം വേണമെന്നു രൂപപ്പെടുത്തുക വലിയ വെല്ലുവിളിയായി തുടരുന്നു. പുതുമ അവകാശപ്പെടാനില്ലാത്ത വെറും വാചകമടി മാത്രമായി ഇതു മാറുമോയെന്നതാണു ചോദ്യം. കൃഷി - സഹകരണ മന്ത്രാലയങ്ങളിൽ നിലവിലുള്ള ഭരണസംവിധാനങ്ങൾക്കുമേൽ പരാമർശിച്ച അഞ്ചു തലങ്ങളിലെ ഉത്തരവാദിത്വങ്ങൾ നിറവേറ്റാൻ കഴിയില്ലേ? കഴിയേണ്ടതുണ്ട്.
(തുടരും)