മദ്രാസ് ഐഐടിയിൽ എംഎ: പ്രവേശന പരീക്ഷ ഏപ്രിൽ 19ന്
മാനവിക, സാമൂഹ്യശാസ്ത്ര വിഷയങ്ങളിൽ ഉന്നത പഠനത്തിനു രാജ്യത്തെ ഏറ്റവും മികച്ച വിദ്യാഭ്യാസ സ്ഥാപനങ്ങളിൽ ഒന്നായ മദ്രാസ് ഐഐടിയിൽ അവസരം. മദ്രാസ് ഐഐടിയുടെ ഹ്യുമാനിറ്റീസ് ആൻഡ് സോഷ്യൽ സയൻസ് ഡിപ്പാർട്മെന്റ് നടത്തുന്ന ഇന്റഗ്രേറ്റഡ് എംഎ കോഴ്സാണ് ഈ മേഖലയിൽ മികച്ച പഠന അവസരം വാഗ്ദാനം ചെയ്യുന്നത്. ഹ്യുമാനിറ്റീസ് ആൻഡ് സോഷ്യൽ സയൻസസ് എൻട്രൻസ് എക്സാമിനേഷൻ (എച്ച്എസ്ഇഇ) വഴിയാണ് അഡ്മിഷൻ. ഏപ്രിൽ 19നാണ് എച്ച്എസ്ഇഇ. ജനുവരി 22 വരെ അപേക്ഷിക്കാം.
എച്ച്എസ്ഇഇക്കു കേരളത്തിൽ തിരുവനന്തപുരവും കൊച്ചിയും സെന്ററുകളാണ്. ബംഗളൂരു, ഭോപ്പാൽ, ചെന്നൈ, കോയന്പത്തൂർ, ഹൈദരാബാദ്, കോൽക്കത്ത, മുംബൈ, ന്യൂഡൽഹി എന്നിവിടങ്ങളിലാണു മറ്റു പരീക്ഷാ കേന്ദ്രങ്ങൾ. ഡവലപ്മെന്റ് സ്റ്റഡീസ്, ഇംഗ്ലീഷ് എന്നീ വിഷയങ്ങളിലാണ് എച്ച്എസ്ഇഇ വഴി കുട്ടികളെ തെരഞ്ഞെടുക്കുന്നത്. രണ്ടു വിഷയങ്ങൾക്കും കൂടി 46 സീറ്റുകളാണുള്ളത്. അഞ്ചു വർഷത്തെ കോഴ്സിന്റെ ആദ്യ രണ്ടു വർഷം പൊതു വിഷയങ്ങളാണു പഠിക്കേണ്ടത്. തുടർന്ന് അഭിരുചിയുടേയും പഠന നിലവാരത്തിന്റെയും അടിസ്ഥാനത്തിൽ കോഴ്സ് തെരഞ്ഞെടുക്കാം.
ഓണ്ലൈനായി വേണം അപേക്ഷിക്കാൻ. അപേക്ഷാ ഫീസ് 2,400 രൂപ. പട്ടികജാതിവർഗക്കാർക്ക് 1,200 രൂപ. പെണ്കുട്ടികൾക്ക് അപേക്ഷാ ഫീസില്ല. നെറ്റ് ബാങ്കിംഗ്, ക്രെഡിറ്റ്/ ഡെബിറ്റ് കാർഡ് വഴി ഫീസ് അടയ്ക്കാം. ഒബ്ജക്ടീവ്, ഡിസ്ക്രിപ്റ്റീവ് മാതൃകയിൽ രണ്ടര മണിക്കൂറാണ് എച്ച്എസ്ഇഇ. 60 ശതമാനം മാർക്കോടെ പ്ലസ്ടു പാസായവർക്കും അവസാന വർഷ വിദ്യാർഥികൾക്കും എച്ച്എസ്ഇഇ എഴുതാം. മാർക്കിന്റെയും പ്രായത്തിന്റെയും കാര്യത്തിൽ സംവരണ വിഭാഗങ്ങൾക്ക് ഇളവുണ്ട്. പ്രായം: 1995 ഒക്ടോബർ ഒന്നിനോ അതിനുശേഷമോ ജനിച്ചവരായിരിക്കണം അപേക്ഷകർ.
ഒരു സെമസ്റ്ററിലെ ട്യൂഷൻ ഫീസ് 11400 രൂപ.
സിലബസും മാതൃകാ ചോദ്യപേപ്പറും വെബ്സൈറ്റിൽ ലഭ്യമാണ്. മാർച്ച് 18 മുതൽ അഡ്മിറ്റ് കാർഡുകൾ ഡൗണ്ലോഡ് ചെയ്യാം. ഏപ്രിൽ 19 നാണ് എച്ച്എസ്ഇഇ. മേയ് രണ്ടാം വാരം പരീക്ഷാഫലം പ്രസിദ്ധീകരിക്കും.
മേൽവിലാസം: ചെയർമാൻ,എച്ച്എസ്ഇഇ2020, ജെഇഇ ഓഫീസ്, ഐഐടി മദ്രാസ്, ചെന്നൈ600036. hsee.iit m.ac.in. ഫോണ്: (044) 2257 8220.