നിങ്ങൾ ഇന്‍റർനെറ്റിൽ അമിതമായ താത്പര്യം കാണിക്കാത്തവരും സൈബർ ലോകത്തെ അപകടങ്ങളെപ്പറ്റി ബോധ്യമുള്ളവരും, സ്വന്തം സ്വകാര്യതയും മറ്റു വിവരങ്ങളും സംരക്ഷിക്കുന്നതിന് അവശ്യം വേണ്ട മുൻകരുതലുകൾ സ്വീകരിക്കുന്നവരും ആയിരിക്കാം. എന്നാൽ ഓണ്‍ലൈൻ വഴി കണ്ടെത്തുന്ന പുതിയ സുഹൃത് ബന്ധങ്ങളെപ്പറ്റിയോ, ചെന്നുചേരുന്ന പുതിയ കൂട്ടായ്മകളെപ്പറ്റിയോ, നല്ലയാൾ എന്നു വിശ്വസിക്കുന്നവരെപ്പറ്റിയോ നിങ്ങൾക്കെന്തെങ്കിലും വിശദമായി അറിയാമോ? ഈ ഓണ്‍ലൈൻ സൗഹൃദങ്ങളിലെ സുഹൃത്തുക്കളെ നേരിട്ടു കാണാൻ പോകുന്ന വിവരം രക്ഷാകർത്താവിനെയോ/ ഭാര്യയെയോ / ഭർത്താവിനെയോ/ സുഹൃത്തിനെയോ അറിയിക്കാറുണ്ടോ ? ഒന്നു ചിന്തിക്കു...
വിവരങ്ങൾ പരിധിവിട്ട് പങ്കുവയ്ക്കരുത്...
ഇന്ന് ഉൗഷ്മളമായ ബന്ധം എന്നു വിശ്വസിക്കുന്ന ബന്ധം നാളെ അപകടമാകാം. അങ്ങനെ സംഭവിച്ചാൽ നിങ്ങൾ ആ സുഹൃത്തുമായി പങ്കുവച്ച സ്വകാര്യ ഫോട്ടോകൾ, മെയിലുകൾ, അന്പരപ്പോ ലജ്ജയോ ഉളവാക്കുന്ന വീഡിയോകൾ എന്നിവ നിങ്ങളുടെ പൂർവ പങ്കാളിയുടെ കൈവശമായിക്കഴിഞ്ഞിരിക്കും. അവ തിരിച്ചു ലഭിച്ചില്ലെന്നു വന്നേക്കാം. അവ ആ വ്യക്തി ദുരുപയോഗം ചെയ്തേക്കാം, അതിനാൽ അത്തരം പ്രവൃത്തികൾ ആലോചിച്ചു മാത്രം ചെയ്യുക.
സ്വകാര്യതകൾ വെളിപ്പെടുത്തരുത്
നിങ്ങളുടെ ദുർബലതകൾ ചൂഷണം ചെയ്യാൻ തയാറായി കാത്തിരിക്കുന്ന വഞ്ചകരായ കഥാപാത്രങ്ങൾ നിങ്ങൾക്ക് ചുറ്റും ഉണ്ടാകാം. ഒരു അവധി ദിവസം എവിടെ ചെലവഴിക്കാമെന്ന് നിങ്ങൾ തീരുമാനിക്കുന്ന വിവരം അഥവാ ഒരു രസത്തിനായി പോസ്റ്റ് ചെയ്ത നിങ്ങളുടെ അന്പരപ്പിക്കുന്ന ഫോട്ടോയോ മറ്റു സ്വകാര്യ വസ്തുക്കളോ അസൂയാലുവായ സുഹൃത്തിനോ, കുറ്റവാളിയായ പങ്കാളിക്കോ, നിങ്ങൾ തക്ക മറുപടി നൽകിയ ഒരു ഭീഷണിക്കാരനോ ലഭിക്കാനും അയാളത് ദുരുപയോഗം ചെയ്യാനും സാധ്യതയുണ്ട്.
