രേഖകൾ എവിടെ?പ്രതികളാകുന്നവരെക്കുറിച്ച് അന്വേഷിക്കുന്പോഴാണ് രേഖകൾ പലതും വ്യാജമാണെന്നു തെളിയുന്നത്. താത്കാലികലാഭം നോക്കി രാഷ്ട്രീയക്കാർ ഇത്തരക്കാരെ പിന്തുണയ്ക്കാൻ ഇറങ്ങുന്നതാണ് വലിയ വിനയായി മാറുന്നത്. രാഷ്ട്രീയ ഇടപെടൽ തുടങ്ങുന്നതോടെ പോലീസും കണ്ടില്ലെന്നു നടിക്കും.
തൊഴിലാളികളിലേറെയും ഉപജീവനം തേടിയെത്തുന്ന പാവപ്പെട്ടവരാണ്. പക്ഷേ, ഇവരിലൂടെ ക്രിമിനലുകളും നുഴഞ്ഞുകയറുന്നുവെന്നതാണ് പ്രതിസന്ധി. ഇതു കണ്ടെത്താനോ പ്രതിരോധിക്കാനോ നമ്മുടെ ഭരണസംവിധാനങ്ങൾക്കു കഴിയുന്നില്ല. നല്ലൊരു പങ്കും മദ്യപാനികളും മയക്കുമരുന്ന് ഉപയോഗിക്കുന്നവരുമാണ്. മയക്കുമരുന്ന് കടത്തും വിതരണവും പലരും ഏറ്റെടുത്തിട്ടുണ്ട്.
പോലീസ് സംവിധാനങ്ങളെപ്പോലും നിഷ്ക്രിയമാക്കുന്ന സ്വാധീനശക്തികളായി ഇവര് മാറുന്നുണ്ടെങ്കിൽ അതിനു പിന്നിൽ സ്വാധീനശക്തികൾ ഉണ്ടെന്ന് ഉറപ്പാണ്. കഴിഞ്ഞദിവസം പെരുമ്പാവൂര് ടൗണിനോടു ചേര്ന്ന തുറസായ സ്ഥലത്ത് ആയിരക്കണക്കിനു കുടിയേറ്റത്തൊഴിലാളികള് മദ്യപിച്ചു കൂത്താടുന്ന വീഡിയോ കണ്ടു. നഗരമധ്യത്തില് നിയമം ലംഘിച്ച് ഇക്കൂട്ടര് ലഹരിയില് അഴിഞ്ഞാട്ടം നടത്തിയിട്ടും നിയമസംവിധാനങ്ങള് കണ്ണടച്ചിരിക്കുന്നുവെങ്കില് മദ്യവും ലോട്ടറിയും വരുമാനമാക്കുന്ന സംസ്ഥാന ഭരണകൂടം ഈ നാടിനെ വലിയ അരക്ഷിതാവസ്ഥയിലേക്കു ബോധപൂര്വം തള്ളിവിടുകയാണോയെന്നു കരുതേണ്ടിവരും.
സംഘടിതശക്തി അപകടകരംഅന്യസംസ്ഥാന തൊഴിലാളികള് കേരളത്തില് സംഘടിതരൂപത്തിലേക്കു മാറുന്ന പല സൂചനങ്ങളും ഇതിനോടകം പുറത്തുവരുന്നുണ്ട്. ഈ സംഘടിതരൂപം ക്രമേണ സംഘടിത അക്രമത്തിലേക്കും വഴിമാറുകയാണിപ്പോള്. കോവിഡ് കാലത്ത് ചങ്ങനാശേരിക്കടുത്ത് നിയമലംഘനം നടത്തി ആയിരങ്ങള് മുഷ്ടി ചുരുട്ടി ഇറങ്ങിയത് സംഘടിതരൂപത്തിന്റെ ഒരു മുഖമെങ്കില് കിഴക്കമ്പലത്തെ ജീപ്പ് കത്തിക്കലും 2024ല് കോട്ടയം ജില്ലയിലെ ഏന്തയാറില് പാലം പണിയുടെ മറവില് നടന്ന അക്രമവും പുതിയ മുഖങ്ങള് തന്നെ.
