ഫെഫ്ക സ്റ്റിൽ ഫോട്ടോഗ്രാഫേഴ്സ് യൂണിയന്‍റെ നേതൃത്വത്തിൽ പ്രശസ്ത ഫോട്ടോഗ്രാഫറായിരുന്ന അന്തരിച്ച എൻ.എൽ. ബാലകൃഷ്ണന്‍റെ പേരിൽ സംസ്ഥാന തലത്തിൽ നടപ്പിലാക്കുന്ന ഫെഫ്ക എൻഎൽബി അവാർഡിന്‍റെ ലോഗോ സംവിധായകനും ഫെഫ്ക പ്രസിഡന്‍റുമായ സിബി മലയിൽ പ്രകാശനം ചെയ്തു.
ഫെഫ്ക സ്റ്റിൽ ഫോട്ടോഗ്രാഫേഴ്സ് യൂണിയന്‍റെ വാർഷിക പൊതുയോഗത്തിലാണ് ഫോട്ടോഗ്രാഫി മത്സരത്തിന്‍റെ ലോഗോ പ്രകാശന ചടങ്ങ് നടന്നത്.
സിനിമാരംഗത്ത് സ്റ്റിൽ ഫോട്ടോഗ്രാഫേഴ്സിന് ഒരു അവാർഡ് നൽകുന്നില്ല. അതുകൊണ്ടു കൂടിയാണ് യൂണിയൻ മുൻകൈയെടുത്ത് അംഗംങ്ങൾക്കായി സിനിമാ രംഗത്ത് മാത്രമായി അവാർഡ് ഏർപ്പെടുത്തിയത്.
2022 - 23 കാലത്തെ രണ്ട് ചിത്രങ്ങൾ വീതമാണ് ഒരംഗത്തിന് അയക്കാൻ സാധിക്കുക. വിദഗ്ധ പാനലായിരിക്കും വിജയികളെ കണ്ടെത്തുക. ഒന്നും രണ്ടും മൂന്നും സ്ഥാനത്തെത്തുന്നവർക്ക് ക്യാഷ് അവാർഡും മെമെന്‍റോയും നൽകും.
അംഗങ്ങളിൽ വിവിധ മേഖലകളിൽ കഴിവു തെളിയിച്ചവർക്ക് മെമെന്‍റോ നൽകി ആദരിച്ചു. അംഗങ്ങളുടെ മക്കളിൽ ഉന്നത വിജയം കരസ്ഥമാക്കിയവർക്ക് ക്യാഷ് അവാർഡും മെമെന്‍റോയും സർട്ടിഫിക്കറ്റുകളും വിതരണം ചെയ്തു. സംവിധായകൻ വ്യാസൻ എടവനക്കാടാണ് സമ്മാനങ്ങൾ വിതരണം ചെയ്തത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.