വിദ്യാർഥികൾക്കു ഡിസൈനിൽ പ്രാവീണ്യം നൽകുക എന്ന ലക്ഷ്യവുമായി തൊഴിൽ വകുപ്പിനു കീഴിൽ സംസ്ഥാന സർക്കാർ ആരംഭിച്ച ഡിസൈൻ ഇൻസ്റ്റിറ്റ്യൂട്ടിന്റെ ബിരുദാനന്തര ബിരുദ കോഴ്സിലേക്ക് അപേക്ഷിക്കാം.
നാഷണൽ ഇൻസ്റ്റിറ്റ്യൂട്ട് ഓഫ് ഡിസൈന്റെ പാഠ്യപദ്ധതിയുടെയും അധ്യാപകരുടെയും സഹായത്തോടെയാണു പത്ത് സീറ്റുകൾ വീതമുള്ള ഇന്റഗ്രേറ്റഡ് പ്രോഡക്ട് ഡിസൈൻ, ഇന്റഗ്രേറ്റഡ് ടെക്സ്റ്റൈൽ ആൻഡ് അപ്പാരൽ ഡിസൈൻ, ഐടി ഇന്റഗ്രേറ്റഡ് കമ്യൂണിക്കേഷൻ ഡിസൈൻ എന്നീ കോഴ്സുകൾ നടത്തുന്നത്.
ഇന്റഗ്രേറ്റഡ് ലൈഫ് സ്റ്റൈൽ പ്രൊഡക്ട് ഡിസൈൻ: ഈ കോഴ്സിൽ ദൈനംദിന ഉത്പന്നങ്ങൾ മുതൽ വാഹനങ്ങൾ വരെ രൂപകല്പന ചെയ്യുന്ന വിഭാഗമാണ്. ഇൻഡസ്ട്രിയൽ ഡിസൈൻ, പ്രൊഡക്ട് ഡിസൈൻ, ഫർണിച്ചർ ഡിസൈൻ, ട്രാൻസ്പോർട്ടേഷൻ ഡിസൈൻ, ടോയ് ഡിസൈൻ, സിറാമിക് ആൻഡ് ഗ്ലാസ് ഡിസൈൻ എന്നിവ ഇതിന്റെ ഉപവിഭാഗങ്ങളാണ്.
ഐടി ഇന്റഗ്രേറ്റഡ് കമ്യൂണിക്കേഷൻ ഡിസൈൻ: ആശയങ്ങൾ എങ്ങനെ വളരെ കൃത്യമായും ലളിതമായും മറ്റുള്ളവരിലേക്ക് എത്തിക്കാം. ഇതാണ് കമ്യൂണിക്കേഷൻ ഡിസൈൻ കൊണ്ട് ഉദ്ദേശിക്കുന്നത്. ഗ്രാഫിക് ഡിസൈൻ, അനിമേഷൻ ഡിസൈൻ, മൾട്ടിമീഡിയ ഡിസൈൻ, ഫിലിം ആൻഡ് വെഹിക്കിൾ ഡിസൈൻ, എക്സിബിഷൻ ഡിസൈൻ, റീട്ടെയിൽ എക്സ്പീരിയൻസ് ഡിസൈൻ എന്നിവയും ഇതിൽ ഉൾപ്പെടും. ഐടിയുടെ സഹായത്തോടെ നടത്തുന്ന ന്യൂ മീഡിയ ഡിസൈൻ, ഇന്റർഫേസ് ഡിസൈൻ, ഡിജിറ്റൽ ഗെയിം ഡിസൈൻ എന്നിവയ്ക്കു ഡിജിറ്റൽ വിപ്ലവം നടക്കുന്ന ഇക്കാലഘട്ടത്തിൽ വലിയ പ്രാധാന്യമുണ്ട്.
ടെക്സ്റ്റൈൽ അപ്പാരൽ ഡിസൈൻ: ഡിസൈൻ മേഖലയിൽ ഏറ്റവും ആദ്യത്തെ ശാഖയാണ്. മനുഷ്യൻ വസ്ത്രം ധരിക്കാൻ തുടങ്ങിയ കാലഘട്ടം മുതൽ ഈ മേഖലയിൽ ഗവേഷണം നടന്നുകൊണ്ടിരിക്കുന്നു. തുണിത്തരങ്ങളുടെ രൂപകല്പനയുമായി ബന്ധപ്പെട്ട വിഭാഗം ഫാഷൻ ഡിസൈൻ, അപ്പാരൽ ഡിസൈൻ ആൻഡ് മർച്ചൻഡിസൈൻ, ലൈഫ് സ്റ്റൈൽ ആക്സസറി ഡിസൈൻ മുതലായവ ഈ മേഖലയിൽപ്പെടും. 55 ശതമാനം മാർക്കോടെ ബിരുദം നേടിയവർക്ക് ആറു മാസത്തെ ഇന്റേണ്ഷിപ്പുൾപ്പെടെ അഞ്ചു സെമസ്റ്റർ നീണ്ട 30 മാസത്തെ കോഴ്സിലേക്ക് അപേക്ഷിക്കാം. പ്രായം 40 കവിയരുത്.
കൊല്ലം ജില്ലയിൽ ചന്ദനത്തോപ്പിലാണ് അത്യാധുനിക സജ്ജീകരണങ്ങളോടുകൂടിയ ലാബുകൾ, കംപ്യൂട്ടർവത്കൃത ലൈബ്രറി, അതിവേഗ ഇന്റർനെറ്റ്, ഹോസ്റ്റൽ തുടങ്ങിയ സൗകര്യങ്ങളോടുകൂടി 31,000 ചതുരശ്ര അടിയിൽ നിർമിച്ചിരിക്കുന്ന സ്ഥാപനം സ്ഥിതിചെയ്യുന്നത്. യോഗ്യരായ അപേക്ഷകരെ ആപ്റ്റിറ്റ്യൂഡ് ടെസ്റ്റ്, സ്റ്റുഡിയോ ടെസ്റ്റ്, ഇന്റർവ്യു എന്നിവ നടത്തിയാണു തെരഞ്ഞെടുക്കുന്നത്. കോഴ്സ് ഫീസ് ഒരു സെമസ്റ്ററിന് 45,000 രൂപ. ഓണ്ലൈനായി ഫെബ്രുവരി 29 നകം രജിസ്റ്റർ ചെയ്യണം. 1000 രൂപയാണ് അപേക്ഷാ ഫീസ്. ഏപ്രിൽ 26 നാണ് ആപ്റ്റിറ്റ്യൂഡ് ടെസ്റ്റ്. കൊല്ലം, കൊച്ചി, കോഴിക്കോട്, ബംഗളൂരു, ഹൈദരാബാദ്, കൊൽക്കത്ത, മുംബൈ, ഡൽഹി, അഹമ്മദാബാദ്, ചെന്നൈ എന്നിവിടങ്ങളിൽ പരീക്ഷാ കേന്ദ്രങ്ങളുണ്ട്.ഇന്റർവ്യുവും സ്റ്റുഡിയോ ടെസ്റ്റും മേയ് 22, 23 തീയതികളിലായി ക്രമീകരിച്ചിരിക്കുന്നു. പ്രോസ്പെക്ടസും അപേക്ഷാഫോമും www.ksid.co.in എന്ന വെബ്സൈറ്റിൽ ലഭിക്കും. ഫോണ്: 0474 2710393, 2719193.