ഇതരസംസ്ഥാന തൊഴിലാളികൾക്ക് നിലവിലുള്ള റേഷന് കാര്ഡ് വോട്ടവകാശമായി സംസ്ഥാന വോട്ടര്പട്ടികയില് ഇടംതേടുമ്പോള് രാഷ്ട്രീയക്കാർ ഇവരെ പ്രീണിപ്പിക്കാനാണു നോക്കുന്നത്. ഇതിന്റെ ഏറ്റവും വലിയ പ്രതിഫലനം മധ്യകേരളത്തിലായിരിക്കും. നാടുവിട്ടോടുന്ന കേരള യുവത്വത്തിനു പകരം വയ്ക്കാന് വോട്ടുബാങ്കായി ‘അതിഥി’കളെ കാണുന്ന പ്രമുഖ രാഷ്ട്രീയ പാര്ട്ടിയും മധ്യകേരളത്തില് വളരാന് ആഗ്രഹിക്കുന്ന ചില മത-സാമുദായിക സംവിധാനങ്ങളും ഇവരുടെ സംഘടിതരൂപത്തിനു പിന്നിലുണ്ടെന്നു വ്യക്തം. നിരോധനം നേരിട്ട ചില സംഘടനകളും നിഗൂഢമായി ഈ രംഗത്തു പ്രവർത്തിക്കുന്നുണ്ട്. കരുണയും അനുകമ്പയും കാട്ടി അഭയാര്ഥികളെ സ്വീകരിച്ചതിന്റെ പേരില് സ്വന്തം മണ്ണില് ജീവഭയത്തോടെ ജീവിക്കേണ്ടിവരുന്ന യൂറോപ്യന് രാജ്യങ്ങളിലെ പൗരന്മാരുടെ ദുരവസ്ഥ തിരിച്ചറിഞ്ഞിട്ടും കണ്ണുതുറക്കുന്നില്ലെങ്കിൽ കേരളവും അനുഭവിക്കാൻ ഇരിക്കുന്നതേയുള്ളൂ.
അഞ്ചു ലക്ഷം പേരോ?ഇതരസംസ്ഥാന തൊഴിലാളികളുടെ രജിസ്ട്രേഷന് നിര്ബന്ധമാക്കുമെന്ന് സര്ക്കാര് ഇടയ്ക്കിടെ പറയുന്നുണ്ടെങ്കിലും കണക്കില് ഇതുവരെയും അഞ്ചു ലക്ഷം പേര് മാത്രം. അതിഥികളെ കൊണ്ടുവരുന്ന ഏജന്റുമാര്ക്ക് ലൈസന്സും തൊഴിലാളികള്ക്ക് അതത് സംസ്ഥാനങ്ങളിലെ പോലീസിന്റെ ക്ലിയറന്സ് സര്ട്ടിഫിക്കറ്റും നിര്ബന്ധമാക്കുമെന്നും സര്ക്കാര് പറഞ്ഞതിനപ്പുറം ഒന്നും സംഭവിച്ചിട്ടില്ല. ഓരോ ദിവസവും വിവിധ റെയില്വേ സ്റ്റേഷനുകളില് വന്നിറങ്ങുന്നവരുടെ എണ്ണത്തില് കുറവില്ലെന്നു മാത്രമല്ല, ഇപ്പോള് ഇവരുടെ യാത്രകള് എയര്പോര്ട്ട് വഴിയായിട്ടുണ്ട്. ഇതിനര്ഥം കേരളം ഇതരസംസ്ഥാനക്കാർക്കു ഗള്ഫാണെന്നാണ്. തൊഴിലിനോടൊപ്പം ധനസമ്പാദനത്തിനുള്ള കുറുക്കുവഴികളായി മയക്കുമരുന്ന് വിപണി ഇവരിലൂടെ വളരുന്നു. കേരളം ഭാവിയിലെ കാഷ്മീരാകാതിരിക്കാനും രക്തം ചിന്താനും അവസരമുണ്ടാക്കാതെ അധികാരികൾ ഉണരേണ്ട സമയമാണിത്.
(അവസാനിച്ചു)