നീറ്റ്-യുജി രജിസ്ട്രേഷൻ നാളെ തുടങ്ങും
മെഡിക്കൽ, ഡെന്‍റൽ പ്രവേശനത്തിനുള്ള ദേശീയ പ്രവേശന പരീക്ഷയായ നാഷണൽ എലിജിബിലിറ്റി കം എൻട്രൻസ് ടെസ്റ്റ് യുജി (നീറ്റ്യുജി) മേയ് മൂന്നിനു നടത്തും. ഇതിനുള്ള ഓണ്‍ലൈൻ രജിസ്ട്രേഷൻ നാളെ തുടങ്ങും. 30 വരെ രജിസ്റ്റർ ചെയ്യാം. ഇന്ത്യയിലെ എല്ലാ ഗവണ്‍മെന്‍റ്, എയ്ഡഡ്, പ്രൈവറ്റ് മെഡിക്കൽ കോളജുകളിലേക്കുമുള്ള പ്രവേശനത്തിനു ദേശീയതലത്തിലുള്ള പരീക്ഷയാണിത്.
അഖിലേന്ത്യാ ക്വോട്ടാ സീറ്റുകൾ, സംസ്ഥാന സർക്കാർ ക്വോട്ടാ സീറ്റുകൾ, കേന്ദ്ര സ്ഥാപനങ്ങൾ/യൂണിവേഴ്സിറ്റികൾ/ഡീംഡ് യൂണിവേഴ്സിറ്റികൾ, സ്വകാര്യ യൂണിവേഴ്സിറ്റികൾ അല്ലെങ്കിൽ സ്വകാര്യ മെഡിക്കൽ, ഡെന്‍റൽ കോളജുകളിലെ സംസ്ഥാന/മാനേജ്മെന്‍റ്/എൻആർഐ ക്വോട്ടാ സീറ്റുകൾ, സെൻട്രൽ പൂൾ ക്വോട്ടാ സീറ്റുകൾ എന്നിങ്ങനെ വിഭജിച്ചാണ് അഡ്മിഷൻ. ന്യൂഡൽഹിയിലെ ഓൾ ഇന്ത്യാ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ് (എയിംസ്), പോണ്ടിച്ചേരിയിലെ ജവഹർലാൽ ഇൻസ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കൽ എഡ്യൂക്കേഷൻ ആൻഡ് റിസർച്ച് ( ജിപ്മെർ) എന്നീ സ്ഥാപനങ്ങളിലെ എംബിബിഎസ് പ്രവേശനവും നീറ്റ് യുജി റാങ്ക് പട്ടികയിൽ നിന്നായിരിക്കും. ഇതോടെ രാജ്യത്തെ മെഡിക്കൽ വിദ്യാഭ്യാസത്തിനുള്ള ഏകീകൃത പ്രവേശന പരീക്ഷയായി നീറ്റ്യുജി മാറും. 154 നഗരങ്ങളിലായി 2,500 കേന്ദ്രങ്ങളിലാണ് നീറ്റ് യുജി നടത്തുന്നത്.
കേരളത്തിലെ മെഡിക്കൽ/ ഡെന്‍റൽ കോളജുകളിൽ അഡ്മിഷൻ തേടുന്നവരും നീറ്റ്യുജി എഴുതുകയും സംസ്ഥാന പ്രവേശന പരീക്ഷാ കമ്മീഷണർക്കു പ്രത്യേകം അപേക്ഷിക്കുകയും വേണം. ഇതിനുള്ള വിജ്ഞാപനം ജനുവരിയിൽ പ്രസിദ്ധീകരിക്കും.
പൂനയിലെ സായുധ സേനാ മെഡിക്കൽ കോളജ് അഡ്മിഷനും സായുധ സേനാ മെഡിക്കൽ സർവീസസ് ഡയറക്ടർ ജനറലിന്‍റെ നിബന്ധനകൾക്കു വിധേയമായി നീറ്റ് യുജി അടിസ്ഥാനമാക്കിയാണ്. എഎഫ്എംസിയിൽ പ്രവേശനം ആഗ്രഹിക്കുന്നവർ അതിനു പ്രത്യേകം അപേക്ഷിക്കുകയും രണ്ടാം ഘട്ട സ്ക്രീനിംഗ് ടെസ്റ്റിൽ പങ്കെടുക്കുകയും വേണം. പ്രധാന വെബ്സൈറ്റുകൾ അപേക്ഷാ സമർപ്പണത്തിനും വിശദ വിവരങ്ങൾക്കും: www. nta.ac.in/ www.ntaneet.nic.in. കോമണ് സർവീസ് സെന്‍റർ: http:// www. csc.gov.in. സായുധ സേനാ മെഡിക്കൽ കോളജ്: www.afmc.nic.in, www. afm cdg1d.gov.in. മെഡിക്കൽ / ഡെന്‍റൽ കോളജുകളെ സംബന്ധിച്ചുള്ള വിവരങ്ങൾക്ക്: http://www.mciindia.org/ http://www.dciindia.org. സംസ്ഥാന പ്രവേശന പരീക്ഷാ കമ്മീഷണർ : www.ceekerala.org. ഫോൺ: 0471 2332120, 2338487. നാഷണൽ ടെസ്റ്റിംഗ് ഏജൻസിയുടെ ഫോൺ: 076535482