സ്മാർട്ട് സിറ്റികൾ, ഹൈവേകൾ, പാലങ്ങൾ, വ്യവസായ-റെയിൽ ഇടനാഴികൾ, തുറമുഖങ്ങൾ, വിമാനത്താവളങ്ങൾ എന്നിങ്ങനെ രാജ്യത്തെ സുസ്ഥിര അടിസ്ഥാനസൗകര്യങ്ങളുടെ രൂപകല്പന, ആസൂത്രണം, നിർമാണം എന്നിവ സിവിൽ എൻജിനിയറിംഗ് മേഖലയ്ക്ക് സമ്മാനിക്കുന്ന തൊഴിലവസരങ്ങൾ അനവധി. അനുബന്ധമായി ജലവിതരണം, മാലിന്യസംസ്കരണം, ഗതാഗത ശൃംഖല എന്നീ സംവിധാനങ്ങളിലുൾപ്പെടെ 20 ശതമാനം അധിക തൊഴിലവസരങ്ങൾ സൃഷ്ടിക്കപ്പെടുന്നു എന്നാണു കണക്കാക്കുന്നത്. അതിലുപരി, പൊതുമേഖലാസ്ഥാപനങ്ങളായ റെയിൽവേ, ദേശീയപാതാ അഥോറിറ്റി, പൊതുമരാമത്ത് വകുപ്പുകൾ, മുനിസിപ്പൽ കോർപറേഷനുകൾ എന്നിവ വിവിധ പദ്ധതികൾക്കും അറ്റകുറ്റപ്പണികൾക്കും തുടർച്ചയായി സിവിൽ, ഇലക്ട്രിക്കൽ, മെക്കാനിക്കൽ എൻജിനിയർമാരുടെ സേവനം പ്രയോജനപ്പെടുത്തുന്നു.
ഉത്പാദന മേഖലയുക്രെയിൻ പ്രതിസന്ധിയുടെയും അനുബന്ധ പ്രക്ഷുബ്ധതയുടെയും പശ്ചാത്തലത്തിൽ ഉത്പാദനരംഗത്ത്, പ്രത്യേകിച്ച് ഉരുക്കുനിർമാണ മേഖലയിൽ വിപുലീകരണപ്രവർത്തനങ്ങൾ താത്കാലികമായി മുടങ്ങിയെങ്കിലും ജിൻഡാൽ, ടാറ്റ തുടങ്ങിയ പ്രമുഖർ വീണ്ടും രംഗത്തുണ്ട്.
സിമന്റ് നിർമാണമേഖലയിലും ഗണ്യമായ വിപുലീകരണം നടക്കുന്നു. ഇന്ത്യൻ റെയിൽവേയിലെ സാങ്കേതികനവീകരണം റോളിംഗ് സ്റ്റോക്ക് മേഖലയ്ക്കും പുത്തനുണർവ് സമ്മാനിക്കുന്നു. ആഡിറ്റിവ് മാനുഫാക്ചറിംഗ്, റോബോട്ടിക്സ്, എയ്റോസ്പേസ് എൻജിനിയറിംഗ് എന്നിവയിലെ മുന്നേറ്റങ്ങൾ മെക്കാനിക്കൽ എൻജിനിയർമാർക്ക് പുതിയ കവാടങ്ങൾ തുറക്കുകയാണ്.
തദ്ദേശീയ ഉത്പാദനം പ്രോത്സാഹിപ്പിക്കുക വഴിയും വിദേശനിക്ഷേപം ആകർഷിക്കുക വഴിയും ഇന്ത്യയെ ആഗോള ഉത്പാദന കേന്ദ്രമാക്കി മാറ്റാനുള്ള പദ്ധതികൾ നടപ്പിലാക്കുന്നതോടെ ജിഡിപിയിലേക്കുള്ള ഉത്പാദനമേഖലയുടെ സംഭാവന 25 ശതമാനമായി അടുത്ത വർഷത്തോടെ ഉയരുമെന്നാണു പഠനങ്ങൾ വെളിപ്പെടുത്തുന്നത്. ഉത്പാദനമേഖലയിലെ കുതിച്ചുചാട്ടവും അടിസ്ഥാനസൗകര്യവികസനത്തിന് ചെലവഴിക്കപ്പെടുന്ന മൂലധനവും വളർച്ചാഗുണിതങ്ങൾ സൃഷ്ടിക്കാൻ തുടങ്ങിയിരിക്കുന്നതായി കരുതാം.
ഊർജ മേഖലഊർജ മേഖലയിലും ആശാവഹമായ മാറ്റങ്ങളാണു കാണുന്നത്. ദ്രുതഗതിയിലുള്ള നഗരവത്കരണവും വ്യവസായവത്കരണവും വൈദ്യുതി ഉപയോഗം ക്രമാതീതമായി ഉയർത്തുന്ന മുറയ്ക്ക് പരമ്പരാഗത വൈദ്യുതോത്പാദനമേഖലയും റിന്യൂവബിൾ ഊർജോത്പാദന മേഖലയും ഒരുപോലെ മുന്നേറേണ്ടത് ആവശ്യമായി വരുന്നു.
