ഭാവനാശേഷി, സഹാനുഭൂതി, മനസിനു സന്തോഷം നൽകുന്ന അനുഭവങ്ങൾ തുടങ്ങിയവ വ്യക്തിത്വവികസന പരിശീലനങ്ങളിലൂടെ ഉത്തേജിപ്പിക്കാമെന്നും വ്യക്തിയുടെ മസ്തിഷ്കത്തിലുള്ള എല്ലാ കാര്യങ്ങളും കംപ്യൂട്ടറിന്റെ കൃത്രിമ തലച്ചോറിലേക്കു പകർത്താൻ സാധിക്കുമെന്നും ഈ സിദ്ധാന്തത്തിന്റെ വക്താക്കൾ വിശ്വസിക്കുന്നു. മനുഷ്യന്റെ സർവ ആഗ്രഹങ്ങളും പൂർത്തീകരിക്കാനുള്ള സാങ്കേതികവിദ്യയായി ട്രാൻസ്ഹ്യുമനിസത്തെ ഇവർ നോക്കിക്കാണുന്നു. അസുഖങ്ങളും വേദനയുമില്ലാത്ത മനുഷ്യജീവിതം ഇവർ സ്വപ്നം കാണുന്നു. അതു കുറച്ചുകൂടി കടന്ന്, ശാസ്ത്ര-സാങ്കേതിക വിദ്യകളിലൂടെ മരണത്തെ വരെ മറികടക്കാമെന്ന അതിമോഹവും അവർ വച്ചുപുലർത്തുന്നു.
മനുഷ്യരെപ്പോലെ!മനുഷ്യരെപ്പോലെ പെരുമാറുന്ന യന്ത്രമനുഷ്യർ (പോസ്റ്റ്ഹ്യുമൻസ്) ആയിരിക്കും ഭാവിയിലുണ്ടാകാൻ പോകുന്നതെന്നാണ് ഇവരുടെ പ്രതീക്ഷ. ജനിതകവൈകല്യങ്ങൾ ഇല്ലാതാക്കാനും ശാരീരിക-മാനസിക സ്വഭാവസവിശേഷതകൾ കൂട്ടാനും മറ്റുമുള്ള സാങ്കേതികവിദ്യാ ശാസ്ത്രം വികസിപ്പിച്ചു കഴിഞ്ഞതായി ട്രാൻസ്ഹ്യുമനിസ്റ്റുകൾ പറയുന്നു. പോസ്റ്റ്ഹ്യുമൻ സൃഷ്ടിക്കൽ സംബന്ധിച്ച ഗവേഷണം ലോകത്തിന്റെ വിവിധ ഭാഗങ്ങളിൽ ഇവർ ആവേശത്തോടെ നടത്തുകയാണ്. നെഗറ്റീവ് സ്വഭാവസവിശേഷതകൾ നിയന്ത്രിക്കാനുള്ള ‘മരുന്നുകളും’ വികസിപ്പിക്കാൻ തീവ്രമായ ആഗ്രഹത്തോടെ ശ്രമിക്കുന്നു.
എതിർക്കുന്നവർ നിരവധിഈ ദാർശനിക ബൗദ്ധികപ്രസ്ഥാനത്തിന്റെ ആശയങ്ങളെ എതിർക്കുന്നവരും സജീവമാണ്. മതപരമായ വിയോജിപ്പുകൾ എടുത്തുപറയേണ്ടതാണ്. മനുഷ്യന്റെ പ്രകൃതിദത്തമായ അവസ്ഥയെ മാറ്റിയെഴുതുന്നത് ശരിയല്ലെന്ന് ചൂണ്ടിക്കാണിക്കപ്പെടുന്നു. കുറവുകളില്ലാത്ത മനുഷ്യനിലേക്കു മാത്രമാണ് ഈ സാങ്കേതിക ആശയത്തിന്റെ നോട്ടം. ട്രാൻസ്ഹ്യുമനിസത്തെ, യൂജെനിക്സിലൂടെ മനുഷ്യരാശിയെ മെച്ചപ്പെടുത്താനുള്ള നാസി പദ്ധതിയുമായി ചിലർ താരതമ്യപ്പെടുത്തുന്നു. എന്നാൽ, ഇതിനെ തത്വചിന്തകനായ സ്റ്റെഫാൻ ലോറൻസ് സോർഗ്നർ എതിർക്കുന്നു. നാസികൾ ഏകാധിപത്യ രാഷ്ട്രീയ വ്യവസ്ഥയെ അനുകൂലിക്കുമ്പോൾ, ട്രാൻസ്ഹ്യുമനിസ്റ്റുകൾ ലിബറൽ ജനാധിപത്യത്തിന്റെ മൂല്യമാണ് ഉയർത്തിപ്പിടിക്കുന്നതെന്നതാണ് അദ്ദേഹം അവകാശപ്പെടുന്നത്.
പരിവർത്തനങ്ങളോടുകൂടിയ മനുഷ്യനെയാണ് ട്രാൻസ്ഹ്യുമനിസം വിഭാവനം ചെയ്യുന്നത്. ജനറ്റിക് എൻജിനിയറിംഗ്, ബയോ ടെക്നോളജി, റീജനറേറ്റീവ് മെഡിസിൻ തുടങ്ങിയവയുടെ സഹായത്തോടെ ദീർഘായുസിനോ മരണത്തെ വരെ മറികടക്കാനോ സാധിക്കുമെന്നു കരുതുന്ന പുത്തൻ ശാസ്ത്ര-സാങ്കേതികവിദ്യ വികസിപ്പിക്കാനുള്ള യത്നത്തിലാണ് ട്രാൻസ്ഹ്യുമനിസ്റ്റുകൾ. കൃത്രിമബുദ്ധി (എഐ)യും അവർ പ്രയോജനപ്പെടുത്തുന്നു.
(ലേഖകൻ പത്തനംതിട്ട ജില്ലാ ക്രൈംബ്രാഞ്ച് സബ് ഇൻസ്പെക്ടറും ജില്ലാ പോലീസ് മീഡിയ സെല്ലിന്റെ ചുമതല വഹിക്കുന്നയാളുമാണ്)