ഷൊർണൂർ: യുഡിഎഫിന്റെ നേതൃത്വത്തിൽ കുടുംബസംഗമം നടത്തി. സാധാരണക്കാരുടെ ജീവിതനിലവാരം മെച്ചപ്പെടുത്തുന്നതിൽ കേന്ദ്രത്തെപ്പോലെ കേരള സർക്കാരും പൂർണപരാജയമാണെന്ന് മുസ്ലിം ലീഗ് അഖിലേന്ത്യാ സെക്രട്ടറി പി.കെ. കുഞ്ഞാലിക്കുട്ടി കുറ്റപ്പെടുത്തി.
കുമ്പിടി പള്ളി ബസാറിൽ ആനക്കര പഞ്ചായത്ത് യുഡിഎഫ് സംഘടിപ്പിച്ച കുടുംബസംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പെട്രോളിനും പാചകവാതകത്തിനും വില വർധിപ്പിച്ചു. നിത്യോപയോഗസാധനങ്ങളുടെ അനിയന്ത്രിത വിലക്കയറ്റത്തിൽ ജനം പൊറുതിമുട്ടി.
തൊഴിലില്ലായ്മ പതിന്മടങ്ങായി. മതനിരപേക്ഷതയും ജനക്ഷേമവും തകിടംമറിച്ചവരെ വീണ്ടും അധികാരത്തിൽ കയറ്റാതിരിക്കാനുള്ള പോരാട്ടമാണു രാഹുൽ ഗാന്ധിയുടെ നേതൃത്വത്തിൽ ഇന്ത്യാ മുന്നണി നടത്തുന്നത്.
അതിനു മതേതര ജനാധിപത്യ വിശ്വാസികളുടെ പിന്തുണ വർധിച്ചുവരുന്ന ശുഭകരമായ വാർത്തകളാണ് തെരഞ്ഞെടുപ്പ് അടുക്കുംതോറും കേൾക്കുന്നതെന്നും അദ്ദേഹം പറഞ്ഞു.
യുഡിഎഫ് ആനക്കര പഞ്ചായത്ത് ചെയർമാൻ സലീം കൂടല്ലൂർ അധ്യക്ഷത വഹിച്ചു. സി.വി. ബാലചന്ദ്രൻ, പിഇഎ സലാം, സിദ്ദീഖലി രാങ്ങാട്ടൂർ, ഖദീജ നർഗീസ്, കെ.മുഹമ്മദ്, പി.എം അസീസ്, കെ.പി. മുഹമ്മദ്, ബഷീർ കുമ്പിടി, പി.ബാലകൃഷ്ണൻ, വനജ മോഹനൻ, ഗിരിജ മോഹനൻ, റൂബിയ മോഹനൻ, സി.ടി സെയ്തലവി, പുല്ലാര മുഹമ്മദ്, സി.കെ നാരായണൻ നമ്പൂതിരി, സി.അബ്ദു, സവിത ടീച്ചർ പ്രസംഗിച്ചു.