പാസ്‌വേഡുകൾ പങ്കുവയ്ക്കരുത്
സുഹൃത്തിനെ അഥവാ പങ്കാളിയെ അന്ധമായി വിശ്വസിക്കരുത്. മോശമായതോ, കയ്പേറിയതോ ആയ അനുഭവത്താൽ ആ സുഹൃത്ബന്ധം അവസാനിപ്പിച്ചാൽ അതു നിങ്ങൾക്ക് ഏറെ ദോഷമായേക്കാം. സാമൂഹ്യ മാധ്യമങ്ങളിൽ അപഖ്യാതിയും, സാന്പത്തിക തട്ടിപ്പുകളും ക്രമക്കേടും മറ്റും ഭയന്ന് ധാരാളം പെണ്‍കുട്ടികൾ ഇത്തരം ബന്ധങ്ങൾ തകരുന്പോൾ ആത്മഹത്യ ചെയ്യുന്നുണ്ടെന്ന കാര്യം ഓർക്കുക.
വെബ് കാമറകൾ ആവശ്യമില്ലാത്തപ്പോൾ വിച്ഛേദിക്കുക
കാമറ ഓണായി നിങ്ങളുടെ ചലനങ്ങൾ രഹസ്യമായി റിക്കാർഡ് ചെയ്യാൻ കഴിയുന്ന പല ആപ്ലിക്കേഷനുകളും ഇന്ന് വിപണിയിൽ ലഭ്യമാണ്. അതിനാൽ വെബ് കാമറ ആവശ്യമില്ലാത്തപ്പോൾ പ്രവർത്തനരഹിതമാക്കാൻ ശ്രദ്ധിക്കുക.
നിയമാനുസൃതമല്ലാത്ത വസ്തുതകൾ ഫോണ് / ലാപ്ടോപ് വഴി ഡൗണ്ലോഡ് ചെയ്യാൻ മറ്റുള്ളവരെ അനുവദിക്കരുത്.
സ്വന്തം ലാപ്ടോപ് വഴിയോ ഫോണ് വഴിയോ നിയമാനുസൃതമല്ലാത്ത വസ്തുക്കൾ മറ്റാരെങ്കിലും ഡൗണ്ലോഡ് ചെയ്താൽ അതിന്‍റെ ഭവിഷ്യത്ത് വലുതായിരിക്കും. മാത്രമല്ല തുടർന്ന് നിങ്ങൾക്ക് വരുന്ന മെസേജുകളും മെയിലുകളും നോട്ടുകളും മറ്റും അവർ കൈകാര്യം ചെയ്തെന്നും വരാം. നിങ്ങളുടെ ഇത്തരം ഉപകരണങ്ങൾ പാസ്‌വേഡ് ഉപയോഗിച്ച് സുരക്ഷിതമായി കൈകാര്യം ചെയ്തില്ലെങ്കിൽ ആർക്കുവേണമെങ്കിലും ഇവ കൈകാര്യം ചെയ്യാനും ശേഖരിച്ചിട്ടുള്ള വസ്തുതകൾ നഷ്ടപ്പെടുത്താനും കഴിയും. ഓണ്‍ലൈൻ സുഹൃത്തുക്കളെ നേരിൽ കാണാൻ പോകുന്പോൾ വേണ്ടപ്പെട്ടവരെ വിവരം അറിയിക്കണം.
സെക്യൂരിറ്റി സോഫ്റ്റ്വെയറുകൾ കാലഹരണപ്പെട്ടാൽ അവ പുതുക്കുന്നതിൽ അനാസ്ഥ കാണിക്കരുത്.
സുരക്ഷിതത്വത്തിനായി സ്മാർട്ട് ഫോണ് ആപ്ലിക്കേഷനുകൾ ഉപയോഗപ്പെടുത്തുക. ഇത്തരം ആപ്ലിക്കേഷനുകൾ ഇന്ന് വിപണിയിൽ സുലഭമാണ്. അവയുടെ ആധികാരികത ഉറപ്പാക്കിയശേഷം പ്രയോജനപ്പെടുത്താവുന്നതാണ്.
ടിപ്സ്
1. നിയമാനുസൃതമായി അനുവദനീയമായ സൈറ്റുകൾ മാത്രം കൈകാര്യം ചെയ്യാൻ ശ്രദ്ധിക്കുക.
https ൽ തുടങ്ങുന്ന വൈബ്സൈറ്റുകൾ സുരക്ഷിതമായവയാണ്. അല്ലാത്തവ ഉപയോഗിക്കുന്പോൾ ശ്രദ്ധിക്കുക.