വൈദ്യുതോത്പാദന ഇൻഫ്രാസ്ട്രക്ചറുകളുടെ രൂപകല്പന, പരിപാലനം, നവീകരണം എന്നിങ്ങനെ നേരിട്ടുള്ള തൊഴിലവസരങ്ങളും ഇതുമൂലം ജനിക്കുകയാണ്. മാത്രവുമല്ല സ്മാർട്ട് സിറ്റികൾ, ഗതാഗത ശൃംഖലകൾ, വ്യവസായ സമുച്ചയങ്ങൾ എന്നിവയുടെ ഇലക്ട്രിക്കൽ പവർ ഡിസ്ട്രിബ്യൂഷൻ, ലൈറ്റിംഗ്, ഓട്ടമേഷൻ, കൺട്രോൾ സിസ്റ്റങ്ങൾ എന്നീ സംവിധാനങ്ങളുടെ രൂപകല്പനയിലും പരിപാലനത്തിലും ധാരാളം തൊഴിൽസാധ്യതകൾ നിലവിൽവരും.
റിന്യൂവബിൾ എനർജി മേഖലയിലാകട്ടെ സൗരോർജപ്ലാന്റുകൾ, കാറ്റാടി ഫാമുകൾ, ഊർജസംഭരണ സംവിധാനങ്ങൾ എന്നിവയുടെ അനുബന്ധ പദ്ധതികളിൽ വിദഗ്ധരായ ഇലക്ട്രിക്കൽ എൻജിനിയർമാർക്ക് ഗണ്യമായ തോതിൽ അവസരങ്ങൾ ഉണ്ടാകും. സോളാർ ഫോട്ടോവോൾട്ടായിക് സാങ്കേതികവിദ്യ, കാറ്റാടി ടർബൈൻ ഇവയുടെ ഡിസൈനിലും ഊർജസംഭരണത്തിലുമുള്ള മുന്നേറ്റങ്ങൾ റിന്യൂവബിൾ ഊർജമേഖലയുടെ കാര്യക്ഷമത വർധിപ്പിക്കുക മാത്രമല്ല ഗണ്യമായ തോതിൽ ചെലവ് കുറയ്ക്കാൻ സഹായിക്കുകയും ചെയ്യും. 80 ബില്യൺ ഡോളറാണ് ഈ മേഖലയിൽ പ്രവചിക്കപ്പെടുന്ന നിക്ഷേപം.
പ്രതീക്ഷ നൽകുന്ന തൊഴിൽവിപണി തദ്ദേശീയ ഉത്പാദനവും അനുബന്ധ വ്യവസായ-ഗവേഷണ സാധ്യതകളും പുരോഗമിക്കുമ്പോൾ രാജ്യത്തിന്റെ സാമ്പത്തിക വളർച്ച ഉത്തേജിതമാകുക മാത്രമല്ല തൊഴിലവസരങ്ങൾ കൂടുതലായി സൃഷ്ടിക്കപ്പെടുകയും സംരംഭകത്വത്തിന് അനുകൂലമായ സാഹചര്യങ്ങൾ സംജാതമാകുകയും ചെയ്യും. കൂടാതെ രാജ്യത്തിന്റെ വലിയ ആഭ്യന്തരവിപണിയും മാനവവിഭവശേഷിയും ചൈന പ്ലസ് വൺ തന്ത്രത്തിന് നെടുംതൂണായി നിലകൊള്ളുന്നുമുണ്ട്. സ്വാശ്രയ ഇന്ത്യ എന്ന സ്വപ്നം സാക്ഷാത്കരിക്കാൻ രാജ്യത്തിന്റെ ഉത്പാദനശേഷി വർധിച്ചേ മതിയാകൂ.
നമുക്കായുള്ളത് നാം ഉത്പാദിപ്പിക്കുമ്പോൾ വ്യവസായങ്ങളും കയറ്റുമതിയും വിദേശനിക്ഷേപങ്ങളും അഭിവൃദ്ധി പ്രാപിക്കും. സാങ്കേതികപരിജ്ഞാനവും സർഗാത്മകതയും പ്രശ്നപരിഹാരശേഷിയും കൊണ്ട് വിവിധ മേഖലകളിലെ സങ്കീർണമായ വെല്ലുവിളികളെ നേരിടാൻ സജ്ജരായ എൻജിനിയർമാർക്ക് രാഷ്ട്രനിർമാണത്തിൽ സംഭാവന നൽകാനുള്ള സുവർണാവസരമാണുള്ളത്. സുസ്ഥിര വികസനപാതയിൽ രാജ്യം കാലൂന്നിനിൽക്കുമ്പോൾ ഉത്പാദനം, അടിസ്ഥാനസൗകര്യം, ഊർജം എന്നീ സുപ്രധാന മേഖലകളുടെ ഭാവി രൂപപ്പെടുത്തുന്നതിൽ എൻജിനിയർമാരുടെ പങ്ക് നിർണായകംതന്നെ.
ചുരുക്കത്തിൽ അടുത്ത ദശകം വാഗ്ദാനം ചെയ്യുന്നത് പ്രതീക്ഷയുടെ പുതുനാമ്പുകളാണ്. രാജ്യത്തിന്റെ വികസനലക്ഷ്യങ്ങളാൽ നയിക്കപ്പെടുന്ന ഇന്ത്യൻ തൊഴിൽവിപണി അതിവിപുലവും വൈവിധ്യമാർന്നതും പ്രതീക്ഷ നൽകുന്നതുമാണ്.
(വാഴക്കുളം വിശ്വജ്യോതി എൻജിനിയറിംഗ് കോളജിൽ സിവിൽ എൻജിനിയറിംഗ് വിഭാഗം
മേധാവിയാണ് ലേഖിക)