ഭിന്നശേഷി പുനരധിവാസ പ്രോഗ്രാമുകൾ (റിഹാബിലിറ്റേഷൻ പ്രോഗ്രാംസ്) നമ്മുടെ രാജ്യത്ത് നടക്കുന്നുണ്ടല്ലോ. ഈ വിധം പരിശീലനം കൊടുക്കുന്ന പ്രോഗ്രാമുകളെ നിയന്ത്രിക്കുന്ന രാജ്യത്തെ സ്റ്റാറ്റ്യൂട്ടറി ബോർഡ് ഏതാണ്? ഭിന്നശേഷി പുനരധിവാസ പ്രോഗ്രാമുകളിൽ ഉപരിപഠനം നൽകുന്ന രാജ്യത്തെ പ്രധാനപ്പെട്ട സ്ഥാപനങ്ങൾ ഏതെല്ലാമാണ്?
ശ്രീലക്ഷ്മി ഹരി, തിരൂർ
നമ്മുടെ രാജ്യത്തെ ജനസംഖ്യയുടെ ഏഴ് ശതമാനത്തോളം ശാരീരികമോ മാനസികമോ ആയ വൈകല്യമുള്ളവരാണ്. ഇതിൽ ജന്മനാ ജന്മനാ വൈകല്യമുള്ളവരും പിന്നീട് അംഗവൈകല്യം സംഭവിക്കുന്നവരും ഉൾപ്പെടും. ഇത്തരം ആളുകളോട് സ്നേഹവും അനുകമ്പയും പുലർത്തി പരിചരിക്കാനും പുനരധിവാസ പ്രവർത്തനങ്ങൾ നടത്തുന്നതിനുമൊക്കെയാണ് മുകളിൽ പറഞ്ഞ കോഴ്സുകൾ സഹായിക്കുന്നത്. ഭിന്നശേഷിക്കാരെ പുനരധിവസിപ്പിക്കുന്നതിന് പരിശീലനം നൽകുന്നതിനായി രാജ്യത്തെ വിവിധ സർവകലാശാലകൾ ഓഫർ ചെയ്യുന്ന പ്രോഗ്രാമുകളുടെ ഗുണഗണങ്ങൾ നിശ്ചയിക്കുന്നതിനായി ദേശീയതലത്തിൽ തന്നെ ഒരു സ്റ്റാറ്റ്യൂട്ടറി കൗൺസിൽ അഥവാ ബോഡി പ്രവർത്തിക്കുന്നുണ്ട്.
റീഹാബിലിറ്റേഷൻ കൗൺസിൽ ഓഫ് ഇന്ത്യ എന്നാണ് ഈ സ്റ്റാറ്റ്യൂട്ടറി ബോഡിയുടെ പേര്. ഈ സ്റ്റാറ്റ്യൂട്ടറി ബോഡിയുടെ അനുവാദത്തോടെയും അംഗീകാരത്തോടെയും കൂടി മാത്രമേ റിഹാബിലിറ്റേഷനു മായി ബന്ധപ്പെട്ട പ്രോഗ്രാമുകൾ രാജ്യത്തെ ഏതെങ്കിലും കോളജുകളിലോ യൂണിവേഴ്സിറ്റികളിലോ നടത്താൻ കഴിയൂ.
താഴെപ്പറയുന്നവയാണ് രാജ്യത്ത് ഈ മേഖലയിൽ ഉയർന്ന നിലവാരം പുലർത്തുന്ന ഇൻസ്റ്റിറ്റ്യൂട്ടുകൾ.
● All Yavar Jung National Institute of Speech and Hearing Disabilities, Mumbai.
● Central Institute of Psychiatry, Ranchi.
● National Institute of Mental Health and Neurosciences, Bengaluru (NIMHANS)
● All India Institute for Speech and Hearing, Manasagangotri, Mysore
● National Institute for Empowerment of Persons with Multiple Disabilities, Kovalam, Chennai.