2. സ്വന്തം പാസ്‌വേഡ് മറ്റുള്ളവരോട് വെളിപ്പെടുത്തരുത്.
3. അപരിചിതരുടെ ഇ- മെയിലുകൾ തുറക്കരുത്.
4. മറ്റുള്ളവരുടെ സ്വകാര്യതയ്ക്കും സുരക്ഷിതത്വത്തിനും സ്വന്തം സ്വകാര്യതയ്ക്കും സുരക്ഷിതത്വത്തിനും ഉള്ള അതേ പ്രാധാന്യം തന്നെ നൽകുക.
5. ചാറ്റിങ്, ഇ- മെയിൽ തുടങ്ങി ഓണ്‍ലൈൻ സേവനങ്ങൾ മുഖാന്തിരം ലഭിക്കുന്ന സൗഹൃദങ്ങളെയും ബന്ധങ്ങളെയും അന്ധമായി വിശ്വസിക്കരുത്.
6.വ്യക്തിപരമായ വിവരങ്ങൾ, ഫോട്ടോകൾ കുടുംബത്തിന്‍റെ വിശദവിവരങ്ങൾ തുടങ്ങിയവ അപരിചിതരുമായി പങ്കുവയ്ക്കരുത്.
7. അസ്വസ്ഥത ഉളവാക്കുന്ന മെയിലുകൾ ലഭിച്ചാൽ രക്ഷകർത്താക്കളെയോ ബന്ധപ്പെട്ട അധികൃതരെയോ അറിയിക്കാൻ തെല്ലും മടിക്കരുത്.
8.ഓണ്‍ലൈൻ സുഹൃത്തിനെ നേരിട്ട് കാണാൻ ഉള്ള ക്ഷണം കഴിയുന്നതും ഒഴിവാക്കുന്നതാണ് നല്ലത്.
9. ഓണ്‍ലൈൻ വസ്തുതകൾ ഉപയോഗപ്പെടുത്തുന്പോൾ, കോപ്പിറൈറ്റ് സംബന്ധിച്ച വിഷയത്തെപ്പറ്റി അവബോധം ഉണ്ടാക്കണം.
10. സംശയാസ്പദമായ ലിങ്കുകളിൽ (URL) ക്ലിക്ക് ചെയ്യരുത്.
11. ചില മൊബൈൽ/ കംപ്യൂട്ടർ ആപ്ലിക്കേഷൻ സോഫ്റ്റ്വെയറുകൾ പണം നൽകാതെ (ഫ്രീ ആയി) ഡൗണ്ലോഡ് ചെയ്യുന്പോൾ അവയിൽ വൈറസുകൾ ഉണ്ടാകാൻ സാധ്യതയുണ്ടെന്ന കാര്യം ഓർക്കുക.
സോഷ്യൽ നെറ്റ് വർക്കിംഗ് സൈറ്റിൽ ശ്രദ്ധിക്കാം
സൈബർ ലോകത്തിൽ സോഷ്യൽ നെറ്റ് വർക്കിംഗ് സൈറ്റുകളുടെ സ്ഥാനം വളരെ വലുതാണ്. ഇന്നത്തെ കാലത്ത് സോഷ്യൽ നെറ്റ് വർക്കിംഗ് സൈറ്റുകളുടെ പ്രചാരവും വളരെ വേഗത്തിലാണ്. ഇന്ന് ലോകമെന്പാടും ഫേസ്ബുക്ക്, ട്വിറ്റർ പോലുള്ള നിരവധി പബ്ലിക്, പ്രൈവറ്റ് സോഷ്യൽ നെറ്റ് വർക്കുകൾ ഉണ്ട്. ഇതിൽ ഏറ്റവും പ്രചാരമുള്ള ഫേസ് ബുക്കിൽ തന്നെ ലക്ഷക്കണക്കിന് ഉപയോക്താക്കൾ ഉണ്ട്. (നാളെ- ഇ മെയിൽ ഉപയോഗിക്കുന്പോൾ ശ്രദ്ധിക്കാം).
സീമ മോഹൻലാൽ