ഷെവ. അഡ്വ. വി.സി. സെബാസ്റ്റ്യന്‍
ന്യൂനപക്ഷ ഭൂരിപക്ഷ വേര്‍തിരിവിന്‍റെ അളവുകോല്‍ ജനസംഖ്യയും അംഗസംഖ്യയുടെ കുറവ് ദുര്‍ബലാവസ്ഥയുടെ പ്രധാന കാരണവുമായിരിക്കുമ്പോള്‍ സംരക്ഷണം വേണ്ടതാര്‍ക്ക് എന്ന ചോദ്യം ഏറെ പ്രസക്തമാണ്. കൂടുതൽ സംരക്ഷണം വേണ്ടത് ജനസംഖ്യ കുറയുന്നവര്‍ക്കോ ജനസംഖ്യ കുതിച്ചുയരുന്നവര്‍ക്കോ? ഇന്ത്യയിലെ ന്യൂനപക്ഷ മതവിഭാഗങ്ങളിലെ ഭൂരിപക്ഷ മതവിഭാഗമൊഴിച്ച് മറ്റ് അഞ്ചു വിഭാഗങ്ങള്‍ കാലങ്ങളായി ഉയര്‍ത്തുന്ന ഈ ചോദ്യത്തിന്, വര്‍ഗീയ വോട്ടുരാഷ്‌ട്രീയത്തിന്‍റെ അട്ടിപ്പേറ് അവകാശവുമായി അധികാര സ്വപ്‌നങ്ങള്‍ താലോലിക്കുന്ന രാഷ്‌ട്രീയ നേതൃത്വങ്ങളിൽനിന്ന് വ്യക്തമായ മറുപടി കിട്ടിയിട്ടില്ല.
സര്‍ക്കാര്‍ ഖജനാവിലെ പൊതുപണം ന്യൂനപക്ഷ ക്ഷേമപദ്ധതികളുടെ പേരില്‍ അതിന്‍റെ സിംഹഭാഗവും ഒരു മതവിഭാഗത്തിനു മാത്രമായി ചെലവിടുന്നത് മതേതരഭാരതത്തിന്‍റെ ഭരണഘടനാ ഉത്തരവാദിത്വത്തെ കളങ്കപ്പെടുത്തുന്നതല്ലേയെന്ന ചോദ്യത്തിനും ഇതുവരെ ഉത്തരമായിട്ടില്ല. ഈ സ്ഥിതിക്ക് ഇനിയെങ്കിലും മാറ്റം വരേണ്ടതല്ലേ?
ജനസംഖ്യ കുറയുന്ന മറ്റ് ന്യൂനപക്ഷ വിഭാഗങ്ങളെ അവഗണിച്ച് സര്‍ക്കാര്‍ ക്ഷേമപദ്ധതികളൊന്നടങ്കം സാമൂഹ്യ, സാമ്പത്തിക, രാഷ്‌ട്രീയ രംഗങ്ങളില്‍ മാത്രമല്ല ജനസംഖ്യയിലും വളര്‍ച്ച നേടുന്നവര്‍ക്ക് വീതംവച്ചു നല്‍കുന്നത് ന്യായീകരിക്കാനാവില്ല. ഇത് ന്യൂനപക്ഷ സംരക്ഷണ തത്വങ്ങൾക്ക് നേർ വിപരീതമാണ്. ഈ സത്യം പറയുന്നതിന് ഇവിടെ വർഗീയത ആരോപിക്കുന്നവർ യഥാർഥ ന്യൂനപക്ഷ സംരക്ഷണ തത്വങ്ങൾ ബലി കഴിച്ച വെറും വോട്ട് ബാങ്ക് രാഷ്‌‌ട്രീയത്തിന്‍റെ ഉപാസകർ മാത്രമാണ്. കുറച്ചു നാളുകൾകൊണ്ട് ഇതിനെതിരേ പൊതുസമൂഹത്തിൽനിന്നു ചര്‍ച്ചകളും ചിന്തകളുമുയരുന്നതും നീതിപീഠങ്ങളില്‍ ചോദ്യം ഉന്നയിക്കപ്പെടുന്നതും പ്രതീക്ഷയേകുന്നു.