● National Institute for the Empowerment of Persons with Intellectual Disabilities Secunderabad(NIEPMD)
ഈ സ്ഥാപനങ്ങളോടൊപ്പംതന്നെ പ്രാധാന്യത്തോടെ കാണാവുന്ന ഏതാനും ചില സ്ഥാപനങ്ങൾ ആണ് താഴെ പറയുന്നത്.
● National Institute of Speech and Hearing, Sreekariyam, Thiruvananthapuram (NISH)
● Ramakrishna Mission Vivekananda University, Coimbatore
● Swami Vivekanand National Institute of Rehabilitation Training and Research, Olatpur Odisha
● Spastic Society of Tamilnadu, Chennai
മുകളിൽ സൂചിപ്പിച്ച ഇൻസ്റ്റിറ്റ്യൂട്ടുകൾ ഉൾപ്പെടെ നമ്മുടെ രാജ്യത്ത് 65ലധികവും കേരളത്തിൽ 25ലധികവും റിഹാബിലിറ്റേഷൻ പ്രോഗ്രാമുകൾ ഓഫർ ചെയ്യുന്ന സ്ഥാപനങ്ങൾ പ്രവർത്തിക്കുന്നുണ്ട്. ഈ സ്ഥാപനങ്ങൾ പ്രവർത്തിക്കുന്ന സ്ഥലങ്ങൾ, ഇവയുടെ അംഗീകാരം, ഇവർ നടത്തുന്ന പ്രോഗ്രാമുകൾ എന്നിവയെക്കുറിച്ച് കൂടുതൽ അറിയുന്നതിനായി https://rehabcouncil.nic.in സൈറ്റ് സന്ദർശിക്കുക.
അഫിലിയേറ്റഡ് സർവകലാശാലകൾ എന്നതുകൊണ്ട് എന്താണ് ഉദ്ദേശിക്കുന്നത്?
രതീഷ് കുമാർ,
ചിറ്റൂർ
അഫിലിയേറ്റഡ് സർവകലാശാലകൾ വിവിധങ്ങളായ ബിരുദ, ബിരുദാനന്തര പ്രോഗ്രാമുകൾ നേരിട്ട് നടത്താതെ ആ സർവകലാശാലയ്ക്കു കീഴിലുള്ള അഫിലിയേറ്റ് ചെയ്തിട്ടുള്ള കോളജുകളിലും മറ്റ് സ്റ്റഡി സെന്‍ററുകളിലൂടെയും നടപ്പാക്കുകയും ഈ ഇവിടെവച്ചുതന്നെ പരീക്ഷകൾ നടത്തി സർവകലാശാലയുടെ നേതൃത്വത്തിൽ ഇവയുടെ മൂല്യനിർണയം പൂർത്തീകരിച്ചു റിസൾട്ട് പ്രസിദ്ധീകരിക്കുകയും ചെയ്യുന്നു. മാർക്ക് ലിസ്റ്റുകളും സർട്ടിഫിക്കറ്റുകളും നൽകുന്നതും സർവകലാശാല തന്നെ ആയിരിക്കും. സർവകലാശാലയുടെ നിയന്ത്രണത്തിലാണ് എല്ലാ പ്രോഗ്രാമുകളും നടക്കുന്നത്. എന്നാൽ, ഒരു പ്രോഗ്രാമും സർവകലാശാല നേരിട്ടു നടത്തുന്നുമില്ല.
ഓരോ പ്രോഗ്രാമിലേക്ക് ആവശ്യമായ സ്കീമും സിലബസും നിശ്ചയിക്കുന്നതും അതിന്‍റെ പരീക്ഷയ്ക്കാവശ്യമായ ചോദ്യപേപ്പർ നൽകുന്നതും പരീക്ഷാ ദിവസങ്ങൾ നിശ്ചയിക്കുന്നതും മൂല്യനിർണയം നടത്തുന്നതുമായ മറ്റെല്ലാ കാര്യങ്ങളുടെയും പൂർണനിയന്ത്രണം സർവകലാശാലയ്ക്കായിരിക്കും.
അഡ്വ. ബാബു പള്ളിപ്പാട്ട്
കരിയർ ഗൈഡ്
(
[email protected])