നിയമസഭയുടെ സന്പൂർണ ബജറ്റ് സമ്മേളനം ജൂണ്‍ 10ന് തുടങ്ങാൻ ആലോചന : Deepika.com Kerala News |

തിരുവനന്തപുരം: നിയമസഭയുടെ സന്പൂർണ ബജറ്റ് സമ്മേളനം ജൂണ്‍ 10ന് തുടങ്ങാൻ ആലോചന. ലോക്സഭാ തെരഞ്ഞെടുപ്പുഫലം ജൂണ്‍ നാലിന് വരുന്നതിന് തൊട്ടുപിന്നാലെ പത്തുമുതൽ നിയമസഭ വിളിച്ചുചേർക്കും. സന്പൂർണ ബജറ്റ് സമ്മേളനമായതിനാൽ ജൂലൈ അവസാനം വരെ നീളും.

എന്നാൽ, ലോകകേരള സഭ ജൂണ്‍ 13 മുതൽ 15 വരെ നിയമസഭയിലെ ശങ്കരനാരായണൻ തന്പി ഹാളിൽ നടക്കുന്ന സാഹചര്യത്തിൽ നിയമസഭാസമ്മേളനം ഒരാഴ്ചത്തേക്കു നീട്ടുന്നതും ആലോചനയിലുണ്ട്. എന്നാൽ, നിയമസഭാസമ്മേളനം നീട്ടിയാൽ ജൂലൈ 31നകം ധനാഭ്യർഥന ചർച്ചകളും ഉപധനാഭ്യർഥനയും ധനവിനിയോഗ ബില്ലും ധനബില്ലും പാസാക്കാൻ കഴിയുമോയെന്ന ആശങ്കയും സർക്കാരിനുണ്ട്. ഇതിനാൽ ജൂണ്‍ 10ന് നിയമസഭാ സമ്മേളനം തുടങ്ങിയശേഷം ലോകകേരള സഭയ്ക്കായി 12ന് അവസാനിപ്പിച്ച് 18നോ 19നോ വീണ്ടും ചേരുന്ന കാര്യമാണു പരിഗണിക്കുന്നത്. മുഖ്യമന്ത്രി പിണറായി വിജയന്‍റെ തീരുമാനത്തിന്‍റെ അടിസ്ഥാനത്തിലാണ് തീയതിയുടെ കാര്യത്തിൽ അന്തിമമാകുക. രണ്ടാഴ്ചയ്ക്കകം നിയമസഭാ സമ്മേളന ശിപാർശ മന്ത്രിസഭയുടെ പരിഗണനയ്ക്ക് എത്തും.

ധനാഭ്യർഥന ചർച്ചകൾ പൂർത്തിയാക്കാൻ 13 സമ്മേളന ദിനം ആവശ്യമുണ്ട്. ധനവിനിയോഗ ബില്ലും ധനബില്ലും പാസാക്കാനും മൂന്നു ദിവസം വേണം. അത്യാവശ്യ ബില്ലുകളടക്കം പരിഗണിക്കേണ്ട സാഹചര്യമുണ്ടെങ്കിൽ ഇവയ്ക്കെല്ലാം കൂടി 22 പ്രവൃത്തിദിനം ആവശ്യമായി വരുമെന്നാണു കരുതുന്നത്.

കഴിഞ്ഞ മാർച്ചിൽ സന്പൂർണ ബജറ്റ് പാസാക്കാനായി നിയമസഭാ കലണ്ടർ തയാറാക്കിയിരുന്നെങ്കിലും ലോക്സഭാ തെരഞ്ഞെടുപ്പ് പ്രഖ്യാപനം വരുന്ന സാഹചര്യത്തിൽ നാലു മാസത്തെ വോട്ട് ഓണ്‍ അക്കൗണ്ട് പാസാക്കി പിരിയുകയായിരുന്നു.

ഇത്തവണത്തെ നിയമസഭാ സമ്മേളനത്തിനിടെ ജൂണിൽ രാജ്യസഭാ തെരഞ്ഞെടുപ്പും നടക്കും. സിപിഐ സംസ്ഥാന സെക്രട്ടറി ബിനോയ് വിശ്വം, സിപിഎം നേതാവ് എളമരം കരീം, കേരള കോണ്‍ഗ്രസ്-എം ചെയർമാൻ ജോസ് കെ. മാണി എന്നിവരുടെ രാജ്യസഭാ അംഗത്വ കാലാവധി ജൂലൈ ഒന്നിന് അവസാനിക്കുന്ന സാഹചര്യത്തിലാണ് ജൂണിൽ രാജ്യസഭാ തെരഞ്ഞെടുപ്പ് നടക്കുന്നത്.

തെരഞ്ഞെടുപ്പു തീയതി വൈകാതെ തെരഞ്ഞെടുപ്പ് കമ്മീഷൻ പ്രഖ്യാപിക്കും. നിയമസഭാ സെക്രട്ടറി ഷാജി സി. ബേബിയെ തെരഞ്ഞെടുപ്പ് വരണാധികാരിയായി നിശ്ചയിച്ച് നിയമസഭാ സെക്രട്ടേറിയറ്റ് തെരഞ്ഞെടുപ്പ് കമ്മീഷനെ അറിയിച്ചിരുന്നു.