പാഴ്‌സികള്‍ക്കു സംഭവിച്ചത്
1951ല്‍ ഇന്ത്യയിലെ ആകെ ജനസംഖ്യയിലെ 0.13 ശതമാനം പാഴ്‌സികളുണ്ടായിരുന്നു. 2011ലെത്തിയപ്പോള്‍ ദേശീയ ശതമാനക്കണക്കില്‍ ഇവര്‍ ഇടംപോലും തേടിയിട്ടില്ല. പാഴ്‌സി ജനസംഖ്യ 1951ലെ 1.5 ലക്ഷത്തില്‍നിന്ന് 2011ല്‍ ഏതാണ്ട് 30,000ത്തിൽ എത്തിയെന്നാണ് അനൗദ്യോഗിക വിവരം. 1971 മുതല്‍ വിവിധ രാജ്യങ്ങളിലേക്കുള്ള പാഴ്‌സി സമൂഹത്തിന്‍റെ കുടിയേറ്റവും ജനനനിരക്ക് താഴ്ന്നതും വളര്‍ച്ചയെ തളര്‍ത്തി. 2013-14ല്‍ പാഴ്‌സികള്‍ക്ക് സംരക്ഷണമേകാന്‍ ജിയോ പാഴ്‌സി എന്ന പദ്ധതി സര്‍ക്കാര്‍ പ്രഖ്യാപിച്ചെങ്കിലും ഫലം കണ്ടില്ല.
2014 മുതല്‍ 2022 വരെ ജനിച്ച കുട്ടികള്‍ 450 മാത്രം. വളരെ വൈകിയുള്ള സര്‍ക്കാര്‍ പദ്ധതി പാഴ്‌വേലയായി പരാജയപ്പെട്ടു. അങ്ങനെ പാഴ്‌സി സമൂഹം ഇന്ത്യയില്‍ ചരിത്രമാകാനുള്ള സാധ്യതകളേറെ. ഈ അനുഭവങ്ങള്‍ ഒരു മുന്നറിയിപ്പായി കണ്ട് പാഴ്സികളെപ്പോലെ വളര്‍ച്ചാനിരക്ക് പിറകോട്ടടിക്കുന്ന അഥവാ വളര്‍ച്ച മുരടിക്കുന്ന ഇന്ത്യയിലെ ക്രിസ്ത്യന്‍, സിഖ്, ബുദ്ധര്‍, ജൈന വിഭാഗങ്ങളുടെയും നിലനില്പിന് പ്രത്യേക സംരക്ഷണപദ്ധതികള്‍ കേന്ദ്രസര്‍ക്കാര്‍ അടിയന്തരമായി പ്രഖ്യാപിച്ച് നടപ്പിലാക്കണം.
മൈക്രോ മൈനോരിറ്റി നിര്‍വചനം
ഇന്ത്യയിലെ ആറു വിജ്ഞാപിത മതന്യൂനപക്ഷങ്ങളില്‍ ക്രിസ്ത്യന്‍, സിഖ്, ബുദ്ധര്‍, ജൈനര്‍, പാഴ്‌സി എന്നീ അഞ്ചു വിഭാഗങ്ങള്‍ക്കും 2.5 ശതമാനത്തില്‍ താഴെവീതം ജനസംഖ്യ മാത്രമാണെന്നത് സര്‍ക്കാര്‍ രേഖയാണ്. ജനസംഖ്യ നിലവില്‍ വളരെ കുറഞ്ഞിരിക്കുന്നതും കുറഞ്ഞുകൊണ്ടിരിക്കുന്നതുമായ ഈ മതവിഭാഗങ്ങള്‍ക്കാണ് സര്‍ക്കാര്‍ സംരക്ഷണവും ക്ഷേമപദ്ധതികളും നല്‍കേണ്ടത്. ഇപ്രകാരമുള്ള നടപടിയിലൂടെ മാത്രമേ രാജ്യത്ത് ശരിയായ ന്യൂനപക്ഷ സംരക്ഷണതത്വം യാഥാര്‍ഥ്യമാകുകയുള്ളൂ. രാജ്യത്തെ ജാതിസംവരണ വ്യവസ്ഥയില്‍ സാമൂഹിക പിന്നാക്കാവസ്ഥയുടെ ആഴമനുസരിച്ച് പട്ടിക വിഭാഗങ്ങള്‍ (SC, ST), മറ്റു പിന്നോക്ക വിഭാഗങ്ങള്‍ (OBC) എന്ന് രണ്ടായി തിരിച്ചിരിക്കുന്നതുപോലെ മതന്യൂനപക്ഷങ്ങളില്‍ കുറഞ്ഞ തോതിലുള്ള പ്രജനന നിരക്ക്, ജനസംഖ്യാ വളര്‍ച്ച, ജനസംഖ്യാ അനുപാതം എന്നിവയുടെ അടിസ്ഥാനത്തില്‍ മേല്പറഞ്ഞ അഞ്ചു മതന്യൂനപക്ഷങ്ങളെ രാജ്യത്തെ മൈക്രോ മൈനോരിറ്റിയായി കേന്ദ്രസര്‍ക്കാര്‍ നിര്‍വചിക്കണം.
