സിഗരറ്റ് വലിക്കുന്ന ശീലം പൂർണായി ഉപേക്ഷിച്ചതായി ബോളിവുഡ് സൂപ്പർതാരം ഷാരുഖ് ഖാൻ. താരത്തിന്‍റെ ജന്മദിന ആഘോഷത്തോ‌ടനുബന്ധിച്ച് ഷാരുഖിന്‍റെ ബാന്ദ്രയിലെ ഫാൻ ക്ലബുകൾ ചേർന്ന് 'എസ്ആർകെ ഡേ' എന്ന പേരിൽ ഒരു ഇവന്‍റ് നടത്തിയിരുന്നു. ഈ ആഘോഷപരിപാടിയിലാണ് താരം ഇക്കാര്യം പ്രഖ്യാപിച്ചത്.
അതേസമയം പൂർ‌ണമായും പുകവലി നിർത്തുക അത്ര എളുപ്പമായിരുന്നില്ലെന്നും താരം വ്യക്തമാക്കുന്നുണ്ട്. ഈ ശീലം നിർത്തുമ്പോൾ ശ്വാസം കിട്ടാത്തത് പോലെ തോന്നുമെന്ന് കരുതിയില്ല. പക്ഷേ തോന്നുന്നുണ്ട്. എന്നാൽ ഇത് ശരിയാകുമെന്നാണ് കരുതുന്നതെന്നും ഷാരുഖ് പറഞ്ഞു.
പുകവലി നിര്‍ത്തുന്നതിനുള്ള ഒരു റോള്‍ മോഡലായി സ്വയം കരുതുന്നില്ലെന്നും ഷാരുഖ് പറഞ്ഞു. ''നിങ്ങള്‍ക്കെന്താണോ ശരിയെന്ന് തോന്നുന്നത്, അത് ചെയ്യുക... ഇക്കാര്യത്തില്‍ ഞാനൊരു റോള്‍ മോഡലല്ല...'' ഷാരൂഖ് ഫാന്‍സിനോട് പറഞ്ഞു.
30വര്‍ഷം നിര്‍ത്താതെ വലിച്ച ഒരാളെന്ന നിലയില്‍ പുകവലി ഉപേക്ഷിക്കാന്‍ ഞാന്‍ ഉപദേശിക്കുന്നത് ശരിയാണെന്ന് തോന്നുന്നില്ല. പുകവലിക്കുന്നത് നല്ലതല്ലെന്ന് നമുക്കെല്ലാം എപ്പോഴുമറിയാം. നിര്‍ത്താന്‍ പറ്റിയാല്‍ നല്ലത്. പറ്റുന്നില്ലെങ്കില്‍ വളരെ മോശം. നിങ്ങള്‍ക്ക് അനുയോജ്യമെന്ന് തോന്നുന്ന സമയത്ത് അനുയോജ്യമായത് ചെയ്യുക. ഷാരൂഖ് കൂട്ടിച്ചേര്‍ത്തു.
കടുത്ത പുകവലിക്കാരനായിരുന്നു ഷാരുഖ് ഖാൻ. 2011-ല്‍ ഇന്ത്യ ടുഡേയ്ക്ക് നല്‍കിയ അഭിമുഖത്തില്‍ ഒരു ദിവസം 100 സിഗരറ്റുകള്‍ വരെ വലിക്കാറുണ്ടെന്ന് താരം വെളിപ്പെടുത്തിയിരുന്നു. ഞാൻ വെള്ളം കുടിക്കില്ല. പകരം മുപ്പത് കപ്പ് ബ്ലാക്ക് കോഫി കുടിക്കും. എനിക്ക് സിക്സ്പായ്ക്കുണ്ട്. താൻ സ്വയം ശ്രദ്ധിക്കാതിരിക്കുമ്പോൾ തന്‍റെ കാര്യത്തിൽ മറ്റുള്ളവർ ശ്രദ്ധ കൊടുക്കുന്നെന്നും താരം അഭിമുഖത്തിൽ പറഞ്ഞിരുന്നു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.