മുങ്ങിനടക്കുന്നവരാര്?2021ല്‍ കേരള സംസ്ഥാന ആസൂത്രണ ബോര്‍ഡിന്‍റെ ഇവാലുവേഷന്‍ വിഭാഗം കുടിയേറ്റ തൊഴിലാളികളുടെ ജനസംഖ്യാ കണക്കുകള്‍ പുറത്തുവിട്ടു. നിലവിലുള്ള ജനസംഖ്യാ വര്‍ധന നിരക്കു പ്രകാരം 2030ല്‍ കേരള ജനസംഖ്യ 3.60 കോടിയിലെത്താം. 31.4 ലക്ഷം അതിഥിത്തൊഴിലാളികള്‍ 2030 ഓടെ 59.7 ലക്ഷമായി കുതിക്കുമെന്നാണ് ആസൂത്രണ ബോര്‍ഡ് നല്‍കുന്ന മുന്നറിയിപ്പ്. അതായത്, കേരള ജനസംഖ്യയുടെ ആറിലൊന്ന് അന്യസംസ്ഥാന തൊഴിലാളികള്‍. ആകെ ജനസംഖ്യയുടെ 16.6 ശതമാനം. സംസ്ഥാനത്തെ സാമൂഹിക- സാമ്പത്തിക- രാഷ്‌ട്രീയ സാഹചര്യങ്ങളില്‍ ഇതു നിർണായകമാകും. കേരളത്തില്‍ കുടുംബമായി തുടരുന്ന ഇതരസംസ്ഥാന തൊഴിലാളികള്‍ 10.3 ലക്ഷമാണ്. വരുന്ന മൂന്നു വര്‍ഷംകൊണ്ട് ഇത് 13.2 ലക്ഷമായും എട്ടു വര്‍ഷംകൊണ്ട് 15.2 ലക്ഷമായും ഉയരും. ജില്ലാതല കണക്കുകള്‍ പരിശോധിച്ചാല്‍ ഈ തൊഴിലാളികളില്‍ 28 ശതമാനവും എറണാകുളം ജില്ലയിലാണ്. 13.6 ശതമാനം തൃശൂര്‍, 9.7 ശതമാനം ആലപ്പുഴ, ഒന്പത് ശതമാനം കോട്ടയം എന്നിങ്ങനെ പോകുന്നു ലഭ്യമായ കണക്കുകള്‍. ചുരുക്കിപ്പറഞ്ഞാല്‍, ഇതരസംസ്ഥാന തൊഴിലാളികളില്‍ 68 ശതമാനവും മധ്യകേരളത്തില്‍. ഈ കണക്കുകള്‍ സൂചിപ്പിക്കുന്നത് മധ്യകേരളത്തിലെ രാഷ്‌ട്രീയ- മത-സാമൂഹ്യ- സാംസ്കാരിക മേഖലകളില്‍ വരുംനാളുകളില്‍ വരാനിടയുള്ള മാറ്റങ്ങളിലേക്കാണ്.
വസ്തുതകള്‍ ഇതായിരിക്കെ തൊഴില്‍വകുപ്പിന്‍റെ അതിഥി പോര്‍ട്ടലില്‍ രജിസ്റ്റര്‍ ചെയ്യാത്തവരും പോലീസ് എടുത്ത കണക്കില്‍പ്പെടാത്തവരുമായി ആയിരക്കണക്കിന് കുടിയേറ്റ തൊഴിലാളികള്‍ കേരളത്തിലുണ്ടെന്നുള്ളത് മറ്റൊരു യാഥാർഥ്യമാണ്. ഇവരുടെ കുടിയേറ്റത്തിന് മറ്റുപല ലക്ഷ്യങ്ങളുമുണ്ടാകാം. പോലീസ് സംഘങ്ങള്‍ വേഷം മാറി അന്യസംസ്ഥാന തൊഴിലാളികള്‍ താമസിക്കുന്ന ഇടങ്ങളില്‍ പരിശോധന നടത്തിയിട്ടും അനധികൃതരെ കണ്ടെത്തുന്നതില്‍ ഫലം കാണുന്നില്ല. ഇക്കൂട്ടര്‍ വന്നിരിക്കുന്നത് ജോലിക്കുവേണ്ടി മാത്രമെങ്കില്‍ ജോലി നല്‍കുന്ന ഒരു ഉടമസ്ഥന്‍ കേരളത്തിലുണ്ടെന്നു വ്യക്തം. തൊഴില്‍ വകുപ്പിന്‍റെ അതിഥി പോര്‍ട്ടലില്‍ ഇവരെ രജിസ്റ്റര്‍ ചെയ്യാന്‍ കേരളത്തിലെ തൊഴില്‍ദാതാവിന് അഥവാ സ്പോണ്‍സര്‍ക്ക് ഉത്തരവാദിത്വമുണ്ട്. അവരിലേക്കു വിരല്‍ ചൂണ്ടാന്‍ ഭരണസംവിധാനം മടിക്കുമ്പോഴാണ് മുങ്ങിനടക്കുന്ന അതിഥികള്‍ ആര് എന്ന ചോദ്യം വീണ്ടുമുയരുന്നത്.
ബോഡോ തീവ്രവാദി നേതാവ് തൊഴിലാളിയുടെ വേഷത്തില്‍ കേരളത്തില്‍ താമസിച്ചതും നിരോധിത മാവോയിസ്റ്റ് അനുകൂല സംഘടനയായ പീപ്പിള്‍സ് ലിബറേഷന്‍ ഫ്രണ്ട് ഓഫ് ഇന്ത്യയുടെ നേതാവ് നിര്‍മാണത്തൊഴിലാളിയായി താമസിച്ചതും പോലീസ് കണ്ടുപിടിച്ചിരുന്നു.
അതിഥികള്‍ നിര്ണായകംകേരളത്തിന്റെ സമസ്ത മേഖലകളിലും അന്യസംസ്ഥാന തൊഴിലാളികളുടെ സാന്നിധ്യം നിര്‍ണായകമാണ്. ചെറുകിട- വന്‍കിട വ്യാപാരസ്ഥാപനങ്ങള്‍, നിര്‍മാണം, കാര്‍ഷികം ഉള്‍പ്പെടെ സമൂഹത്തിലെ വിവിധങ്ങളായ സേവനമേഖലകളില്‍ ഇവരുണ്ട്. വൈകുന്നേരങ്ങളില്‍ ഭക്ഷണശാലകള്‍ പലതും നിറയുന്നതിലും ഇവർക്കു പങ്കുണ്ട്. പലപലചരക്ക്-പച്ചക്കറി സ്ഥാപനങ്ങളെ ചലിപ്പിക്കുന്നതും ഇവരുടെ സാന്നിധ്യമാണ്. ഇവരില്ലെങ്കിൽ ഉത്പാദനമേഖലകൾ പലതും നിശ്ചലമാകും. ദൈവത്തിന്‍റെ സ്വന്തം നാട് അതിഥികളുടെ സ്വന്തം നാടുകൂടിയായി മാറിയിരിക്കുന്നു. അതേസമയം, ഇവരിലൂടെ നുഴഞ്ഞുകയറിയിരിക്കുന്ന ഭീകരവാദികളെയും ക്രമസമാധാന പ്രശ്നങ്ങളെയും മുളയിലെ നുള്ളാന്‍ സംസ്ഥാന ഭരണസംവിധാനങ്ങള്‍ മടിച്ചുനില്‍ക്കുന്നത് ആരെ ഭയന്നിട്ടാണ്?
(തുടരും).