സമീപകാലത്ത് ഏറെ വിവാദങ്ങൾക്കിടയാക്കിയ രാമനും കദീജയും എന്ന ചിത്രം പ്രദർശനത്തിനെത്തുന്നു. ചിത്രകലാരംഗത്തും സാഹിത്യ രംഗത്തും ഏറെക്കാലമായി പ്രവർത്തിച്ചു പോരുന്ന ദിനേശ് പൂച്ചക്കാടാണ് ഈ ചിത്രം തിരക്കഥ രചിച്ച് സംവിധാനം ചെയ്തിരിക്കുന്നത്.
കാഞ്ഞങ്ങാട് ഫിലിംസിന്‍റെ ബാനറിൽ ബിനരാജ് കാഞ്ഞങ്ങാട്, സതീഷ് കാനായി എന്നിവർ ചേർന്നു നിർമിച്ചിരിക്കുന്ന ഈ ചിത്രം ഏറെ സാമൂഹ്യ പ്രതിബദ്ധത നിറഞ്ഞ ഒരു ചിത്രം കൂടിയാണ്. പൊതുനിരത്തുകളെ വീടാക്കി അന്തിയുറങ്ങുകയും ജീവിക്കുകയും ചെയ്യുന്ന പെറുക്കികൾ എന്നു വിളിക്കപ്പെടുന്ന നാടോടികളുടെ ജീവിതത്തിലൂടെയാണ് ഈ ചിത്രം കടന്നുപോകുന്നത്.
അങ്ങനെ ഒരു സ്ഥലത്ത് നാടോടികളായി ജീവിക്കുന്ന രണ്ടു കുടുംബങ്ങളിലെ അംഗങ്ങളാണ് രാനും കദീജയും. പ്രത്യേകിച്ച് ജീവിത ലക്ഷ്യങ്ങളൊന്നുമില്ലാതെ അന്നന്നത്തെ അന്നം തേടുന്ന ഈ നാടോടികൾ പ്രണയബദ്ധരായത് സ്വഭാവികം.
ഒന്നിച്ചു കളിച്ചു ജീവിച്ചു പോന്നവർ. അവർക്കിടയിൽ ജാതിയോ മതമോ ഒന്നുമില്ലായിരുന്നു. ഒരു വേലിക്കെട്ടുമില്ലാതെ ജീവിച്ചു പോരുന്നതിനിടയിലാണ് അവരിൽ പ്രണയത്തിന്‍റെ വിത്തു മുളപൊട്ടുന്നത്. അതോടെ അവരുടെ ജീവിതത്തിന് പ്രതീക്ഷകളും സ്വപ്നങ്ങളുമൊക്കെ ഉണ്ടായി.
ആരും ശ്രദ്ധിക്കാത്ത ഇവരുടെ ജീവിതത്തിലേക്ക് മതങ്ങൾ കടന്നുവരുന്നതോടെ ജീവിതം സംഘർഷഭരിതമാകുന്നു. കേരളത്തിലെ വർത്തമാനകാല സാഹചര്യത്തിൽ ദുരഭിമാനപ്പോരിനിടയിൽ പെട്ടുപോകുന്ന യുവമിഥുനങ്ങളുടെ കഥ ജീവിതഗന്ധിയായ മുഹൂർത്തങ്ങളിലൂടെ അവതരിപ്പിക്കുകയാണ് ഈ ചിത്രത്തിലൂടെ.
മതങ്ങളുടെ പേരിൽ മുതലെടുപ്പു നടത്തിപ്പോരുന്നവരുടെ ഇടയിൽ നിന്നും ശക്തമായ ഭീഷണികളാണ് തനിക്കു നേരിടേണ്ടി വന്നതെന്ന് സംവിധായകനായ ദിനേശ് പൂച്ചക്കാട് വ്യക്തമാക്കി. സമൂഹമാധ്യമങ്ങൾ ഈ വിഷയം ഏറെ വൈറലാക്കിയിരുന്നു. നമ്മുടെ സമൂഹത്തിന്‍റെ ജീർണതയുടെ ഒരു നേർക്കാഴ്ച കൂടിയായിരിക്കും ഈ ചിത്രം.
താരപ്പൊലിമയേക്കാളുപരി കെട്ടുറപ്പുള്ള കഥയുടെ പിൽബലമാണ് ഈ ചിത്രത്തിന്‍റെ അടിത്തറ. പുതുമുഖങ്ങൾക്കു പ്രാധാന്യം നൽകി ചിത്രീകരിക്കുന്ന ഈ ചിത്രത്തിൽ ഡോ. ഹരിശങ്കറും അപർണയുമാണ് കേന്ദ്ര കഥാപാത്രളെ അവതരിപ്പിച്ചിരിക്കുന്നത്.
പ്രശാന്ത് കുമാർ, മോഹൻ ചന്ദ്രൻ, ഹരി.ടി.എൻ., ഊർമ്മിളാ വൈശാഖ്, ഓമന, പ്രേമലത, സുരേന്ദ്രൻ പൂക്കാനം, മല്ലക്കര രാമചന്ദ്രൻ,സതീഷ് കാനായി, ടി.കെ. നാരായണൻ, ഡിവൈഎസ്പി ഉത്തംദാസ്, (മേൽപ്പറമ്പ്) എന്നിവരും പ്രധാന വേഷങ്ങളിലെത്തുന്നു.
ഇവർക്കു പുറമേ കാസർഗോഡ്, കണ്ണൂർ ജില്ലകളിൽ നിന്നും നൂറ്റിയമ്പതോളം കലാകാരന്മാരും ഈ ചിത്രത്തിൽ അണിനിരക്കുന്നു. ഗാനങ്ങൾ - ദിനേശ് പൂച്ചക്കാട്, ഹാരിസ് തളിപ്പറമ്പ്. സംഗീതം. ഷാജി കാഞ്ഞങ്ങാട്, ശ്രീശൈലം രാധാകൃഷ്ണൻ, പശ്ചാത്തല സംഗീതം സുദർശൻ പി.
ഛായാഗ്രഹണം - അഭിരാം സുദിൽ, ശ്രീജേഷ് മാവില, എഡിറ്റിംഗ് - അമൽ, കലാ സംവിധാനം. മൂർധന്യ. മേക്കപ്പ് - ഇമ്മാനുവൽ അംബ്രോസ്. കോസ്റ്റ്യൂം - ഡിസൈൻ - പുഷ്പ, നിശ്ചല ഛായാഗ്രഹണം - ശങ്കർ ജി. വൈശാഖ് മേലേതിൽ. നിർമാണ നിർവഹണം - ഹരിഹരൻ പൂച്ചക്കാട്, എബിൻ പാലന്തലിക്കൽ. നവംബർ അവസാന വാരത്തിൽ ഈ ചിത്രം പ്രദർശനത്തിനെത്തുന്നു. പിആഒ- വാഴൂർ ജോസ്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.