അപകടങ്ങളില്‍പ്പെട്ടും മറ്റു കാരണങ്ങളാലും ആശുപത്രിയില്‍ മസ്തിഷ്‌ക മരണം സംഭവിക്കുന്ന വ്യക്തിയുടെ അവയങ്ങള്‍, കുടുംബാംഗങ്ങളുടെ സമ്മതത്തോടെ നിശ്ചിത സമയത്തിനുള്ളില്‍ മറ്റു രോഗികളുടെ ശരീരത്തിലേക്കു മാറ്റിവയ്ക്കാന്‍ സാധിക്കും.
ഇത്തരത്തില്‍ മസ്തിഷ്‌കമരണം സംഭവിച്ചവരുടെ ഹൃദയം ഉള്‍പ്പടെയുള്ള അവയവങ്ങള്‍, നിയമപരമായ നടപടികള്‍ പൂര്‍ത്തിയാക്കി അവയവത്തിനായി രജിസ്റ്റര്‍ ചെയ്തിട്ടുള്ള രോഗികളില്‍ ശസ്ത്രക്രിയയിലൂടെ തുന്നിച്ചേര്‍ക്കുന്നതിന് ഇന്നു കേരളത്തില്‍ പ്രധാന ആശുപത്രികളില്‍ സജ്ജീകരണങ്ങളുണ്ട്. സംസ്ഥാന സര്‍ക്കാരിനു കീഴിലുള്ള കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യൂ ട്രാന്‍സ്പ്ലാന്‍റ് ഓര്‍ഗനൈസേഷന്‍റെ (കെ സോട്ടോ) മാര്‍ഗനിര്‍ദേശങ്ങളുടെയും അനുമതികളുടെയും വെളിച്ചത്തിലാണ് ഇത്തരം അവയവമാറ്റം നടക്കുക.
ജീവിതത്തിനായി കാത്തിരിപ്പ്അവയവങ്ങള് മാറ്റിവയ്ക്കാന്‍ രോഗി നിയമപരമായി കെ സോട്ടോയില്‍ പേര് രജിസ്റ്റര്‍ ചെയ്യണം. ഉചിതമായ ദാതാവ് ആകുമ്പോള്‍, രോഗിയെ ചികിത്സിക്കുന്ന ആശുപത്രിയിലേക്കു കെ സോട്ടോയില്‍നിന്നു വിവരം കൈമാറും. നടപടി പൂര്‍ത്തിയാക്കി അവയവമാറ്റ ശസ്ത്രക്രിയ നടത്തും.
സംസ്ഥാനത്തെ വൃക്കരോഗികളില്‍ 2,867 പേര് അടിയന്തരമായി വൃക്കകളിലൊന്നെങ്കിലും മാറ്റിവയ്‌ക്കേണ്ട സ്ഥിതിയിലുള്ളവരാണെന്നു കെ സോട്ടോയുടെ കണക്കുകള്‍ പറയുന്നു.
കേരളത്തില്‍ കരള്‍ കിട്ടാന്‍ കാത്തിരിക്കുന്നത് 415 രോഗികള്‍. 72 പേരാണു ഹൃദയം ലഭിക്കാന്‍ രജിസ്റ്റര്‍ ചെയ്തിട്ടുള്ളത്. കൈ മാറ്റിവയ്ക്കാന്‍ 11 പേര് ദാതാവിനെ കാത്തിരിക്കുന്നു. പാന്‍ക്രിയാസ് 10, ശ്വാസകോശം മൂന്ന് എന്നിങ്ങനെയാണു വിവിധ അവയവങ്ങള്‍ക്കായി കെ സോട്ടോയില്‍ രജിസ്റ്റര്‍ ചെയ്തു കാത്തിരിക്കുന്നവരുടെ എണ്ണം.
അവയവങ്ങള്‍ മാറ്റിവയ്ക്കാന്‍ കാത്തിരിക്കുന്നവരുടെ ജീവിതം സങ്കടങ്ങളുടേതാണ്. ദാതാവിനെ കിട്ടാത്തത്, നിയമനടപടികളുടെ സങ്കീര്‍ണതകള്‍, സാമ്പത്തിക പരാധീനതകള്‍.... ശരീരത്തിന്‍റെ കഠിനമായ വേദനകള്‍ക്കു പുറമേയാണ് ഇത്തരം നൂലാമാലകള്‍ നല്‍കുന്ന ആധികള്‍. അതേക്കുറിച്ചു നാളെ.
അബദ്ധധാരണകള്‍ തടസമെന്നു വിദഗ്ധര്മസ്തിഷ്ക മരണത്തെക്കുറിച്ചും അവയവമാറ്റത്തെക്കുറിച്ചുമെല്ലാം പൊതുസമൂഹത്തില്‍ ശാസ്ത്ര പിന്‍ബലമില്ലാത്ത ധാരണകളും അഭിപ്രായങ്ങളും ഏറെയുണ്ടെന്നു കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്‍റ് ഓര്‍ഗനൈസേഷന്‍ എക്‌സിക്യൂട്ടീവ് ഡയറക്ടര്‍ ഡോ. നോബിള്‍ ഗ്രേഷ്യസ്.
മസ്തിഷ്‌കമരണം സംഭവിച്ച രോഗി നിയമപരമായും വൈദ്യശാസ്ത്ര പ്രകാരവും മരിച്ചതായാണു കണക്കാക്കുന്നത്. തെറ്റായ ധാരണകളും പ്രാചാരണങ്ങളും മൂലം മസ്തിഷ്‌ക മരണത്തിന്‍റെ ഘട്ടത്തിലുള്ള വ്യക്തികളുടെ അവയവമാറ്റങ്ങളുടെ എണ്ണത്തില്‍ ഇന്നു വലിയ കുറവ് സംഭവിച്ചിട്ടുണ്ട്- ഡോ. നോബിള്‍ പറഞ്ഞു.
അവലംബം- കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യൂ ട്രാന്‍സ്പ്ലാന്‍റ് ഓര്‍ഗനൈസേഷന്‍ ഇയര്‍ലി സ്റ്റാറ്റിസ്റ്റിക്‌സ്.