ന്യൂനപക്ഷ മാനദണ്ഡം-ജനസംഖ്യ
അംഗസംഖ്യയെ അടിസ്ഥാനപ്പെടുത്തി ന്യൂനപക്ഷമായിട്ടുള്ള വിവിധ മതവിഭാഗങ്ങള്‍ ഉന്മൂലനം ചെയ്യപ്പെടുന്നതിന്‍റെയും പീഡനങ്ങളേല്‍ക്കുന്നതിന്‍റെയും ഒട്ടേറെ സംഭവങ്ങള്‍ വിവിധ രാജ്യങ്ങളില്‍ നിരന്തരം തുടരുന്നു. ഇസ്‌ലാമിക രാജ്യങ്ങളില്‍ കൊല്ലപ്പെടുന്ന ക്രൈസ്തവരുടെ എണ്ണം ഉദാഹരണം മാത്രം. ഇന്ത്യയുടെ തൊട്ടടുത്ത് പാക്കിസ്ഥാനില്‍ ജനസംഖ്യയില്‍ കുറഞ്ഞ ക്രൈസ്തവ- ഹൈന്ദവ മതന്യൂനപക്ഷങ്ങള്‍ പീഡനത്തിനിരയാകുന്നത് നിത്യസംഭവമാണ്. ഇന്ത്യയിലെ വിവിധ സംസ്ഥാനങ്ങളില്‍ ന്യൂനപക്ഷ മതസമൂഹങ്ങള്‍ക്കെതിരേയുള്ള നിരന്തര അക്രമങ്ങളും ആശങ്കപ്പെടുത്തുന്നു. പശ്ചിമേഷ്യന്‍ രാജ്യങ്ങളിലെ ഇസ്‌ലാമിക ഭീകരപ്രസ്ഥാനങ്ങളുടെ ക്രൈസ്തവ പീഡനത്തിന്‍റെ അടിസ്ഥാനം ജനസംഖ്യയില്‍ ക്രൈസ്തവരവിടെ ന്യൂനപക്ഷമാണെന്നുള്ളതാണ്.
സാമൂഹ്യ പിന്നാക്കാവസ്ഥ ന്യൂനപക്ഷ ക്ഷേമപദ്ധതികളിലെ അടിസ്ഥാന മാനദണ്ഡമാക്കുന്നത് ദുരുദ്ദേശ്യപരവും രാഷ്‌ട്രീയലക്ഷ്യം മുന്നില്‍ക്കണ്ടും മാത്രമാണ്. കേരളത്തിലെ കുപ്രസിദ്ധ 80:20 അനുപാതം അതിന്‍റെ വ്യക്തമായ ഉദാഹരണമായിരുന്നു. നമ്മുടെ രാജ്യത്ത് അംഗബലം കുറയുന്ന ക്രിസ്ത്യന്‍, സിഖ്, ബുദ്ധ, ജൈന, പാഴ്‌സി ന്യൂനപക്ഷ മതവിഭാഗങ്ങളെ ദേശീയതലത്തിൽ മൈക്രോ മൈനോരിറ്റിയായി വിജ്ഞാപനം ചെയ്ത് രാജ്യത്തിന്‍റെ മുഖ്യധാരയില്‍ ചേര്‍ത്തുനിര്‍ത്തി സംരക്ഷിക്കാനുതകുന്ന ഭരണഘടനാ, നിയമ ഭേദഗതികള്‍ക്ക് കേന്ദ്രസര്‍ക്കാര്‍ ഇനിയെങ്കിലും തയാറാകണം.
(അവസാനിച്ചു)
(കാത്തലിക് ബിഷപ്‌സ് കോണ്‍ഫറന്‍സ് ഓഫ് ഇന്ത്യ ലെയ്റ്റി കൗണ്‍സില്‍ സെക്രട്ടറിയാണ് ലേഖകന്‍)